Lehiendarny astranaŭt Baz Ołdryn ažaniŭsia ŭ svoj 93-i dzień naradžeńnia

On my 93rd birthday & the day I will also be honored by Living Legends of Aviation I am pleased to announce that my longtime love Dr. Anca Faur & I have tied the knot.We were joined in holy matrimony in a small private ceremony in Los Angeles & are as excited as eloping teenagers pic.twitter.com/VwMP4W30Tn

— Dr. Buzz Aldrin (@TheRealBuzz) January 21, 2023

«U moj 93-j dzień naradžeńnia […] ja rady paviedamić, što majo daŭniaje kachańnie, Anka Faur, i ja pažanilisia. My źviazali siabie śviatymi vuzami šlubu na nievialikaj pryvatnaj cyrymonii ŭ Łos-Andželesie, i my ŭschvalavanyja, jak padletki, jakija ŭciakli ad baćkoŭ», — havorycca ŭ paviedamleńni, apublikavanym u tvitary Baza Ołdryna.

Dla byłoha astranaŭta heta čaćviorty šlub, niaviesta małodšaja za jaho na 30 hadoŭ.

63-hadovaja Anka Faur z 2019 hoda pracuje ŭ kampanii Buzz Aldrin Ventures LLC. Na hety momant jana zajmaje pasadu vice-prezidenta kampanii.

U Ołdryna troje dziaciej ad pieršaha šlubu.

Baz Ołdryn — adziny z udzielnikaŭ pieršaj u śviecie paśpiachovaj misii pa vysadcy na Miesiac Apałon-11 (Apollo-11).

Try amierykanskija astranaŭty — Nił Armstranh (kamandzir karabla), Majkł Kolinz (piłot asnoŭnaha błoka) i Ołdryn, jaki byŭ u hetaj misii piłotam miesiacovaha adsieka, — vysadzilisia na Miesiac 20 lipienia 1969 hoda. Kali śviet adznačaŭ 50-hodździe misii, u žyvych byli dvoje ŭdzielnikaŭ — Ołdryn i Majkł Kolinz.

Ołdryn — paśladoŭnik preśviteryjanskaj carkvy. Paśla vysadki na Miesiac, tak jak jon byŭ starejšynam u carkvie, to pravioŭ karotkaje nabaženstva. Jak astranaŭt patłumačyŭ tady, jon chacieŭ uźnieści padziaku Bohu «najbolš prydatnym sposabam».

U 2002 hodzie Ołdrynu ŭdałosia paźbiehnuć sudovaha pieraśledu pa abvinavačvańni ŭ napadzie paśla taho, jak były astranaŭt udaryŭ u skivicu čałavieka, jaki patrabavaŭ, kab Ołdryn pad zapis na kamieru paklaŭsia na Biblii ŭ tym, što vysadka na Miesiac nie była pastanoŭkaj. Čałaviekam, jaki atrymaŭ kułakom pa tvary ad Ołdryna, byŭ scenaryst Bart Sibreł, prychilnik teoryi zmovy, jaki byŭ pierakanany, što vysadki na miesiac nasamreč nie było, a kadry, što tranślavalisia na ŭvieś śviet, byli źniatyja na kinastudyi.

Baz Ołdryn zaviaršyŭ karjeru ŭ NASA ŭ 1971 hodzie, paśla čaho ŭznačaliŭ Škołu lotčykaŭ-vyprabavalnikaŭ VPS ZŠA na bazie Edvards (štat Kalifornija). U 1972 hodzie jon syšoŭ u adstaŭku.

• 31
• 0
• 5
• 0
• 6
• 2
• 6
• 0