Z 29 žniŭnia ŭkrainskija vojski pierajšli ŭ kontrnastupleńnie.
Heta pieršy taki maštabny kontrnastup Ukrainy z pačatku poŭnamaštabnaha rasijskaha ŭvarvańnia.
Ukraincy nie śpiašajucca dzialicca padrabiaznaściami nakont svaich nastupalnych dziejańniaŭ. Aficyjnaje vajskovaje kiraŭnictva paprasiła ekśpiertaŭ i ahladalnikaŭ nie śpiašacca z acenkami i atrymlivać acenku vyklučna z ruk Hienštaba.
«Nam praktyčna ničoha nie viadoma pra tyja dziejańni, što tam adbyvajucca, tamu što kali adbyvajucca bajavyja dziejańni, u nas nichto ŭ režymie anłajn nie kamunikuje. Tak pavinna być pa praviłach vajny», — kaža ŭkrainski vajskovy ahladalnik Stanisłaŭ Biazuška.
Najlepšym čynam pra pośpiech ci adsutnaść pośpiechu śviedčać źviestki Hienieralnaha štaba pa stratach praciŭnika, adznačaje jon.
«My apošnija dva dni bačym vialiki pryrost, asabliva ŭ technicy, jakuju my źniščyli na poli boju».
«My bačym minimum try kirunki, na jakich adbyvajucca aktyŭnyja bajavyja dziejańni. Heta zaparožski, iziumski, chiersonski kirunak. Kazać, što mienavita na chiersonskim kirunku adbyvajecca kontrnastupleńnie, napeŭna, zaraz budzie krychu niekarektna, i treba čakać, kali Hienštab abvieścić tyja ci inšyja danyja», — dadaje jon.
U rasijskich krynicach infarmacyi krychu bolš. Rasijanie, viadoma, śćviardžajuć, što ŭvarvańnie pravaliłasia, ale navat pa hetych prapahandysckich paviedamleńniach možna zrabić vysnovy, što situacyja dla rasijan ciažkaja. Ministerstva abarony Rasii zajaviła, što ŭkrainskija siły nibyta panieśli značnyja straty, i što «sproba nastupu praciŭnika z treskam pravaliłasia». Ukraina śćviardžaje, što prarvała pieršuju liniju abarony Rasii vakoł Chiersona.
Viartańnie Chiersona mieła b vialikaje stratehičnaje i simvaličnaje značeńnie. Vyzvaleńnie Chiersona zrabiła b niemahčymaj dla Rasii akupacyju Adesy. Heta taksama aznačała b parazu Rasii, jakuju Kramlu było b ciažka schavać.
Dla abarony Chiersona Rasija ŭžo była vymušanaja pierakinuć vojski z Danbasa. Chacia heta i ŭskładniła nastup Ukrainy na Chierson, ale nie zrabiła jaho niemahčymym.
Ukraina prymianiaje niezvyčajnuju vajennuju taktyku padčas nastupleńnia. Na terytoryi Chiersonskaj vobłaści razhornuta kala 30 tysiač rasijskich vajskoŭcaŭ. Zamiest taho, kab iści na ich šyrokim frontam u łob, ukraincy robiać staŭku na dezarhanizacyju rasijskaha vojska, rujnujučy ich łancužki pastavak i šlachi adstupleńnia z dapamohaj kropkavych udaraŭ rakietami, artyleryjaj i bieśpiłotnikami. Hety padychod dazvalaje paźbiehnuć rujnavańnia cyvilnych abjektaŭ.
Padrychtoŭka Ukrainy da nastupu pačałasia bolš za dva miesiacy tamu z dakładnaj sieryi rakietnych, artyleryjskich udaraŭ i ŭdaraŭ bieśpiłotnikami pa rasijskich linijach zabieśpiačeńnia i vajskovaj infrastruktury. Niekatoryja z hetych udaraŭ byli ŭ tyle, u Krymie. Udary pa Antonaŭskim moście ŭ Chiersonie i pa moście ŭ Novaj Kachoŭcy pavialičyli ŭraźlivaść rasijskich pastavak.
Taksama paśpiachovaje nastupleńnie, vidavočna, pavysić maralny duch Ukrainy i pakaža zachodnim sajuźnikam, što srodki i zbroja, jakija jany pastavili, byli vykarystanyja pa pryznačeńni.
Akramia taho, Maskvie chočuć pakazać, što jaje płany anieksavać Chierson i inšyja akupavanyja terytoryi praź psieŭdarefierendumy, jak heta było ŭ Krymie ŭ 2014 hodzie, asudžanyja na pravał.
Navat kali ŭsie vajennyja mety nie buduć dasiahnutyja, Ukraina, jakaja tak doŭha znachodziłasia ŭ abaronie, pavysić svoj maralny duch.
Taksama Ukraina choča viarnuć sabie horad da asieńnich daždžoŭ, bo ŭvosień, ź jaje hraźziu i bolš chałodnym nadvorjem, nastupać budzie składaniej. Taksama ŭkraincy razumiejuć, što zachodniaja padtrymka moža skaracicca pa miery enierhietyčnaha kryzisu ŭ Jeŭropie, tamu treba śpiašacca.
Jašče nielha skazać, što pośpiech Ukrainy harantavany. Ukrainskija siły ŭsie apošnija hady rychtavalisia da mahčymaha rasijskaha ŭvarvańnia, ale u ich byŭ vielmi abmiežavany vopyt praviadzieńnia šyrokamaštabnych nastupalnych dziejańniaŭ. Armii taksama nie chapaje ciažkaha zachodniaha ŭzbrajeńnia.
Rasijskija vojski pačali akopvacca ŭ abarončych pazicyjach vakoł Chiersona, jakija budzie ciažka ŭziać. Rasija pa-raniejšamu maje istotnuju pieravahu ŭ artyleryi.
Pierałomny momant moža nastupić, kali ŭkrainskija vojski akružać tysiačy rasijskich vajskoŭcaŭ na pravym bierazie Dniapra. Ukraincy zrujnavali składy i šlachi adychodu rasijan. Mahčymaść katła ŭ hetym miescy ŭžo nie vyhladaje takoj fantastyčnaj.
Ci mahčyma, što rasijanie znoŭ pojduć na «žest dobraj voli» i vyvieduć svaje vojski sami z Chiersona, jak raniej jany heta zrabili z poŭnačy Ukrainy?
Stanisłaŭ Biazuška dumaje, što nie. Bai buduć biaźlitasnyja.
«Ja dumaju, što rasijanie ŭžo nie buduć rabić takich «žestaŭ dobraj voli», uličvajučy, što jany ściahnuli i padmacavańnie, i 3-ci armiejski korpus prybyŭ. Vychad z Kijeŭščyny, Žytomirščyny, Sumščyny i Čarnihaŭščyny jany jašče mahli niejak patłumačyć, vychad z vostrava Źmiainy tearetyčna taksama, a voś z poŭdniem Ukrainy ŭ ich tak lohka nie vyjdzie.
Kali apieracyja pačałasia dva dni tamu, my bačyli padarvanyja masty, my bačyli vybuchi, jość śviedčańni ŭkraincaŭ. Rasijanie vyrašyli bicca i pamirać tam. Jany nie chočuć biehčy. U ich zaraz važnaje rašeńnie budzie, kudy i jak pierakidać reziervy», — adznačaje publicyst.
Taksama pačała źjaŭlacca infarmacyja, što Rasija nie zmahła razharnuć na pieradavoj dastatkovuju kolkaść padraździaleńniaŭ.
Mnohija ź isnujučych rasijskich padraździaleńniaŭ, jakija Rasija arhanizuje ŭ bajavyja taktyčnyja hrupy, razhornutyja ŭ niapoŭnym składzie, niekatoryja navat u dva razy mienšyja ad ich zvyčajnaj kolkaści.
Heta paćviardžaje i ŭkrainski publicyst.
«U ich niekamplekt kłasičnych bataljonna-taktyčnych hrup i jany zaraz faktyčna vajujuć bataljonami. Časta my bačym, što jany pierachodziać uvohule da dziejańniaŭ asobnymi rotami ci navat uzvodami, pakolki nie mohuć paŭnavartasna zabiaśpiečyć udzieł u bajavych dziejańniach bataljonna-taktyčnych hrup.
Taksama ŭžo niekalki miesiacaŭ paviedamlajecca, što jany padciahvajuć bolš staruju techniku, tamu što novaja, «sučasnaja, najlepšaja, efiektyŭnaja», «anałohov niet», jak jany zajaŭlajuć, była albo źniščana, albo paškodžana, albo zachoplena ŭkraincami».
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu55
Kamientary