Sała — plus 21%, bulba — minus 30%. Jak za hod źmianilisia ceny?
Pavodle infarmacyi Nacyjanalnaha statystyčnaha kamiteta, inflacyja ŭ Biełarusi za 2022 hod skłała 12,8%. «Naša Niva» pahladzieła, jak za hod źmianilisia ceny na niekatoryja vidy tavaraŭ.
Harodnina
U śniežni 2021 hoda kiłahram bulby ŭ siarednim pa krainie kaštavaŭ 1 rubiel 37 kapiejek. Praz hod cana ŭpała da 96 kapiejek. Atrymlivajecca, što za hod bulba zhubiła ŭ canie kala 30%.
Jašče bolš značna źniziłasia cana na biełakačannuju kapustu: 79 kapiejek suprać 1,82 rubla ŭ śniežni 2021 hoda. Minus 56%.
Taksama zaŭvažna patańnieli buraki z 1,35 rubla da 91 kapiejki, abo amal minus 32%.
A voś śviežyja ahurki i pamidory, naadvarot, prybavili ŭ canie. Pamidory za hod padaraželi na 37% — z 5,25 rubla za kiłahram da 7,19 rubla, a śviežyja ahurki na 20% — z 6,71 rubla da 8,02.
Kava z cukram
Kiłahram kavy prybaviŭ za hod amal 30%.
U śniežni 2021 hoda kiłahram kavy ŭ siarednim pa krainie kaštavaŭ 34,41 rubla. U śniežni 2022-ha — 44,31 rubla.
Čaj čorny bajchavy prybaviŭ za hod 35% — z 40,20 rubla za kiłahram da 54,33.
Cukar u śniežni 2021-ha kaštavaŭ 1,7 rubla za kiło. Za hod jaho cana vyrasła da 2,55 rubla — plus 50% za hod.
Sała, miasa, kaŭbasa
Kiłahram sała ŭ śniežni 2021 hoda ŭ siarednim pradavaŭsia pa 13,70 rubla. U kancy 2022 hoda cana vyrasła da 16,60 rubla (plus 21%).
Śvinina (častka biez kości) padaražeła na 15% — z 12,46 rubla za kiłahram da 14,36 rubla.
Jałavičyna (častka biez kości) prybaviła ŭ canie 14% u paraŭnańni sa śniežniem 2021 hoda. 19,06 rubla za kiło suprać 16,73 hodam raniej.
Varanaja kaŭbasa padaražeła na 12% — z 8,18 da 9,26 rubla za kiłahram.
Ałkahol
Harełka za minuły hod padaražeła na 14% z 17,24 da 19,65 rubla za litr.
Ihrystaje vino prybaviła ŭ canie amal 25%.
Žavalnaja humka stała kaštavać bolš na amal 23%.
Adzieńnie
Zhodna z aficyjnymi danymi, mužčynskija džynsy ŭ śniežni 2022 hoda ŭ siarednim pa krainie kaštavali 80,68 rubla, hodam raniej — 69,93. Hadavy pryrost u canie kala 15%.
Pryblizna na stolki ž padaraželi žanočyja kurtki — sa 146,57 rubla da 167,59 za adzinku. Heta kala 14%.
Amal na 20 pracentaŭ stali daražejšyja biusthaltary — 36,46 rubla ŭ śniežni 2022-ha suprać 30,60 rubla hodam raniej.
Srodki dla myćcia
Srodak dla myćcia posudu prybaviŭ 50% da cany śniežnia 2021 hoda. U siarednim jon kaštuje 10,77 rubla za litr suprać 7,14 hodam raniej.
Haspadarčaje myła padaražeła na 23% — z 3,13 da 3,85 rubla za kavałak masaj 400 hram.
Čytajcie taksama: Roźničny handal u 2022 hodzie ŭpaŭ na 3,7 %
U Biełarusi, jak i ŭ minułym hodzie, na pieradnavahodnija chviliny adklučyli jutub20
Kamientary