Washington Post: Pucin asabista adchiliŭ piarečańni FSB i zahadaŭ abmianiać azoŭcaŭ na Miedźviedčuka
Abmien pałonnymi pamiž Rasijaj i Ukrainaj u kancy vieraśnia byŭ uchvaleny prezidentam Rasii Uładzimiram Pucinym nasupierak piarečańniam FSB, jakaja była zaniepakojenaja hramadskaj reakcyjaj u Rasii, piša vydańnie Washington Post pa słovach vysokapastaŭlenych ukrainskich i amierykanskich čynoŭnikaŭ, znajomych z pytańniem.
![](http://d3kcf2pe5t7rrb.cloudfront.net/img/w840d4webp1/photos/z_2022_09/-lwhwh.jpg.webp)
Nienazvanyja krynicy raspaviali vydańniu, što Uładzimir Pucin nie prysłuchaŭsia da papiaredžańnia svajho koła ab tym, što abmien 215 pałonnych, siarod jakich 10 zamiežnikaŭ i piać kamandziraŭ z «Azoŭstali», na Viktara Miedźviedčuka i 55 rasiejcaŭ vykliča niehatyŭnuju reakcyju siarod prychilnikaŭ rasijskaha prezidenta.
«FSB była kateharyčna suprać», — skazaŭ vysokapastaŭleny ŭkrainski čynoŭnik na ŭmovach ananimnaści. «Jany ŭśviedamlali nastupstvy taho, jak ździełka budzie vyhladać dla hramadskaści».
Kali abmien adbyŭsia 22 vieraśnia, prezident Ukrainy Uładzimir Zialenski nazvaŭ jaho «pieramohaj našaj dziaržavy», u toj čas jak Kreml padvierhnuŭsia žorstkaj krytycy z boku ultrapatryjotaŭ.
«Heta horš, čym złačynstva… i horš, čym pamyłka. Heta — nieprachodnaje hłupstva. Abo — adkrytaje škodnictva. Zrabić heta chacia b za paru dzion da ŭkaza prezidenta da mabilizacyi, vidać, nielha było….
Viedajecie, jak heta vyhladaje? A tak: vyjšli da naroda, zaklikali «pastajać za ziamlu ruskuju», a potym… a potym tym, chto adhuknuŭsia, nasrali prosta na hałavu. Adkryta, hłumliva, sa śmiaškami i prymaŭkami.
Nijak inakš asabista ja takuju «miratvorčaść» u dzień abviaščeńnia mabilizacyi ŭsprymać nie mahu», — napisaŭ były ministr abarony «DNR» Ihar Hirkin.
«Pakazalna, što Pucin vyrašyŭ abmianiać svajho nabližanaha i adnaho sa svaich daŭnich davieranych asob va Ukrainie Miedźviedčuka na hierojaŭ Maryupala. Va Ukrainie vielmi mnohija radavalisia, što viarnuli dadomu doblesnych voinaŭ, a ŭ Maskvie vielmi mnohija z ahidaj ubačyli, što dla Pucina sapraŭdy važna«, — skazała haziecie adna z amierykanskich krynic.
U artykule taksama zaznačajecca, što siarod pasiarednikaŭ na pieramovach byŭ rasijski aliharch Raman Abramovič.
Kamientary