Biełaruskija navukoŭcy raspracavali novy mietad dyjahnostyki raku pa kryvi
U centry imunałohii i alerhałohii Instytuta bijafiziki i kletkavaj inžynieryi Nacyjanalnaj akademii navuk raspracavali novy mietad dyjahnostyki raku. Pra heta paviedamlaje «Biełaruś siehodnia».
Mietad dazvalaje vyznačać puchlinnyja kletki, jakija mihrujuć z kryvaciokam i ŭ zdarovaha čałavieka adsutničajuć. Pa słovach navukoŭcaŭ, jon bolš za ŭsio padychodzić dla prahnazavańnia chvaroby, a taksama kantrolu efiektyŭnaści lačeńnia.
Užo kala 500 žycharoŭ krainy vyprabavali hetuju mietodyku, raskazaŭ dyrektar Instytuta bijafiziki i kletkavaj inžynieryi NAN Andrej Hančaroŭ:
«Hetaja mietodyka nie dla navukovych, a dla absalutna praktyčnych metaŭ. Naprykład, pralačyŭsia čałaviek, praź niekatory čas u jaho ŭbačyli najaŭnaść cyrkulujučych puchlinnych kletak i vynieśli vierdykt: ci jość vierahodnaść prahresavańnia ankachvaroby ŭ najbližejšy čas».
Pavodle słoŭ śpiecyjalista, infarmacyja, atrymanaja takim mietadam, pavinna dapamahčy pry vyznačeńni dalejšaj taktyki lačeńnia. Praŭda, jość niuansy.
«Kali puchlinnyja kletki ŭ kryvi vyjavili, to pacyjent adnaznačna chvory. Ale byvaje, što ŭ arhaniźmie, da prykładu, šmat mikrapuchlin pa 2 mm i jany nie vydzialajuć pakul dastatkovaj kolkaści puchlinnych kletak», — rastłumačyŭ Hančaroŭ.
Mienavita tamu pakul hety mietad nie buduć vykarystoŭvać dla masavaha skryninhu — «jość vialikaja ryzyka prapuścić chvarobu». «Zatoje dla kantrolu efiektyŭnaści lačeńnia mietad idealny, — reziumavaŭ Hančaroŭ.
Ciapier ekśpiertyzu prachodzić jašče adzin prajekt Instytuta, sutnaść jakoha — pošuk u kryvi mikraRNK. Hetyja malekuły pakazvajuć na najaŭnaść puchlin u arhaniźmie, i dla kožnaha typu navatvoru jany śpiecyfičnyja.
Dyjahnostyka pa hetym mietadzie najlepš padydzie dla prahnazavańnia zychodu zachvorvańnia i kantrolu efiektyŭnaści lačeńnia. Taksama heta dadatkovy mietad skryninhu dla vyznačeńnia puchliny.
Kamientary