Novaja Ziełandyja zabaraniaje pradavać tytuń tym, kamu mienš za 24 hady
Parłamient Novaj Ziełandyi ŭchvaliŭ zakon, jaki zabaraniaje prodaž tytuniovych vyrabaŭ usim hramadzianam, jakija naradzilisia 1 studzienia 2009 hoda abo paźniej, paviedamlaje hazieta The Guardian. Vydańnie adznačaje, što heta pieršaja kraina, jakaja pryniała taki zakon.
Novaje pałažeńnie ŭstupić u siłu 1 studzienia 2023 hoda. Minimalny ŭzrost dla kupli cyharet budzie pastajanna pavyšacca. Tak, tym, chto praz 50 hadoŭ pasprabuje kupić cyharety, spatrebicca paśviedčańnie asoby, kab paćvierdzić, što jamu nie mienš za 63 hady.
Razam z novaj zabaronaj u siłu ŭstupiać inšyja pałažeńni, zaklikanyja źnizić spažyvańnie tytuniu. Tak, u tytuniovych vyrabach rezka źniziać kolkaść nikacinu, a cyharety stanuć pradavać u śpiecyjalizavanych kramach. Ahulnaja kolkaść tytuniovych kram skarocicca ŭ dziesiać razoŭ — z 6000 da 600. Novyja papraŭki pry hetym nie abmiažujuć prodaž viejpaŭ.
Pavodle źviestak, jakija pryvodzić The Guardian, u Novaj Ziełandyi pa stanie na listapad 2022 hoda kolkaść ludziej, jakija kurać kožny dzień, źmienšyłasia da 8% (u paraŭnańni z 9,4% letaś), što stała minimalnym značeńniem za ŭsiu historyju nazirańniaŭ. Pry hetym, jak adznačaje vydańnie, kolkaść kurcoŭ viejpaŭ vyrasła z 6,2% da 8,3%.
Ułady Novaj Ziełandyi imknucca zrabić krainu «svabodnaj ad kureńnia» da 2025 hoda.
Kamientary