Dzie atrymać psichałahičnuju dapamohu za miažoj

Litva

U Vilenskim centry psichičnaha zdaroŭja (Vasaros g., 5) pracuje klinika Samopomoch. Tam biaspłatna absłuhoŭvajuć ukraincaŭ i biełarusaŭ, što ŭciakli sa svaich krain ad vajny i represij. U «Samapomačy» akazvajuć i psichałahičnuju, i miedycynskuju dapamohu, prymajuć pacyjentaŭ u lubym uzroście i pracujuć na ŭkrainskaj i ruskaj movach.

Pracoŭny hrafik: paniadziełak-sierada — 11:00—19:00, čaćvier-piatnica — 8:00—16:00. Telefon: +37067202735.

Centr infarmacyi pa mihracyi «Ja vybiraju Litvu» daje da 10-ci biaspłatnych kansultacyj psichołaha, skarystacca imi mohuć i zamiežnyja hramadzianie, jakija žyvuć u Litvie. Kab zapisacca na kansultacyju, prosiać nakiravać elektronny list pa adrasie [email protected], koratka apisać u im vašu prablemu i nazvać najbolš zručny čas dla kansultacyi: ranica (8—12 hadzin), dzień (12—16 hadzin) ci viečar (16—19 hadzin). Paśla rehistracyi z vami źviažacca śpiecyjalist.

Kansultacyi prachodziać albo vočna pa adrasie A. Jaksto g., 12, abo dystancyjna praz płatformu Microsoft Teams. Mova kansultacyj — litoŭskaja, anhlijskaja ci ruskaja. Dakładniej možna pračytać na sajcie Centra infarmacyi pa mihracyi.

Jość u Litvie i svaje telefony davieru. Možna źviartacca na luby ź ich, bo ŭ krainie bolšaja častka nasielnictva razumieje ruskuju movu i, vierahodna, padtrymaje z vami hutarku. Ale ž jość adzin numar, pa jakim dakładna abiacajuć adkazvać pa-rusku:

• linija davieru — 880077277 (pracuje z 16 da 19 hadzin).

Polšča

Zachodniaja susiedka Biełarusi, na žal, nie daje tak šmat mahčymaściaŭ biaspłatnaj psichałahičnaj dapamohi, jak Litva. Tym nie mienš, i tut jość da kaho źviarnucca. U Polščy pracuje šmat telefonaŭ davieru, i na niekatorych ź ich abiacajuć padtrymać hutarku pa-rusku:

• 669981038 — biaspłatny ekstranny telefon Polskaha mihracyjnaha foruma, pracuje na ŭkrainskaj i ruskaj movach (pn 16—20, sr 10—14, pt 14—18);
• 225662227 — biaspłatny telefon słužby padtrymki miedycynskaha centra Damian na polskaj i ruskaj movach (aŭt 8—13, sr 17—20, pt 8—13).

Što da zvyčajnych siesij ź psichołaham, pasprabujcie źviarnucca ŭ asacyjacyju Unicorn. Tam hatovyja biaspłatna papracavać nie tolki z ukraincami, ich svajakami, ale i z usimi, kamu patrebnaja psichałahičnaja dapamoha i padtrymka ŭ kryzisnaj situacyi, źviazanaj z vajnoj. Kansultacyju možna atrymać i anłajn, i afłajn u Krakavie. Padrabiaznaści čytajcie tut.

Łatvija

U hetaj krainie taksama možna skarystacca telefonami davieru. Raźličanyja jany, pierš za ŭsio, na łatvijskuju movu, ale i razmovu pa-rusku, chutčej za ŭsio, tam padtrymajuć:

• +37167222922 i +37127722292 — telefony kryzisnaj linii centra «Skałbies»;
• +37128495847 — telefon davieru katalickaj carkvy, na jakim, jak śćviardžajuć, pracujuć duchoŭnyja siostry. Jany hatovyja pahutaryć z 9 hadzin ranicy da 9 viečara.
• 116123 — a voś pa hetym telefonie vam dakładna adkažuć i na ruskaj, i na anhlijskaj movie. Što asabliva zručna, linija pracuje kruhłasutkava.

Estonija

Ludzi, što znachodziacca ŭ Estonii i pieražyvajuć abo pieražyli kryzisnuju situacyju, mohuć pazvanić pa telefonie psichasacyjalnaj kryzisnaj padtrymki Departamienta sacyjalnaha strachavańnia 116006 (+3726147393). Kali nie žadajecie hutaryć, možna skarystacca kryzisnym čatam dla pierapiski, što znachodzicca tut. Śpiecyjalisty padtrymajuć hutarku na estonskaj, anhlijskaj i ruskaj movach.

Anłajn

Psichołahi ź Biełarusi i Ukrainy ładziać prajekt biaspłatnaj dapamohi We may help. Pa zapycie kožny, chto maje takuju patrebu, moža atrymać try darmovyja siesii ŭ psichołaha. Dla hetaha treba tolki źviazacca z prajektam praz telehram. We may help dapamahaje paciarpiełym ad vajny va Ukrainie i ad represij u Biełarusi i Rasii, a taksama vałancioram i rodnym ludziej, što pieražyli dośvied, źviazany ź pieršymi dźviuma situacyjami.

Raskažam i pra novy prajekt «Alivija», što dapamahaje žančynam, jakija cierpiać ad chatniaha hvałtu. Praz sajt prajekta možna pazvanić ci napisać u liniju davieru, dzie dapamohuć karysnaj infarmacyjaj, akažuć psichałahičnuju i pravavuju dapamohu. Prajekt pracuje dla biełarusak, jakija žyvuć u samoj krainie, a taksama ŭ Hruzii, Ukrainie, Litvie i Polščy. Haračaja linija infarmacyjnaj i psichałahičnaj dapamohi pracuje pa paniadziełkach i sieradach z 10 da 18 hadzin, linija infarmacyjnaj i pravavoj dapamohi — pa aŭtorkach i čaćviarhach z 10 da 18 hadzin. Taksama možna pisać u prajekt praz elektronnuju poštu i miesiendžary, usie kantakty znojdziecie na sajcie.

«Naša pakaleńnie ŭ lubym vypadku zastaniecca traŭmavanym». Psichołah pra žyćcio padčas represij i vajny

«U tych, chto zastaŭsia ŭ Biełarusi, svaja izalacyja. U tych, chto źjechaŭ — svaja». Lekar-psichijatr — pra emihracyju, intehracyju i samaidentyfikacyju

«U tych, chto pieražyŭ hora straty Radzimy, niama adčuvańnia budučyni». Jak harujuć biełarusy

• 2
• 0
• 0
• 0
• 0
• 0