Kamiera 1 na 3 mietry, prahułak niama, za aknom pacuki. U jakich umovach trymajuć za kratami Mikałaja Statkieviča
Žonka Mikałaja Statkieviča Maryna Adamovič padrabiazna raskazała «Radyjo Svaboda» pra toje, u jakich umovach ciapier utrymlivajecca ŭ kałonii ŭ Hłybokim jaje muž.
«Vymova, potym ŠYZA, paśla pazbavili pieradačy»
«Listoŭ ad Mikałaja nie było bolš za miesiac, praktyčna paŭtara, — raskazvaje žonka Statkieviča Maryna Adamovič. — Jon spačatku znachodziŭsia ŭ štrafnym izalatary, a paśla litaralna za niekalki dzion jamu vynieśli siem, zdajecca, spahnańniaŭ. Vymova była, potym ŠIZA pieršy raz, paśla jaho pazbavili adzinaj na hod charčovaj pieradačy. Paśla spatkańnia pazbavili, zatym jašče dva razy ŠIZA. Vielmi ščyrujuć. Mikałaj piša, što vielmi chacieli b jaho «spłavić» u krytuju turmu z kałonii».
Pa słovach Maryny Adamovič, z hetym mohuć być prablemy, bo Kryminalna-vykanaŭčy kodeks nie praduhledžvaje pieravodu z kałonii asablivaha režymu ŭ turmu. Mikałaj Statkievič i tak znachodzicca ŭ kamiery, i navat nieviadoma, dzie jon budzie mieć horšyja ŭmovy ŭtrymańnia. U vypadku pieravodu ŭ krytuju turmu Mikałaj Statkievič moh by trapić u Hrodna. Maryna Adamovič miarkuje, što trymać takoha «surjoznaha złačyncu» pobač z centralnaj płoščaj adnaho z samych pratesnych haradoŭ Biełarusi ŭładam niavyhadna.
«Mikoła dla ich razdražnialnik, — kaža Maryna. — Jon prahnazuje, što naleta značna pahoršycca ekanamičnaje stanovišča, heta niepaźbiežna».
Paśla pieravodu ŭ hłybockuju kałoniju Mikałaj Statkievič patrabavaŭ źmiaścić jaho ŭ adzinočnuju kamieru ŭ jakaści miery biaśpieki ad pahroz, jakija mohuć iści z boku administracyi. U «adzinočcy» Statkievič prabyŭ bolšuju častku ŭtrymańnia ŭ SIZA. U vyniku ŭ Hłybokim palitviazień budzie znachodzicca ŭ adzinočnaj kamiery ŭ vyhladzie pakarańnia. Administracyja rasparadziłasia pakinuć Statkieviča tam na nastupnyja šeść miesiacaŭ.
«Kamiera maje try narmalnyja kroki ŭ daŭžyniu, jak piša Mikoła, i mietr u šyryniu, — raskazvaje Maryna Adamovič. — Jość nary, jakija pryšpilvajucca da ściany ŭdzień. Jość akno, jano znachodzicca na ŭzroŭni ziamli. Paŭpadvalnaje pamiaškańnie takoje. Ale možna, dziakuj bohu, pisać listy».
«Źjaviłasia svaja «haspadarka»
Paśla pieravodu ŭ adzinočku Statkieviču vydali ŭsie numary «SB» i «Arhumientov i faktov», jakija naźbiralisia pa jaho padpiscy z červienia. Pa słovach Maryny Adamovič, palityk byŭ «ačmureŭšy absalutna» ad usich navin, jakija pračytaŭ za try dni. Statkievič iranizuje, što hazieta dla piensijanieraŭ na tle «SB» vyhladaje viaršyniaj žurnalistyki.
«Mikoła piša, što ŭžo adaptavaŭsia da małych pamieraŭ svajoj kamiery, u jaho ž šklanka zaŭsiody napałovu poŭnaja, — kaža Maryna Adamovič. — Piša, što zatoje ŭsio pad rukoj. Na prahułki jaho adtul nie vyvodziać. Chacia paŭhadziny prahułki ŭ dzień jamu abaviazanyja pradastaŭlać. Matyvujuć tym, što prahułačnyja dvoryki ramantujucca. Usie adrazu, ja tak padazraju. To Mikoła, kab kampiensavać adsutnaść fizičnaj nahruzki, dźvie hadziny na dzień chodzić pa svajoj kamiery. Nu i jašče jon źmianiŭ strukturu svaich štodzionnych fizičnych praktykavańniaŭ. Bo ŭ takoj kamiery, šyrynioj mietr, navat machnuć rukoj prablematyčna. Piša, što musiŭ prydumać novyja praktykavańni».
Z zabavaŭ u Mikoły Statkieviča ciapier jość hulni z pacukami, ich jon jaskrava apisvaje ŭ listach da žonki. Pacuki prychodziać da akna kamiery Statkieviča i čakajuć ad jaho pačastunkaŭ. «Haspadarka» palitviaźnia naličvaje ŭžo cełuju pacučynuju siamju.
«Źjaviłasia svaja «haspadarka», — piša Mikoła ŭ liście da Maryny Adamovič. — Uvachod u akonnuju nišu z boku hałoŭnaj pacučynaj mahistrali ciapier vielmi lohki. I spačatku pa ježu naviedvaŭsia adzin toŭsty i važny pacuk, jaki, nie pavitaŭšysia i nie paprasiŭšy, prosta praviaraŭ, ci pakłaŭ ja jamu što-niebudź za kraty. Nie dačakaŭšysia i kab kazyrnaje miesca nie prapadała, hety pacuk pryvioŭ tudy dzievačku. Zalacańni skončylisia skandałam, i da mianie stała naviedvacca tolki hetaja dzievačka — achajnaja, ź biełymi bakami i čornaj śpinaj. Jana i vitałasia, i prasiłasia, ale ja trymaŭsia, pakul taja nie pryviała z saboj svajo dziciatka. Pryjšłosia paddacca hetaj cyničnaj manipulacyi. Ciapier jany prychodziać pastajanna».
Praduktovaja pieradača tolki praz hod
Pa słovach Maryny Adamovič, u svajoj nievialikaj kamiery Mikałaj Statkievič budzie znachodzicca jak minimum paŭhoda, bo jon nie źbirajecca admaŭlacca ad svaich patrabavańniaŭ. Statkievič nie choča adbyvać pakarańnie ŭ ahulnaj kamiery, bo nie daviaraje administracyjam kałonij i turmaŭ.
Listy ad niesvajakoŭ da Statkieviča praktyčna pierastali prychodzić z momantu pačatku vajny va Ukrainie. U Hłybokim jon nie atrymaŭ pakul nivodnaha takoha paviedamleńnia. Statkievič adśviatkavaŭ tam svoj dzień naradžeńnia, adnak žoncy nie viadoma ničoha pra toje, kab jon atrymaŭ ad niekaha vinšavańni. Maryna Adamovič kaža, što pisać palitviaźniam treba praciahvać, sprabavać słać zakaznyja listy, pisać skarhi, kali ich nie buduć pieradavać adrasatam.
«U mianie ciapier nie budzie mahčymaści zrabić charčovuju pieradaču dla Mikoły, — kaža Maryna Adamovič. — U jaho, pavodle režymu, adna takaja pieradača na hod. Jość jašče rečavaja, jakoj nie mohuć pazbavić. Jana naležyć lubomu viaźniu, niezaležna ad režymu. Bližej da chaładoŭ ja pasprabuju jamu pieradać ciopłyja rečy za kraty. Vopratku, srodki hihijeny. Cyharety nielha tolki, bo heta ŭžo ŭ charčovuju pieradaču ŭvachodzić. Ale Mikoła nie kuryć, a ŭ adzinočcy kamu jon ich budzie mianiać?»
Maryna Adamovič taksama dadaje, što Mikałaj maje mahčymaść atavarvacca na adnu bazavuju vieličyniu ŭ miesiac (32 rubli. — RS). U žniŭni jon kupiŭ sabie na hetyja hrošy krychu cybuli, aleju i sušanaj zielaniny.
Mikałaja Statkieviča zatrymali 30 traŭnia 2020 hoda, kali jon razam z žonkaj Marynaj jechaŭ u centr Minska, dzie adbyvaŭsia zbor podpisaŭ za vyłučeńnie kandydataŭ na vybarach 9 žniŭnia 2020 hoda. 14 śniežnia 2021 hoda sudździa Mikałaj Dola asudziŭ Statkieviča na 14 hadoŭ pazbaŭleńnia voli ŭ kałonii asablivaha režymu.
Napisać Statkieviču možna na adras: PK № 13, 211791, Hłybokaje, vulica Savieckaja, 205, Statkieviču Mikałaju Viktaraviču.
Čytajcie taksama:
Mikoła Statkievič: Pacučynaja «haspadarka» ŭvieś čas sprabuje vyraści
2025 hod moža stać dla Biełarusi hodam pieramien, jakich biełarusy bajalisia2
Kamientary