Čyrvonamu vinu ŭdałosia toje, čaho inšym ałkaholnym napojam nie ŭdavałasia, — stvaryć sabie reputacyju «karysnaha» napoju. Alaksiej Vadavozaŭ, taksikołah i terapieŭt vyšejšaj katehoryi, tłumačyć, što tut daloka nie ŭsio adnaznačna.
Pra čyrvonaje vino možna pačuć, što jano abaraniaje ad radyjacyi, prafiłaktuje sardečna-sasudzistyja chvaroby, palapšaje stan kostak, navat pracu orhanaŭ słychu i h. d.
Vadavozaŭ tłumačyć, čamu heta pijar vytvorcaŭ i žadańnie spažyŭcoŭ vieryć hetamu. Najpierš tamu, što niemahčyma pravieści adekvatnyja daśledavańni z hetaj nahody.
«My nie možam, pa całkam zrazumiełych pryčynach, pravodzić łanhiciudnyja (doŭhija pa časie — NN) daśledavańni, chacia b na praciahu paŭhoda, hoda abo paŭtara hoda. My nie možam zrabić ekśpierymientalnuju hrupu, jakuju budziem metanakiravana paić, prosta tamu, što moža ŭźniknuć zaležnaść. Heta adkaznaść takaja, što ni adzin etyčny kamitet takoje nie dazvolić», — kaža jon.
Niadaŭna ŭ Złučanych Štatach usio-taki navažylisia na takoje interviencyjnaje daśledavańnie (kali ludzi padviarhajucca ŭmiašańniu, naprykład, pryjomam preparatu dla jaho acenki). Tam vyrašyli: staranna adbiarom ludziej, budziem sačyć za tym, kab u ich nie było ryzyk, i inšaje.
«I ludzi, jakim hetyja hrošy paabiacali, jany pabiehli ŭ pramysłovaść z prapanovaj, što, chłopcy, nam tut daduć hrošy, davajcie vy nam taksama hrošaj padkiniecie, i my dakažam, što vino karysnaje. Tamu zaviazali z hetaj historyjaj».
Tamu navukoŭcy vymušanyja abapiracca na danyja naziralnych daśledavańniaŭ. Ludziej adbirajuć, hladziać, jak jany spažyvajuć śpirtnoje i jak heta ŭpłyvaje na ich žyćcio. I tut svaje prablemy.
Ludzi zanižajuć kolkaść vypitaha, kab vyhladać lepš. A taksama — prosta nie pamiatajuć, kolki jany vypili.
«Doŭhi čas pytalisia, skažam, pra piać apošnich hadoŭ. I čałaviek ščyra adkazvaŭ, što ciapier jon nie pje zusim. Ale pierad hetym jon 20 hadoŭ hulaŭ u «prafiesijanałach». Atrymlivajecca, u jaho ŭžo źmieny ŭ arhaniźmie, źviazanyja z ałkaholem. A ŭsie kažuć, hladzicie, čałaviek nie pje, a jamu drenna, značyć, treba pić. «Pamyłku niepituščych» (pamyłka pry zbory statystyki, kali, naprykład u katehoryju «zusim niepituščych» zapisvali tych, kamu prosta nielha hetaha rabić — NN) «razmatali» tolki ŭ XXI stahodździ», — raspaviadaje jon pra składanaści daśledavańniaŭ.
Pavodle słoŭ taksikołaha, na rolu stvaralnika pratektyŭnaha efiektu čyrvonaha vina sprabavali vyciahnuć reśvieratroł (pryrodny antyaksidant i antymikrobnaje rečyva, jakoje, naprykład, jość u łupinie čyrvonaha vinahradu).
«Siońnia my možam kanstatavać, što antyaksidantnaja hipoteza pravaliłasia całkam. Nam nie treba pastaŭlać antyaksidanty zvonku, nam dastatkova taho, što ŭnutry. A kali my dadajom zvonku, to tolki horš».
Da taho ž daśledavańni takija akazvajucca skampramietavanymi. Hrošy — istotnaja reč.
«Vyśvietliłasia, što adzin z samych viadomych daśledčykaŭ reśvieratrołu padciahvaŭ vyniki da patrebnych jamu, tamu što reśvieratroł pradavaŭsia jak bijadabaŭka, jakaja abaraniaje serca, i ź im źviazvali ŭ tym liku efiekty čyrvonaha vina», — raspaviadaje Vadavozaŭ.
Jon kaža, što pratektyŭny efiekt nievialikich doz, pa daśledavańniach, padobna, sapraŭdy nazirajecca ŭ spažyŭcoŭ u peŭnym uzrostavym pramiežku — ad 40 da 60 hadoŭ.
Ale toje, što hety nievialiki efiekt vyjaŭlajecca, nie aznačaje, što treba pačynać pić.
Tamu što stanoŭčyja efiekty ad ałkaholu, navat kali jany jość, nie pierakryvajuć niehatyŭnyja.
«Moža, niejki nievialiki stanoŭčy efiekt jość, ale my dakładna viedajem, što pavialičvajecca ryzyka raźvićcia ałkaholnaj tłuščavaj chvaroby piečani, ankazachvorvańniaŭ i jašče kuča taho, što źviazana z ałkaholem. My dakładna viedajem, što hetyja zachvorvańni ź im źviazanyja. Tamu kazać pra toje, što treba pić dla zdaroŭja, z sučasnaha punktu hledžańnia, nielha», — kaža jon.
Čytajcie taksama:
Ź jakim fruktam treba być aściarožnym, kali prymaješ leki. Heta realna moža być pytańniem žyćcia
«U Jeŭropie ledź nie ad usiaho prapisvajuć paracetamoł». Čamu heta pravilna i jak zrazumieć, što para da doktara
Kali vy zmožacie prajści hety 10-siekundny test, jość šaniec, što vy pieražyviacie svaich adnahodkaŭ
Cichanoŭskaja zaklikała biełarusaŭ paźbiahać vybaraŭ i nie pratestavać27
Kamientary