«Śpiecapieracyja» padobnaja da chryščeńnia Rusi, a Pucin — da Alaksandra Nieŭskaha. U Kramli padrychtavali novuju prapahandysckuju mietadyčku

Uvarvańnie va Ukrainu ŭ mietadyčkach tłumačycca dziejańniami «kalektyŭnaha Zachadu», jaki ŭžo amal tysiaču hadoŭ napadaje na Rasiju, kab padzialić jaje i zavałodać resursami krainy, a taksama źniščyć pravasłaŭnuju vieru.

Baraćba ź biazbožnikami

U preambule apošniaj mietadyčki skazana (pavodle infarmacyi krynic «Mieduzy», blizkich da AP, kiraŭniki prapahandysckich ŚMI atrymali jaje ŭ druhoj pałovie lipienia):

«Chryščeńnie stała asnovaj umacavańnia i adzinstva ruskaj dziaržavy na sotni hadoŭ napierad. Pravasłaŭnaja viera vučyć spačuvańniu, lubovi da bližniaha, ciarpimaści da inšych. Hetyja kaštoŭnaści lahli ŭ asnovu ruskaj cyvilizacyi i dazvolili Rasii abjadnać sotni narodaŭ. Siońnia pradstaŭniki ŭsich narodaŭ Rasii znoŭ źjadnalisia ŭ supraćstajańni ź biazbožnikami i abaronie tradycyjnych kaštoŭnaściaŭ i prava svaich dziaciej žyć u adpaviednaści ź imi».

Taksama ŭ joj havorycca, što pryniaćcie pravasłaŭja dapamahło abjadnać «razroźnienyja ruskija ziemli» i stvaryć dziaržavu, vyznačalnaj kaštoŭnaściu jakoj stała «pamiarkoŭnaść».

Zatym u dakumiencie śćviardžajecca: jak i chryščeńnie Rusi, vajna va Ukrainie zakładaje «dziaržaŭnyja asnovy» krainy — a taksama «asnovy raźvićcia Rasii na stahodździ napierad». Aŭtary (jany ŭ dakumiencie nie paznačanyja) zapeŭnivajuć, što heta adbyvajecca dziakujučy «zhurtavańniu hramadstva» vakoł vojska i «stratehičnaha kursu prezidenta».

«Rasija znoŭ stała zdolnaj da vykanańnia svajoj misii — abaraniać pryhniečanych», — adznačajecca ŭ tekście.

Pry hetym u pačatku vajny Kreml prapanuje vinavacić «kalektyŭny Zachad», jaki ŭpeŭnieny va «ŭłasnaj vyklučnaści», a taksama «niepaŭnavartasnaści» pravasłaŭnych.

Ab pryčynach vajny aŭtary mietadyčki «rekamiendujuć» raskazvać tak:

«Kanflikt na Ukrainie byŭ spravakavany rukami zachodnich krain, jakija pieradavali Ukrainie ŭzbrajeńnie. Ukraina pavinna była stać płacdarmam dla napadu na Rasiju. Stratehičnaja meta kalektyŭnaha Zachadu na praciahu niekalkich stahodździaŭ u dačynieńni da Rasii nie mianiajecca — heta strymlivańnie, pasłableńnie, rasčlanieńnie i poŭnaje źniščeńni Rasii».

Adnoj z metaŭ «śpiecapieracyi» ŭ dakumiencie abviaščajecca «baraćba ź biazbožnikami», jakich u tekście charaktaryzujuć jak «hvałtaŭnikoŭ, razbojnikaŭ i zabojcaŭ», jakija «ni ŭ što nie vieryli — i ličyli, što heta vyzvalaje ich ad jakich-niebudź maralnych abaviazacielstvaŭ pierad inšymi ludźmi».

Takimi «biazbožnikami» ŭ Kramli prapanujuć nazyvać i ŭkrainskich vajskoŭcaŭ. Prapahandystam prapanavana raspaviadać, što tyja «prynosiać achviary i ździajśniajuć rytualnyja zabojstvy», a taksama vykarystoŭvajuć žančyn i dziaciej u jakaści «žyvoha ščyta» (zrešty, pra heta dziaržaŭnyja ŚMI raskazvajuć z pačatku vajny).

«Dla ukranacystaŭ nie isnuje marali, jany nie razvažajuć takimi katehoryjami i źjaŭlajucca sapraŭdnymi biazbožnikami. Jany nie bajacca za svaje złačynstvy kary Božaj. Mnohija z ukranacystaŭ — adkrytyja satanisty i paśladoŭniki čałaviekanienaviśnickich kultaŭ», — takija tezisy rajać ahučvać u Administracyi prezidenta.

Asobnyja publikacyi z takim pasyłam taksama ŭžo źjaŭlalisia ŭ prapahandystaŭ. Naprykład, «RIA Novosti» na pačatku červienia apublikavała materyjał z zahałoŭkam «Kazinaja Morda. Satanizm i akultyzm stali ideałohijaj ukrainskich nacbataŭ». 

Papieradžalny ŭdar

Jašče bolš anałohij u Kramli znachodziać pamiž vajnoj va Ukrainie i Nieŭskaj bitvaj. Hetyja tezisy pieraličanyja ŭ mietadyčcy AP, jakaja była padrychtavanaja na pačatku lipienia (u siaredzinie miesiaca tradycyjna adznačajuć hadavinu bitvy, jakaja adbyłasia ŭ 1240 hodzie).

Spačatku aŭtary dakumienta tłumačać, što «kalektyŭny Zachad» šmat stahodździaŭ sprabuje raskałoć Rasiju. Taksama ŭ mietadyčcy tłumačycca, što ž takoje «kalektyŭny Zachad». Pa viersii Kramla, u rozny čas hetym «kalektyŭnym Zachadam» byli: Teŭtonski orden, Šviecyja, Reč Paspalitaja, impieryja Napaleona, Treci rejch i NATA. Usie jany vyznavali adnu i tuju ž taktyku — nastroić suprać Rasii «narody, jakija žyvuć pablizu jaje miežaŭ».

Tut aŭtary pravodziać pramuju anałohiju z «kalektyŭnym Zachadam», jaki «napampavaŭ» Ukrainu zbrojaj — i razharnuŭ tam «sietku bijałabaratoryj». Adnak, havorycca ŭ mietadyčcy, usie ataki Zachadu zakančvajucca adnolkava: «Hramadstva abjadnoŭvajecca vakoł nacyjanalnaha lidara i, demanstrujučy mužnaść i hieraizm na poli boju, daje adpor zachopnikam».

U Kramli «rekamiendujuć» praŭładnym ŚMI i sistemnym palitykam adznačać, što heta nibyta adbyłosia i paśla pieramohi ŭ Nieŭskaj bitvie — i paśla pačatku vajny va Ukrainie (choć dakładnych danych pra heta niama).

Adzin z raździełaŭ dakumienta nazvany «Siła ŭ praŭdzie!». Hetyja słovy prypisvajuć Alaksandru Nieŭskamu, ale ŭ letapisach havorycca, što kniaź vymaviŭ pierad bitvaj zusim inšy vyraz: «Nie ŭ sile Boh, a ŭ praŭdzie» (pryčym hetaja cytata ŭ tekście Kramla taksama jość).

«Za ruskimi vajarami była praŭda — jany abaraniali svoj dom, i tamu pieramoha nie mahła nie być našaj», — pišuć aŭtary dakumienta. U punktach pra «śpiecapieracyju» pra abaronu doma ničoha nie havorycca, ale zhadvajecca, što rasijskija sałdaty taksama «upeŭnienyja ŭ svajoj racyi, tamu što jany praciahvajuć spravu svaich dziadoŭ i pradziedaŭ — dabivajuć nacyzm».

U Kramli adznačajuć, što ciapier Zachad (jak i raniej) choča źniščyć Rasiju dziela nieabchodnych jamu resursaŭ. Ale sami hetyja resursy źmianilisia, adznačajuć aŭtary mietadyčki. Kali raniej heta było samo nasielnictva, to ciapier Zachadu patrebnyja karysnyja vykapni: hramadstva spažyvańnia, jakoje skłałasia na Zachadzie, patrabuje šmat resursaŭ. Ułasnyja ž resursy ŭ Zachadu skončylisia niekalki stahodździaŭ tamu. Heta stała pryčynaj kałanijalizmu i nieakałanijalizmu. Zachad pramym tekstam kaža, što Rasija vałodaje zanadta vialikaj kolkaściu resursaŭ dla adnoj krainy, i tamu jaje treba padzialić.

Usimi hetymi arhumientami prapahandysty pavinny padvieści čytačoŭ i hledačoŭ da tezy ab tym, što vajna va Ukrainie — heta «papieradžalny ŭdar». Hety tezis užo vykarystoŭvali i praŭładnyja ŚMI, i sam Pucin.

«Kiraŭnictva Rasii i asabista Uładzimir Pucin nie dapuścili napadu na Rasiju. Było pryniataje rašeńnie ab pačatku SVA [śpiecyjalnaj vajennaj apieracyi], što dazvoliła paźbiehnuć paŭtareńnia 22 červienia 1941 hoda z uvarvańniem nacysckich vojskaŭ na terytoryju Rasii», — paraŭnoŭvajuć jany dziejańni Kramla i savieckaha kiraŭnictva (mabyć, nie na karyść apošniaha).

«Mieduza» ŭžo vyjaviła niekalki publikacyj, u jakich vykarystoŭvajucca tezisy ź mietadyčak. Tak, tekst Haziety.ru nazvany «Chryščeńnie Rusi i śpiecapieracyja na Ukrainie: što ahulnaha?». I ŭ im prysutničajuć abzacy, prosta skapijavanyja z kramloŭskaha «dapamožnika». Naprykład, havorycca, što «Rasija znoŭ stała zdolnaj da vykanańnia svajoj misii — abaraniać pryhniečanych». Raspaviadajecca ŭ im i pra baraćbu Rasii z «biazbožnikami».

Padobny tekst źjaviŭsia i na praŭładnym sajcie «FiedierałPriess». A pra padabienstva Nieŭskaj bitvy i «śpiecapieracyi» napisaŭ prakramloŭski Regnum.

Sa słoŭ dźviuch blizkich da AP krynic «Mieduzy», ciapier u Kramli sprabujuć znajści «madeli», jakija mahli b rastłumačyć rasijanam pryčyny i mety ŭvarvańnia va Ukrainu. «Čym bolš doŭžycca apieracyja, tym bolš pytańniaŭ u ludziej: a navošta heta naohuł adbyvajecca? Jakija mety?» — tłumačyć adzin z surazmoŭcaŭ «Mieduzy». Mietadyčki z pryviazkaj da historyi — adna sa sprob takoha tłumačeńnia.

Krynicy «Mieduzy» nie vyklučyli, što padobnyja dakumienty ź instrukcyjami pra inšyja histaryčnyja padziei buduć źjaŭlacca i dalej: «Intryhi kalektyŭnaha Zachadu možna vyjavić usiudy».

• 2
• 0
• 8
• 24
• 1
• 1
• 16
• 0