Papularny sieryjał «Miadźviedź» vypuściŭ druhi siezon — spadabajecca fanatam hatoŭki i restaranaŭ
Sieryjał «Miadźviedź» zastajecca najlepšym apoviedam pra restaranny biznes i kucharstva. A taksama pra adnosiny ŭnutry kamandy, dziciačyja traŭmy i bałans pamiž pracaj i asabistym žyćciom.
U druhim siezonie našumiełaha sieryjała «Miadźviedź» dziejańnie narešcie vychodzić za miežy kuchni. Ciapier uvaha skiravanaja nie tolki na hałoŭnaha hieroja, ale i na akcioraŭ druhoha płanu.
Sieryjał, jaki letaś dla mnohich staŭ sapraŭdnym adkryćciom, raskazvaje historyju maładoha šef-kuchara Karmi. Jon pakidaje śviet vytančanaj kuchni, kab viarnucca dadomu ŭ Čykaha i kiravać siamiejnym restaranam paśla śmierci svajho brata Majkła.
Restaran, jaki spačatku zaviecca The Beef, maje niejmaviernuju kolkaść prablem. Jon tonie ŭ daŭhach i razvalvajecca, a jaho piersanał — skroź adnyja tolki kałarytnyja piersanažy. Tolki dziakujučy sile voli Karmi ŭdajecca naładzić pracesy ŭnutry, kab niešta pačało pracavać. Pieršy siezon skončyŭsia zakryćciom The Beef i abviaščeńniem taho, što novy restaran atrymaje nazvu The Bear.
Kali ŭ pieršym siezonie hieroi amal nie vychodzili za miežy kuchni i my mała što viedali pra ich asabistaje žyćcio, to ŭ druhim jany narešcie pačynajuć raskryvacca.
Akramia hetaha, u novych sieryjach — inšy temp padačy historyi: apovied užo nie składajecca vyklučna z šalonaha zvonu rondalaŭ. Dziejańnie razhortvajecca z roznaj chutkaściu — to z toj varjackaj, da jakoj my pryzvyčailisia ŭ pieršym siezonie, to z davoli miedytatyŭnaj. I ŭ cichich momantach stolki ž siły, jak i ŭ scenach, dzie piersanažy pierakrykvajuć adno adnaho, a dyjałohi amal niezrazumiełyja. Apaviadalniki viedajuć, kali raściahnuć čas, a kali jaho ścisnuć.
«My ŭsie tut, kab vučycca», — kaža Karmi piersanału, jaki rychtujecca da hienieralnaj repietycyi. Tema samaŭdaskanaleńnia, što padymajecca ŭ novym siezonie «Miadźviedzia», raskryvajecca nie praz abstraktnyja razvažańni, a vyklučna praź dziejańni i pavodziny — typova dla hetaha sieryjała. Cinu, niahledziačy na jaje ŭžo niemałady viek, adpraŭlajuć u kulinarnuju škołu, kab jana palepšyła svaje navyki. Prablemny, niespakojny «stryječny brat» Ryčy, jakomu ŭ novym siezonie adviali šmat uvahi, idzie na stažyroŭku ŭ «mišlenaŭski» restaran. Sidni — talenavitaja šef-kucharka — šukaje kulinarnaje natchnieńnie ŭ inšych restaranach i samim horadzie, a jašče čytaje knihu viadomaha baskietbolnaha treniera Majka Kšyšeŭskaha, u naźvie jakoj («Leading with the Heart…») — piersanalnaja meta hieraini na druhi siezon.
Markus — piekar, jaki vyrašyŭ stać kandytaram — ździajśniaje tvorčaje padarožža ŭ Kapienhahien, kab pa-novamu zirnuć na desierty. Jaho novy nastaŭnik Łuka kaža jamu, što ŭ peŭny momant być vialikim šef-kucharam aznačaje «nie stolki majsterstva, kolki adkrytaść» śvietu i inšym ludziam. Markus uvasablaje hetuju paradu ŭ žyćcio: kali padarožničaje pa horadzie, jon namahajecca zapomnić słavutaści i smaki, jakija paźniej pieratvoryć u novyja pačastunki dla «Miadźviedzia».
Adna z samych cichich siužetnych linij sieryjała — adnosiny Karmi i doktarki Kłer, jakaja stanovicca dla hałoŭnaha hieroja svojeasablivym schoviščam ad bury. Ci zdoleje šef-kuchar praciahvać svaju pracu, jakaja vymahaje stolki ž tvorčaści, kolki i varjactva, i adnačasova być spakojna ščaślivym? Ci, kab być dobrym u pracy, Karmi pavinien być, pa jaho ž słovach, «čortavym psicham» — i akurat praz heta ŭ jaho ŭsio atrymlivajecca?
Druhi siezon «Miadźviedzia» bliskuča demanstruje ŭnutranuju baraćbu, ź jakoj davodzicca sutykacca, kali pieraśleduješ svaje mary. Šlach da pośpiechu i atrymańnia žadanaha nie zaŭsiody supravadžajecca radaściu i zapałam. Byvajuć dni, kali tabie zusim nie padabajecca toje, što ty robiš. Potym nadychodziać inšyja dni, kali ty nie možaš biez hetaha žyć. Karmi — idealnaje ŭvasableńnie hetych supiarečlivych emocyj.
Adkryćcio novaha restarana — vialikaja ryzyka. Partniorstva moža razburycca, mohuć źjavicca niepieraadolnyja kadravyja prablemy. I navat kali ŭsio atrymajecca, restaran usio adno moža zakrycca praz svaju niepaśpiachovaść. Pieraadoleńnie minnaha pola ryzyk — cana, jakuju treba zapłacić za isnavańnie niečaha bolšaha, čym my sami. Ci vartyja ciažkaści i pieraškody taho pośpiechu, jaki moža čakać paśla? Heta pavinny vyśvietlić Karmi i jaho kamanda, pakul jany, jak zvyčajna, tušać, parać i smažać.
Bolš pra kino:
Dzieviać hałoŭnych kinastužak hetaha leta
Na płatformie Vodblisk staŭ dastupny karotkamietražny film «Voziera radaści»
«Indyjana Džons i Cyfierbłat losu»: 80-hadovy Charysan Ford znoŭ u roli avanturnaha archieołaha
«Siarhiej» nie adzin. Voś jak KDB prapanuje zarabić na sačeńni za biełaruskimi emihrantami2
Kamientary