69-hadovuju piensijanierku ź Mioraŭ sudziać u zakrytym režymie. Jaje trymali amal hod za kratami
U sudzie Miorskaha rajona 10 listapada ŭ zakrytym režymie pačaŭsia sud nad 69-hadovaj byłoj nastaŭnicaj biełaruskaj movy i litaratury ź Mijoraŭ Emaj Ściepulonak. Piensijanierku ŭtrymlivali za kratami amal hod. U siaredzinie vieraśnia žančynie źmianili mieru strymańnia i pieraviali na chatni aryšt.
Emu Ściepulonak zatrymali 29 vieraśnia 2021 hoda ŭ miežach kryminalnaj spravy, zaviedzienaj za kamientary ŭ internecie paśla hibieli supracoŭnika KDB Dźmitryja Fiedasiuka i it-śpiecyjalista Andreja Zielcera, piša «Viasna».
Pieršyja dva miesiacy žančynu ŭtrymlivali ŭ žodzinskaj turmie №8, a potym pieraviali ŭ viciebski SIZA №2. Niahledziačy na toje, što ŭ Žodzina fihuranty «spravy Zielcera» znachodzilisia ŭ niečałaviečych umovach, Ściepulonak u listach pisała, što ŭ Viciebsku da jaje stavilisia jašče horš. Joj navat nie akazvali miedycynskuju dapamohu.
Žančyna nie maje ŭ Biełarusi ani svajakoŭ, ani siabroŭ, ale nieabyjakavyja ludzi nie pakinuli jaje sam-nasam z represijami, tamu ŭvieś čas dapamahali joj. Za čas u źniavoleńni ŭ jaje pahoršyłasia zdaroŭje i sapsavaŭsia zrok. U siaredzinie vieraśnia žančynie źmianili mieru strymańnia i pieraviali na chatni aryšt. 7 listapada Ema Antonaŭna adznačyła 69-hodździe doma.
Spačatku paviedamlałasia, što jaje vinavaciać pavodle artykułaŭ 369 i 130 Kryminalnaha kodeksa, ale ciapier jaje sudziać za abrazu Łukašenki (artykuł 368 Kryminalnaha kodeksa) i za abrazu pradstaŭnika ŭłady (artykuł 369 Kryminalnaha kodeksa).
Sudovy praces pačaŭsia 10 listapada ŭ sudzie Miorskaha rajona. Spravu piensijanierki ŭ zakrytym režymie razhladaje sudździa Iryna Jaskievič.
Jak vyhladaje 46-hadovy juryst Juraś Ziankovič praz try z pałovaj hady źniavoleńnia ŭ biełaruskaj turmie13
Kamientary