Ułasny lift, dyska-pakoj i błakitnyja jełki. Jakija katedžy zdajuć u Minsku za 5—8 tysiač dalaraŭ za miesiac
«Idealna padydzie dla raźmiaščeńnia pasolstva», — rekłamuje adna z abjaŭ. Pahladzieli, jakija katedžy pa staŭkach ad 5 000 dalaraŭ za miesiac pražyvańnia zdajuć u stalicy i pryharadzie.
Dom ź liftam
Samy darahi z prapanavanych katedžaŭ dla doŭhaterminovaj arendy znachodzicca ŭ Tarasavie. Kožny miesiac za pryžyvańnie ŭ 4-paviarchovym domie ź liftam daviadziecca vykładać ažno 8 000 dalaraŭ!
Dom z ahulnaj płoščaj 690 m² całkam hatovy dla kamfortnaha pražyvańnia, u im jość čatyry spalni, try harderobnyja pakoi z ubudavanymi sistemami zachoŭvańnia, try sanvuzły, pralnia i trenažornaja zała, abstalavanaja trenažorami NordicTrack. Aŭtamabili taho, chto budzie hatovy vydatkavać 8000 dalaraŭ za miesiac arendy žylla, buduć stajać u haražy z aciapleńniem.
«Vydatnaje raźmiaščeńnie ŭ ekałahična čystym rajonie ŭ elitnym i kamfortnym pasiołku Tarasava. Vykanany dyzajnierski ramont z premijalnych jakasnych materyjałaŭ, mebla italjanskaj vytvorčaści z zakaznych pazicyj, ubudavanaja technika i santechnika premium-kłasa», — havorycca ŭ apisańni abjekta.
Pa pierymietry ŭčastka pamieram 15 sotak viadziecca videanazirańnie, jakoje praciahnie pracavać navat u vypadku adklučeńnia elektryčnaści ŭ rajonie, pakolki dom abstalavany krynicaj bieśpierabojnaha avaryjnaha zabieśpiačeńnia na 6 kVt.
Aproč hetaha, dom abstalavany sistemaj kandycyjanavańnia i ŭvilhatnieńnia pavietra, jość svaja śvidravina z artezijanskaj vadoj.
Kali niekamu vielmi spadabajecca žyć u hetym domie, to jon zmoža jaho nabyć. Cana na biahučy momant nie paznačanaja, ale viadoma, što ŭ mai prasili amal 1,4 miljona dalaraŭ. Pa stanie na kaniec viasny, hety dom zamykaŭ trojku samych darahich katedžaŭ Biełarusi z vystaŭlenych tady na prodaž.
Dyska-pakoj na cokalnym paviersie
Usiaho na dalar tańniej prosiać za miesiac pražyvańnia ŭ Drazdach. Pa staŭcy 7 999 dalaraŭ za miesiac možna arendavać dom z ahulnaj płoščaj 487 m².
U apisańni da abjekta paznačana, što dom i 10 sotak ziamli znachodziacca ŭ adnym z samych prestyžnych rajonaŭ stalicy, u krokavaj dastupnaści ad vadaschovišča i lesaparku «Drazdy».
Dom taksama całkam hatovy da zasialeńnia i pražyvańnia. Ramont u im vykanany ŭ kłasičnym styli. Na pieršym paviersie raźmiaščajecca vialikaja kuchnia-stałovaja z vychadam na terasu, haścioŭnia z kaminam, kabiniet i SPA-zona z basiejnam i saŭnaj, haściavy pakoj z sanvuzłom.
Na druhim paviersie mieściacca try spalnyja pakoi, dva sanvuzły i vanny pakoj. Na cokalnym paviersie jość dyska-pakoj.
Usia mebla i santechnika italjanskaj vytvorčaści premium-siehmienta, kuchonnaja technika Smeg, saŭna Klafs. U domie ŭstalavanaja sistema filtracyi i źmiakčeńnia vady, videanazirańnie, sihnalizacyja, jość vialiki haraž. Terytoryja vakoł doma vybrukavanaja naturalnym kamieniem, vykanany łandšaftny dyzajn, havorycca ŭ apisańni.
Bałkony ź vidam na vadaschovišča
Treci pa darahaviźnie arendny dom taksama znachodzicca ŭ Drazdach. Za miesiac arendy haspadary chočuć atrymlivać ad arandataraŭ 6 500 dalaraŭ.
Ahulnaja płošča doma 474,4 m². Mieścicca jon na ŭčastku pamieram 24 sotki. Katedž znachodzicca bliziutka ad lesu i Śvisłačy. Lubavacca vadaschoviščam možna naŭprost z adnaho ź vialikich bałkonaŭ.
«Usia mebla i santechnika italjanskaj i niamieckaj vytvorčaści premium-siehmienta. Jość asobny pakoj z džakuzi, biljardnaja. Terytoryja vakoł doma aformlena z dapamohaj łandšaftnaha dyzajniera», — havorycca ŭ apisańni.
Pamiaškańnie dla spartyŭnaj zały
Jašče na paŭtary tysiačy dalaraŭ tańniej zdajuć dom u centralnaj častcy Drazdoŭ. Za arendu doma płoščaj 390 m² haspadary prosiać 5 000 dalaraŭ za miesiac.
U apisańni da abjekta paznačana, što ŭ domie čatyry spalni, prastornaja haścioŭnia z kuchniaj, kaminam i terasaj. Jość usia nieabchodnaja bytavaja technika. Na cokalnym paviersie mieścicca pamiaškańnie dla spartyŭnaj zały. Taksama jość ciopły haraž dla aŭto.
«Idealna padydzie dla raźmiaščeńnia pasolstva»
Jašče adzin katedž za 5 000 dalaraŭ za miesiac zdajuć u trecim zavułku Mažajskaha. Ahulnaja płošča doma składaje 600 m². Na terytoryi doma jość džakuzi, basiejn, zona dla adpačynku i saŭna. Na ŭčastku płoščaj 13 sotak raźmiaščajecca krytaja altanka z zonaj dla barbiekiu i vychadam u skvier. Majecca haraž na dva aŭto.
Dom zdajecca ŭ arendu biez techniki i mebli, tamu zapłacić 5 000 dalaraŭ i adrazu zasialicca nie atrymajecca.
U apisańni pradaviec paznačaje, što hety dom padydzie nie tolki dla kamfortnaha pražyvańnia vialikaj siamji, ale i dla raźmiaščeńnia pasolstva, pryvatnaj škoły abo dziciačaha sadka, viadzieńnia biznesu i h.d.
«Prapanavany varyjant — cudoŭnaja mahčymaść žyć, pracavać i adpačyvać u cichim miescy, ale pry hetym znachodzicca ŭ centry vialikaha horada», — dadaje aŭtar abjavy.
Mebla i technika pa žadańni arandatara
Zamykaje piaciorku lidaraŭ siarod samych darahich arendnych katedžaŭ stalicy dom pa vulicy Padolskaj. Jak i ŭ dvuch papiarednich varyjantach, haspadary doma žadajuć atrymlivać ad arandataraŭ pa 5 000 dalaraŭ štomiesiac.
Ahulnaja płošča doma składaje 312 m², pamier učastka — 10 sotak.
«Vysoki płot pa ŭsim pierymietry, dahledžany hazon, altanka, błakitnyja jełki. U domie try žyłyja ŭzroŭni i cokalny pavierch, na jakim mieścicca basiejn daŭžynioj 13 mietraŭ, pakoj dla adpačynku, dušavyja i kacielnia», — paznačana ŭ apisańni.
Na ŭvieś dom jość piać sanvuzłoŭ. U kožnym ź ich i dušavaja kabina, i vanna. Taksama na kožnym paviersie ŭstalavanyja videadamafony i kandycyjaniery.
Za vyklučeńniem kuchni, dom zdajecca biez techniki i mebli, ale, jak paznačana ŭ abjavie, haspadar doma pa žadańni najmalnika moža daŭkamplektavać pakoi nieabchodnaj meblaj i bytavoj technikaj.
Nastupny pa darahaviźnie arendny dom u Minsku prapanujuć pa staŭcy 4 500 dalaraŭ za miesiac. Ahułam u stalicy zdajuć u arendu vosiem katedžaŭ pa staŭcy vyšej za 3 000 dalaraŭ.
Čytajcie taksama:
Što adbyvajecca z cenami na rynku arendy žylla
Kulturnyja susiedzi i dyvan na ścianie. Kolki kaštujuć i jak vyhladajuć samyja tannyja kvatery ŭ stalicy?
Pa jakich cenach pradajuć kvatery ŭ staličnych novabudoŭlach? Voś dzie samyja tannyja varyjanty
«Lilit, vy śviatło jaho žyćcia». Ranicaj 1 studzienia minčuk zrabiŭ prapanovu svajoj dziaŭčynie ŭ samalocie «Biełavija» na vyšyni 10 tysiač mietraŭ3131
Kamientary