«Prapahandujuć polski składnik našaj historyi». Łukašysty apałčylisia na park «Suła»
Prapahandyst Ryhor Azaronak razam z kiraŭnikom tolki što aformlenaj praŭładnaj partyi «Biełaja Ruś» Aleham Ramanavym atakavali park-muziej interaktyŭnaj historyi «Suła» ŭ Staŭbcoŭskim rajonie.
U muziei na hetyja vychadnyja zapłanavali pravieści śviata «Hodnaść i niezaležnaść. Jak šlachta baraniła Biełaruś», pra što byli adpaviednyja abviestki. Na ich ci pa svajoj inicyjatyvie, ci pa zahadzie orhanaŭ źviarnuŭ uvahu prapahandyst Ryhor Azaronak. Na hety raz jon adpraviŭsia na dzikaje palavańnie sa staršynioj praŭładnaj «Biełaj Rusi» Aleham Ramanavym.
Prysłužniki Łukašenki śćviardžajuć, što mierapryjemstva nie adpaviadaje «ni kancepcyi histaryčnaj palityki našaj krainy, jakaja ŭžo zaćvierdžanaja», ni tym pasyłam, jakija rabiŭ Łukašenka «adnosna hetaj šlachty, Radziviłaŭ, Sapiehaŭ, Maniušak dy inšych dziejačaŭ».
Prapahandysty ŭ histaryčna-kulturnaj ustanovie dziejničali pa svajoj zvykłaj mietodycy. Jany čaplalisia da kiraŭnictva i supracoŭnikaŭ muzieja i zadavali im pytańni na temy historyi i sučasnaj palityki, siarod inšaha demanstrujučy źviazanyja z muziejem archiŭnyja zdymki, zroblenyja ŭ 2020 hodzie. Aburalisia zhadkam pra rasijskuju akupacyju biełaruskich ziemlaŭ. Va ŭsim im bačycca prapahanda «polskaha składnika našaj historyi», jaki sam Łukašenka nazvaŭ, maŭlaŭ, «etnacydam».
Cyvilizavanaj dyskusijaj toje, što adbyvajecca, nazvać niemahčyma, pakolki ŭ ciapierašnich palityčnych umovach prapahandysty — heta anałah «litaraturaznaŭcaŭ z nahanam» stalinskich časoŭ. Pry ciapierašnich umovach jany mohuć biespakarana naviazvać lubuju, navat samuju dzikuju interpretacyju historyi i adkryta zabaŭlajucca tym, što ździekujucca ź ludziej, faktyčna pierad imi biezabaronnych.
Tak, naprykład, stend, pryśviečany «Našaj Nivie» pačatku XX stahodździa, jany adnaznačna interpretujuć jak zaklik da čytańnia ciapierašniaj «Našaj Nivy» — bieź nijakich na toje realnych padstaŭ, prosta tamu, što tak zakarcieła.
Pry hetym u prapahandystaŭ vyrvałasia pryznańnie, što narod ich nie padtrymlivaje i cicha nienavidzić: maŭlaŭ, navat ideołahi i «partyjcy», choć i prysutničajuć na ideałahičnych zborach z udziełam samoha Łukašenki, ale pry hetym nie chočuć aktyŭničać, tamu davodzicca ŭsim zajmacca «hastraloram» ź Minska.
Kamientary