Vyniki daśledavańnia amierykanskich navukoŭcaŭ śviedčać, što štodzionnaje ŭžyvańnie aśpirynu pavyšaje ryzyku aniemii ŭ pažyłych ludziej bolš čym na 20 pracentaŭ.
Na praciahu mnohich hadoŭ ludzi časta prymajuć nizkija dozy acetyłsalicyłavaj kisłaty, abo aśpirynu (u dozie 100 milihramaŭ i mienšaj na sutki), jakaja razredžvaje kroŭ i dapamahaje praduchilić utvareńnie trombaŭ, sardečny prystup abo insult. Asabliva pašyryłasia hetaja praktyka paśla pandemii COVID.
Adnak daśledavańnie, vyniki jakoha apublikavanyja ŭ časopisie Annals of Internal Medicine, śviedčać ab tym, što pažyłyja ludzi, jakija štodnia prymajuć nizkija dozy aśpirynu, mohuć mieć bolš šancaŭ na raźvićcio aniemii, čym tyja, chto hetaha nie robić.
Aniemija raźvivajecca, kali ŭ čałavieka niedastatkovaja kolkaść zdarovych erytracytaŭ, nieabchodnych dla pieranosu kisłarodu da tkanak va ŭsim ciele. Ludzi z aniemijaj časta adčuvajuć stomlenaść i zadyšku. Daśledčyki źviazvajuć pavyšanuju ryzyku raźvićcia aniemii siarod asob, jakija prymajuć aśpiryn, z deficytam žaleza.
Vučonyja praanalizavali danyja zvyš 19 tysiač čałaviek, bolšaść ź jakich była va ŭzroście 70 hadoŭ i bolej. Usie jany nie mieli vidavočnych zachvorvańniaŭ i aniemii. Vypadkovym čynam častcy ź ich było pryznačana prymać abo 100 milihramaŭ aśpirynu, abo płaceba na praciahu piaci hadoŭ. Padčas daśledavańnia ŭzrovień hiemahłabinu ŭ kryvi vymiaraŭsia kožny hod, a ŭzrovień fierytynu — napačatku i praz 3 hady.
Za hety čas analizy kryvi ŭdzielnikaŭ pakazali, što ŭzroŭni hiemahłabinu i fierytynu (białkoŭ, jakija dapamahajuć vyznačyć kolkaść žaleza ŭ kryvi) źnizilisia bolš rezka siarod tych, chto štodnia prymaŭ aśpiryn, čym siarod tych, chto prymaŭ płaceba. Vyniki daśledavańnia pakazali, što ryzyka raźvićcia aniemii siarod ty, chto prymaŭ aśpiryn, była na 23.5% bolšaj u paraŭnańni z tymi, chto prymaŭ płaceba.
U 2022 hodzie Amierykanskaja rabočaja hrupa pa prafiłaktycy zachvorvańniaŭ (United States Preventive Services Task Force, USPSTF) apublikavała novyja rekamiendacyi. Adpaviedna im, pryjom nizkich doz aśpirynu nie ličycca prymalnym ź miedycynskaha punktu hledžańnia dla bolšaści darosłych, u jakich jašče nie było prablem z sardečna-sasudzistaj sistemaj. Asabliva dla tych, u kaho pavyšanaja ryzyka straŭnika-kišačnaha kryvacioku, a taksama dla pacyjentaŭ va ŭzroście 60 hadoŭ i starejšym.
U pažyłych ludziej suviaź pamiž pryjomam aśpirynu i aniemijaj u pieršuju čarhu źviazanaja z pavyšanaj ryzykaj straŭnikava-kišačnaha kryvacioku. Chraničnyja abo recydyŭnyja kryvacioki mohuć vyčerpvać zapasy žaleza ŭ arhaniźmie, što z časam pryvodzić da aniemii.
Vyvady daśledavańnia, jak piša internet-vydańnie Healthline.com, źviartajuć uvahu na nieabchodnaść pieryjadyčnaha kantrolu daktarami ŭzroŭniu hiemahłabinu ŭ svaich pacyjentaŭ, jakija prymajuć aśpiryn. Uzrovień fierytynu ŭ kryvi moža być adnym z pakazčykaŭ u dadatak da inšych, jakija mohuć dapamahčy vyznačyć pryčynu luboj mahčymaj aniemii.
Śpiecyjalisty rekamiendujuć paraicca z daktarami, dobra ŭzvažyć ryzyki i pieravahi pierad tym, jak prymać aśpiryn. Pryjom acetyłsalicyłavaj kisłaty i jaje pieravahi patrabujuć poŭnaha razumieńnia vašaha stanu, inšych lekaŭ, što vy prymajecie, i lubych papiarednich pabočnych reakcyj, takich jak straŭnikava-kišačny kryvaciok ci aniemija.
Isnujuć alternatyŭnyja varyjanty hetych lekaŭ. Jany zaležać ad stanu, pry jakim prymajecca aśpiryn. Naprykład, alternatyŭnym bolepatolnym srodkam moža być paracetamoł, supraćzapalenčym — ibuprafien. A praduchilić utvareńnie trombaŭ dapamoža kłopidahreł (płaviks). Ale ŭ lubym vypadku ich moža pryznačyć tolki doktar.
Čytajcie jašče:
Daśledavańni aśpirynu vyjavili novyja cikavyja fakty
Kab tabletki chutčej dziejničali, treba lehčy na pravilny bok
Aśpiryn moža dapamahčy ŭ zmahańni z ahresiŭnym rakam hrudziej
«Biełarusy buduć cichieńka dumać svajo. A vada kamień točyć, dyj Łukašenka fizična nie viečny». Hłyboki manałoh byłoha mytnika Alesia Jurkojcia4
Kamientary