Błohier pamior paśla taho, jak u žyvym efiry TikTok vypiŭ siem butelek kitajskaha ałkaholnaha napoju Baijiu
Jon pajšoŭ na heta z-za projhryšu ŭ čelendžy.
Kitajski błohier pamior paśla praźmiernaha ŭžyvańnia ałkaholu padčas žyvoha efiru. Pra heta 27 maja paviedamiła ahienctva CNN sa spasyłkaj na miascovyja kitajskija ŚMI.
34-hadovy mužčyna pa proźviščy Van byŭ papularnym strymieram u kitajskaj viersii tyktoka Douyin, dzie pad nikam Sanqiange rehularna zdymaŭ čelendžy na svaim kanale. 16 maja jon pryniaŭ vyklik inšaha błohiera ŭ papularnym čelendžy «PK», dzie ŭdzielnikam treba spaborničać pamiž saboj u žyvym efiry ŭ roznych zadańniach dziela padarunkaŭ ad hledačoŭ pry kožnaj pieramozie.
Za kožny projhryš hulcam, naadvarot, naležała pakarańnie, a tak jak Vanu zusim nie ščaściła, to jon u jakaści pakarańnia pa ŭmovach čelendžu vypivaŭ pa butelcy Baijiu («Bajdzioŭ», ci dasłoŭna «bieły ałkahol») — kitajskaha śpirtnoha napoju z macunkam ad 30% da 60%, jaki vielmi nahadvaje pa smaku harełku.
Mužčyna vypiŭ tady nie mienš za siem butelek takoha napoju, i ŭžo praz 12 hadzin paśla strymu byŭ znojdzieny miortvym.
«Ja nie viedaju, kolki jon vypiŭ da taho, jak ja padklučyŭsia da efiru. Ale ŭ apošniaj častcy videa ja bačyŭ, jak jon vypiŭ try butelki, a zatym nakinuŭsia na čaćviortuju», — raspavioŭ adzin ź siabroŭ Vana.
Sama sacsietka Douyin užo zabaraniała ŭžyvańnie ałkaholu padčas žyvych tranślacyj, pry hetym pakarańni varjirujucca ad papiaredžańniaŭ da abmiežavańnia dostupu karystalnikaŭ da svajho akaŭnta. Vanu raniej užo było zabaroniena karystacca sacsietkaj praz užyvańnie ałkaholu. Ale jon abychodziŭ heta, stvarajučy novyja ŭlikovyja zapisy. U jaho apošniaha akaŭnta było bolš za 44 000 padpisantaŭ.
Hramadstva Kitaja zaniepakojena ŭpłyvam takich čelendžaŭ, bo heta daloka nie pieršy vypadak śmierci. U 2021 hodzie adzin błohier pamior ad taho, što jeŭ na svaich tranślacyjach vialikuju kolkaść ježy. A inšy strymier zahinuŭ z-za taho, što ŭ žyvych efirach užyvaŭ šmat ałkaholu i aleju.
Žycharcy Mahilova pahražajuć kryminałkaj za toje, što źniała ranišniuju čarhu ŭ rehistraturu3
Kamientary