Jaki najlepšy čas dla śniadanku, kali zranku vy zajmajeciesia sportam?

Niama adnaznačnaha adkazu dla ŭsich, ale jość niekalki faktaraŭ, jakija možna ŭziać pad uvahu. Taksama varta viedać, što niekatoryja pradukty lepiej pasujuć dla pryjomu ježy pierad treniroŭkaj, a niekatoryja — paśla jaje.

Karyść ježy pierad ranišniaj treniroŭkaj

Kab treniravacca: biehać, jeździć na rovary abo płavać u basiejnie, — vam patrebna paliva. Pryjom vuhlavodnaj ježy abo napojaŭ pierad praktykavańniami dazvolić vam treniravacca daŭžej ci z bolšaj intensiŭnaściu.

Akademija charčavańnia i dyjetałohii raić spažyvać vuhlavody i białki za adnu-čatyry hadziny da treniroŭki, ale heta nie zaŭsiody mahčyma, kali vy biehajecie a 5-j ranicy.

Tamu ŭ hetym vypadku lepš aryjentavacca na svaje adčuvańni. Niekatoryja ludzi nazapašvajuć dastatkova enierhii z taho, što źjeli napiaredadni viečaram, kab vytrymać rańniuju treniroŭku, a kamuści treba niešta źjeści, kab nie zrabiłasia młosna.

Jak pravieryć, ci vaš heta varyjant — śniadanak pierad treniroŭkaj

U ludziej roznyja patreby, jakija mohuć mianiacca dzień pry dni. Ekśpiertka pa fitnesie i zasnavalnica Studio Sweat onDemand Ket Kom havoryć, što kali vy pačatkoviec u treniroŭkach, to, mahčyma, vam lepiej zahadzia što-niebudź źjeści. Kali ž vy daśviedčany spartoviec, to naŭrad ci budziecie heta rabić. U niekatorych ludziej adčuvalny straŭnik, i padčas treniroŭki im budzie motašna, kali da hetaha jany pajaduć.

«Ja ničoha nie mahu jeści za dźvie hadziny da zaniatkaŭ, — kaža Kom. — Ale moj muž, vierahodna, moh by źjeści buryta, a potym pajści na vysokaintensiŭny intervalny treninh. Ja zaŭsiody prapanuju svaim klijentam pasprabavać roznyja rečy, kab ubačyć, što najlepš pracuje dla ich».

Kom tłumačyć, što samaje hałoŭnaje — zvažać na toje, jak vy siabie adčuvajecie padčas spartyŭnych zaniatkaŭ. Ci niama ŭ vas młosnaści i hałavakružeńnia? Ci dastatkova enierhii, kab treniravacca z toj intensiŭnaściu, ź jakoj vy chočacie?

Na toje, kali treba jeści, upłyvajuć i inšyja faktary, naprykład, vašy mety ŭ fitnesie, ci jość u vas chraničnyja chvaroby, jakoj intensiŭnaści i praciahłaści čakajecca nahruzka, a taksama čas apošniaha pryjomu ježy.

Kali vy nie lubicie jeści pierad treniroŭkaj i heta nie ŭpłyvaje na vašu pracazdolnaść, to lepš nie prymušać siabie jeści.

Dastatkovaja kolkaść vady bolš važnaja, čym ježa

Kali vybar ježy pierad ranišniaj treniroŭkaj moža być asabistaj spravaj kožnaha, to pić vadu — heta toje, da čaho pavinny imknucca ŭsie.

Daśledavańni pakazvajuć, što ŭžyvańnie vady pierad śniadankam dapamahaje źmienšyć ahulnaje spažyvańnie kałoryj na praciahu dnia. Taksama viadoma, što hidratacyja adyhryvaje klučavuju rolu ŭ praduchileńni traŭmaŭ u fitnesie i adnaŭleńni cieła.

Kali vy abiazvodžanyja, uzrovień vašaj enierhii budzie źnižacca, i vaša treniroŭka projdzie nie najlepšym čynam.

Ket Kom raić vypivać kala paŭlitra vady za hadzinu da zaniatkaŭ. «Jak tolki ja ŭstaju, ja pju vadu, — kaža jana. — Ja pju vadu pa darozie ŭ spartzału i padčas praktykavańniaŭ».

Što jeści pierad treniroŭkaj

Kali vy vyrašycie pajeści pierad treniroŭkaj, to pierš za ŭsio lepš paźbiahać praduktaŭ z vysokim utrymańniem tłušču i białku, bo jany buduć daŭžej pieratraŭlacca. I nie treba jeści zašmat.

Sens u tym, kab paźbiehnuć boli ŭ žyvacie i źvieści da minimumu młosnaść.

Lepš jeści pradukty, u jakich jość vuhlavody, naprykład, suchija šmatki, suchafrukty, arachisavuju pastu z sadavinoj abo aŭsianku z małakom i sadavinoj.

Vy zaŭsiody pavinny jeści paśla treniroŭki

Pryjom ježy paśla treniroŭki maje vyrašalnaje značeńnie niezaležna ad taho, jaście vy pierad praktykavańniami ci nie. Klinika Maja raić užyvać vuhlavody i białki na praciahu dźviuch hadzin paśla spartyŭnych zaniatkaŭ.

Heta moža być celnazbožžavy chleb, arachisavaja pasta z bananam, sadavinoj i johurtam, sandvič ź indyčkaj na celnazbožžavym chlebie z harodninaj abo smuzi — husty napoj z sadaviny ci harodniny, zdrobnienych u błendary, časam z nasieńniem ci arechami.

Paśla treniroŭki vaša cieła nieadkładna pačynaje adnaŭlać zapasy hlikahienu i ciahlicavyja białki. Ježa maksimizuje sintez białku i hlikahienu, stymuluje mietabalizm i, samaje hałoŭnaje, paskaraje adnaŭleńnie arhanizma.

Navat kali naroščvańnie ciahlic nie jość vašaj metaj, vam treba jeści białok, bo jon utrymlivaje niezamiennyja aminakisłoty, jakija arhanizm nie moža vypracavać samastojna. Pavodle siarednich rekamiendacyj mižnarodnych arhanizacyj, darosłamu čałavieku treba kala 0,8 hram białku na kiłahram vahi ŭ dzień. U siarednim heta 55 h dla mužčyn i 45 h dla žančyn. Adnak, kali vy zajmajeciesia sportam ci prosta viedziacie aktyŭny ład žyćcia, rekamiendacyi mohuć być istotna pavialičanyja — ad 1,2 da 1,7 h na kiłahram vahi ŭ dzień (dla čałavieka vahoj 68 kh — heta prykładna ad 82 da 116 h białku).

Čytajcie jašče:

Jak pačać pravilna charčavacca i zajmacca fitnesam? Spytali ŭ treniera

U jaki čas dnia lepš za ŭsio zajmacca sportam? I jak biez stresu vypracavać zvyčku

Daktary raspaviali, kolki vady ŭ sutki treba pić i čaho nie chapaje ŭ racyjonie biełarusaŭ

• 10
• 0
• 0
• 1
• 0
• 3
• 0
• 0