Prezident Čechii zaklikaŭ nie śpiašacca z nastupam i nie čakać poŭnaj pieramohi Ukrainy
Petr Paveł pieraściaroh ukrainskaje kiraŭnictva ad paśpiešnaha kontrnastupu. U minułym prezident Čechii byŭ hienierałam NATO.
Petr Paveł, jaki ŭ minułym byŭ hienierałam NATO, zajaviŭ u intervju haziecie The Guardian, što ŭkrainskaja armija sioleta budzie mieć tolki adzin šaniec dla nastupu. Tamu jon i pieraściaroh ad žadańnia pryśpiešvać USU, jakija, na jaho dumku, niasuć surjoznyja straty, piša Bi-bi-si.
Padčas apošnich sustreč u Kijevie z Uładzimiram Zialenskim i Dzianisam Šmyhalem češski lidar skazaŭ, što va Ukrainy bolš nie budzie elemientu niečakanaści, jaki spryjaŭ pośpiechu na Charkaŭščynie i Chiersonščynie letaś.
Pa słovach Paveła, padčas nastupu ŭkrainskija siły ŭ lubym vypadku paniasuć «žudasnyja straty», ale kontrnastup moža być paśpiachovym. Jon dadaŭ, što ataka, siarod inšaha, nadzvyčaj zatratnaja z punktu hledžańnia asnaščeńnia asabistaha składu, łahistyki bojeprypasaŭ i paliva.
Paveł raspavioŭ, što padčas sustrečy z premjer-ministram Ukrainy na minułym tydni zaklikaŭ ukrainskaje kiraŭnictva nie «paddavacca na zakliki da chutkich dziejańniaŭ da taho, jak jany buduć całkam hatovyja».
«U niekatorych jość spakusa padšturchnuć ich, kab prademanstravać niejkija vyniki. Dla Ukrainy budzie vielmi drenna, kali hety kontrnastup paciarpić niaŭdaču, bo druhoha šancu ŭ jaje nie budzie, prynamsi ŭ hetym hodzie», — padkreśliŭ jon.
Sa słoŭ Paveła, Zialenski paprasiŭ jaho i słavackuju kalehu Zuzanu Čaputavu dać uzbrajeńnie dla dźviuch miechanizavanych bryhad da pačatku nastupu.
«Miarkujučy pa ŭsim, jany ŭsio jašče ličać, što nie majuć usiaho nieabchodnaha dla pačatku paśpiachovaj apieracyi», — adznačyŭ prezident Čechii.
Paveł dadaŭ, što havorka išła ab pastaŭkach kala 35 tankaŭ i 100 broniemašyn, što ciapier budzie «vielmi składana».
«Čechija ŭžo pastaviła nie mienš za 100 tankaŭ, asabliva T-72, mnohija ź jakich byli madernizavanyja, prykładna takaja ž kolkaść BMP, artyleryi, hranatamiotaŭ i šmat bojeprypasaŭ, — rastłumačyŭ prezident krainy. — U nas jość niekatoryja mahčymaści ŭ halinie sistem SPA z peŭnaj kolkaściu rakiet, i heta im dapamoža».
Češski prezident adznačyŭ, što Kijevu nie varta «niedaaceńvać rasijan, bo ŭ ich dastatkova žyvoj siły, u ich usio jašče dastatkova techniki, navat kali jana staraja i, mahčyma, jaje mienš, ale ŭsio ž u ich jość vialikaja kolkaść artyleryi i šmat bojeprypasaŭ».
«Jany nie takija ŭžo biezdapamožnyja z punktu hledžańnia abarony. I, viadoma, być u abaronie im praściej, bo ŭkraincy niasuć vialikija straty, navat kali buduć dobra padrychtavanyja. Atakavać takoha voraha, jak Rasija, budzie składana, i rasijan nie zastanuć źnianacku ŭ druhi raz», — adznačyŭ prezident.
Jon padkreśliŭ, što Zachad pavinien być hatovy da taho, što vajna moža skončycca z vynikam, jaki nie praduhledžvaje poŭnaj pieramohi Ukrainy.
«Dumaju, my pavinny rabić usio, što ŭ našych siłach, kab padtrymlivać ukraincaŭ i dapamahać ich pośpiechu. Ale z unutranaha punktu hledžańnia, my pavinny być hatovyja da inšych varyjantaŭ raźvićcia padziej», — zajaviŭ Paveł.
Kamientary