Zatrymańni psichołahaŭ i psichaterapieŭtaŭ: što viadoma
Apošnimi dniami ŭ Biełarusi masava zatrymlivajuć psichaterapieŭtaŭ i psichijatraŭ. «Naša Niva» daviedałasia niekatoryja padrabiaznaści.
Pavodle telehram-kanała «Biełyje chałaty», zatrymana nie mienš za 20 śpiecyjalistaŭ. Častku ź ich paśla dopytaŭ adpuścili, častka zastajecca pad vartaj. Padčas dopytaŭ u śpiecyjalistaŭ patrabujuć dać infarmacyju pra «niadobranadziejnych» pacyjentaŭ, jakija da ich prychodzili.
Nakolki viadoma «Našaj Nivie», zatrymańni pačalisia jašče na minułym tydni. Zatrymańni zbolšaha datyčacca śpiecyjalistaŭ, jakija karystajucca ŭ svajoj pracy mietadami hieštalt-terapii. Da hetaj supolnaści naležała i Jaŭhienija Tačyckaja — psichijatr-narkołah i psichaterapieŭt, jakuju dziaržaŭnyja miedyja i KDB źviazvajuć ź Mikałajem Šviecam, abvinavačanym u arhanizacyi dyviersii na aeradromie ŭ Mačuliščach.
Prapahanda śćviardžaje, što Jaŭhienija dapamahła Šviacu schavacca ŭ katedžy. Tudy nibyta advioz jaho siabra psichaterapieŭtki.
Pa źviestkach «Našaj Nivy», zatrymlivajuć śpiecyjalistaŭ, jakija, na dumku śpiecsłužbaŭ, raniej kantaktavali ź Jaŭhienijaj pa prafiesijnych i asabistych pytańniach, navučalisia razam abo pracavali. U zatrymanych ahladajuć sacsietki i «adpracoŭvajuć» ichnija kantakty.
Pieravažnuju bolšaść adpuskajuć paśla dopytu, kali na ichnich pryładach ci ŭ chacie nie znajšli ničoha «kramolnaha».
Siarod zatrymanych — psichołah i cialesny terapieŭt Julija Bakun. Da jaje pryjšli jašče 9 sakavika.
Tym časam supolnaść biełaruskich śpiecyjalistaŭ pa mientalnym zdaroŭi, jakija znachodziacca za miežami krainy, vypuściła zajavu ŭ suviazi ź pieraśledam kaleh.
Sama Jaŭhienija Tačyckaja — u biaśpiecy, «Naša Niva» navat ź joj źviazałasia. Ale jana, jak i inšyja datyčnyja da spravy Mačuliščaŭ, pakul ničoha nie havoryć.
Raniej ustupili ŭ siłu źmieny ŭ zakon «Ab psichałahičnaj dapamozie». Zaraz siłavikam jašče praściej atrymać infarmacyju, jakaja składaje prafiesijnuju tajamnicu.
Supolnaść psichołahaŭ i psichaterapieŭtaŭ zajaŭlaje, što hetyja źmieny parušajuć bazavy pryncyp kanfidencyjnaści psichaterapii: «Važna paznačyć niedapuščalnaść asobnych pałažeńniaŭ biahučaj viersii zakona. Bolš za toje, my ličym, što takim čynam ułady dyskredytujuć našu prafiesiju samu pa sabie. Kanfidencyjnaść — asnova dla raźvićcia daviernych adnosin pamiž śpiecyjalistam i klijentam, jaje parušeńnie viadzie da zhubnych i škodnych dla mientalnaha zdaroŭja asobnaha čałavieka i hramadstva ŭ cełym nastupstvaŭ: pavieličeńnia tryvožnaści, ahresiŭnaści, kanfliktnaści i niedavieru, paharšeńnia kryminahiennaj abstanoŭki, naprykład, bolšaj kolkaści bytavych złačynstvaŭ, a taksama da suicydaŭ».
«Naša Niva» — bastyjon biełaruščyny
PADTRYMAĆŽycharcy Mahilova pahražajuć kryminałkaj za toje, što źniała ranišniuju čarhu ŭ rehistraturu3
Kamientary
Ludzi, biažycie adsiul. Tut nikoli nie budzie svabody, bo kraina nie naležyć biełarusam