Ułady patłumačyli, jak uzhadniać novyja ceny, daaceńvać reštki tavaraŭ i kaho heta nie zakranaje

Jak zrazumieć, ci adnosicca tavar, jaki vy pradajacie, da rehulavanych spažyvieckich?

Kali tavar uklučany ŭ pieralik da pastanovy №713, ceny na jaho rehulucca pa novych praviłach, kali nie, to nie.

Pry ŭźniknieńni pytańniaŭ pa adniasieńni tavaraŭ da pieraliku, MARH rekamienduje kiravacca ŭ sukupnaści pastanovaj ministerstva ad 5 červienia 2018 h. №46 «Ab ustanaŭleńni pieraliku tavaraŭ roźničnaha i aptovaha handlu i form apaviaščeńniaŭ» i pastanovaj Nacyjanalnaha statystyčnaha kamiteta ad 28 žniŭnia 2020 h. №76 «Ab zaćviardžeńni statystyčnaha kłasifikatara SK 33.004-2020 «Tavary roźničnaha handlu».

U vypadku, kali ajčynny abo impartny tavar moža być adniesieny ŭ adpaviednaści ź lubym z hetych dakumientaŭ da hrupy, padhrupy, kłasu, katehoryi, padkatehoryi, padvidu tavaraŭ, ceny na jakija rehulujucca pastanovaj №713, to taki tavar adnosicca da katehoryi rehulavanych.

Što adnosicca da byłych va ŭžyvańni tavaraŭ? Ci adnosiacca da hetaj katehoryi adnoŭlenyja tavary?

Da byłych va ŭžyvańni niecharčovych tavaraŭ adnosiacca tyja, jakija majuć bačnyja prykmiety našeńnia, myćcia, ekspłuatacyi, niecharčovyja tavary naležnaj jakaści biez etykietak, kali ich najaŭnaść praduhledžana vytvorcam, i rečy, pryniatyja pa dahavorach kamisii ad hramadzian.

Vuzły i ahrehaty transpartnych srodkaŭ, jakija majuć prykmiety ekspłuatacyi (znosu), u tym liku adnoŭlenyja ruchaviki, adnosiacca da tavaraŭ, byłych va ŭžyvańni, na jakija nie raspaŭsiudžvajecca dziejańnie pastanovy №713.

Jak akruhlać canu tavaru ŭ vypadku, kali pry akruhleńni pamier nadbaŭki pieravyšaje ŭzrovień, paznačany ŭ pastanovie №713?

Akruhleńnie cany na tavar, u dačynieńni da jakoha jość limit maksimalnaj nadbaŭki imparciora, aptovaj nadbaŭki, handlovaj i inšyj nadbaŭki, pavinna ažyćciaŭlacca z ulikam abmiežavańniaŭ, ustanoŭlenych zakanadaŭstvam, šlacham akruhleńnia ŭ mienšy bok da 1 biełaruskaj kapiejki.

Jak uzhadniać ceny na tavary, u tym liku novyja?

Uzhadnieńnie adpusknoj cany na tavary rehłamientuje pastanova MARH ad 21 kastryčnika 2022 h. №64 «Ab zaćviardžeńni rehłamientaŭ administracyjnych pracedur u halinie cenaŭtvareńnia».

U adras dziaržaŭnych orhanaŭ treba padać nastupnyja dakumienty i źviestki:

— zajavu ab uzhadnieńni pavyšeńnia (ustanaŭleńnia) adpusknoj cany na tavary pa formie zhodna z dadatkam 1 da pastanovy №64;

— płanavuju kalkulacyju pa raźliku adpusknoj cany na tavary;

— markietynhavy analiz (u vypadku pavyšeńnia adpusknoj cany) pa formie zhodna z dadatkam 2 da pastanovy №64.

Dziaržaŭnyja orhany abo stvoranyja imi kamisii na praciahu dvuch rabočych dzion z dnia pryniaćcia rašeńnia ab uzhadnieńni adpusknych cen infarmujuć ab im MARH.

Ci raspaŭsiudžvajucca patrabavańni pastanovy №713 na tavary, nie nazvanyja ŭ dadatku 1 da jaje?

Punkt 14 pastanovy №713 raspaŭsiudžvajecca na ŭsie tavary biez vyklučeńnia. Inšyja patrabavańni prymianiajucca tolki ŭ dačynieńni da tavaraŭ, nazvanych u dadatku 1 da pastanovy.

Jak pravodzić daacenku reštkaŭ tavaraŭ u roźničnym handli da ŭzroŭniu adpusknych cen na novyja takija ž tavary?

Praviły prapisany ŭ mietadyčnych rekamiendacyjach, zaćvierdžanych zahadam MARH ad 10 červienia 2021 h. №130.

Pieraacenka (daacenka abo ŭcenka) tavaraŭ pravodzicca na padstavie rasparadžeńnia kiraŭnika, u jakim pryvodziacca pryčyna pieraacenki, najmieńnie tavaraŭ abo tavarnych hrup, skład kamisii, termin praviadzieńnia pieraacenki, termin zdačy materyjałaŭ pa pieraacency ŭ buchhałteryju, a taksama inšaja nieabchodnaja infarmacyja.

Pry praviadzieńni pieraacenki na padstavie narmatyŭnych pravavych aktaŭ u rasparadžeńni kiraŭnika na praviadzieńnie pieraacenki metazhodna ŭkazvać spasyłku na taki narmatyŭny pravavy akt.

Praviadzieńnie pieraacenki arhanizacyja roźničnaha handlu afarmlaje pieršasnym ulikovym dakumientam, u jakim pakazvajucca infarmacyja ab tavary (najmieńnie, kolkaść i inšaje); staraja i novaja cana; košt tavaru ŭ starych i novych cenach; suma daacenki (pry pavyšeńni cen) abo ŭcenki (pry źnižeńni cen). Jaho forma raspracoŭvajecca i zaćviardžajecca arhanizacyjaj.

Padstavaj dla praviadzieńnia daacenki reštkaŭ tavaraŭ da ŭzroŭniu cen na novy asartymient takich tavaraŭ źjaŭlajucca TTN-1 i TN-2 pastaŭščyka na tavary, jakija pastupili pa novych cenach. Sumy roźnicy ŭ cenach adnosiacca na vyniki haspadarčaj dziejnaści.

Daacenka tavaraŭ moža być tolki pry pastupleńni toj ža raznavidnaści tavaru. Pastupleńnie tavaru na adras arhanizacyi roźničnaha handlu abo ŭ adno ź jaje strukturnych padraździaleńniaŭ źjaŭlajecca padstavaj, jakaja daje prava na daacenku reštkaŭ tavaraŭ u cełym pa arhanizacyi.

Arhanizacyja roźničnaha handlu maje prava nie źmianiać roźničnuju canu reštkaŭ takich tavaraŭ, pavialičyŭšy abo tolki źniziŭšy canu nabyćcia buchhałtarskimi zapisami: D-t 41-2 — K-t 90-7 i D-t 90-10 — K-t 41-2.

Daviadzieńnie ŭ takim vypadku novaj cany nabyćcia da raniejšaj roźničnaj cany ažyćciaŭlajecca šlacham karekciroŭki handlovaj nacenki mietadam «čyrvonaje storna»: D-t 41-2 — K-t 42-1.

Pry viadzieńni ŭliku tavaraŭ pa cenach nabyćcia suma daacenki adlustroŭvajecca ŭ składzie inšych dachodaŭ pa biahučaj dziejnaści (subrachunak 90-7), a suma ŭcenki — u składzie inšych raschodaŭ pa biahučaj dziejnaści (subrachunak 90-10).

Prykładnaja forma akta pieraacenki tavaraŭ pryviedziena ŭ dadatku 7 da zahada №130.

• 1
• 0
• 4
• 12
• 0
• 1
• 3
• 0