U Viciebsku 7 listapada źbirajucca ŭračysta adkryć biust Lenina
Bietonny biust 1969 hoda vyrabu źjavicca kala palikliniki №4, jakaja nosić imia Lenina. Kaliści padobny art-abjekt tut užo byŭ, ale vielmi daŭno, unačy z 4 na 5 žniŭnia 1994-ha hoda jaho paškodzili nieviadomyja asoby. Adnaŭlać biust nie stali, a voś bolš jak praz 25 hadoŭ miascovyja ŭłady vyrašyli, što Lenin na hetym miescy budzie vielmi aktualny, piša «Viciebskaja viasna».
Zamienić paškodžany biust vielmi padobnaja da jaho skulptura. Jaje źbirajucca «pierasialić» z byłoj terytoryi RAUSa Kastryčnickaha rajona. Tam bietonny biust Lenina stajaŭ va ŭnutranym dvary, admiežavany ad minakoŭ vysokim płotam i kalučym drotam.
Ciapier ža, kali rajadździeł milicyi pierajechaŭ u novy budynak na vulicy Cieraškovaj, byłyja «milicejskija» pamiaškańni vystaŭlenyja na prodaž amal za 3 miljony rubloŭ — heta ceły kompleks histaryčnaj zabudovy vulicy Suvorava (byłoj Uzhorskaj). Košt biusta Lenina ŭ acenačnuju vartaść kompleksu nie ŭvajšoŭ: skulpturu addali na restaŭracyju.
Toje, što heta nie tvor mastactva, a «štampoŭka» — typovaja dla savieckich časoŭ vyjava Lenina, ciapierašnija ŭłady nikolki nie biantežyć. 7 listapada, da čarhovych uhodkaŭ Kastryčnickaj revalucyi, biust Lenina płanujuć adkryć va ŭračystaj abstanoŭcy z abaviazkovym udziełam členaŭ kamunistyčnaj partyi, BRSM i «Biełaj Rusi».
Jak paśla kanca śvietu. Ahrasiadzibu ŭ Salihorskim rajonie zaniesła ziamloj3
Kamientary