53 ukrainskija pałonnyja zahinuli pry vybuchu ŭ baraku za 10 km ad linii frontu. Pry hetym nie zahinuŭ nivodzin kanvair
Siońnia ranicaj vybuch zdaryŭsia ŭ baraku z ukrainskimi vajennapałonnymi ŭ Alenaŭcy na Danbasie. Pałonnych «azoŭcaŭ» pryvieźli ŭ hety anhar za 10 km ad linii frontu, choć zvyčajna vyvoziać u hłyboki tył. Ukraincy zajaŭlajuć, što ŭdar insceniravała Rasija i što mieła miesca adno z samych strašnych vajennych złačynstvaŭ za ŭvieś čas vajny.
Paviedamlajecca pra 53 zahinułych i bolš za 70 paranienych. Pry hetym nie zahinuŭ nivodzin kanvair. Paviedamlajecca tolki, što 8 achoŭnikaŭ byli paranienyja.
Vybuch zdaryŭsia prykładna a 2-j hadzinie nočy.
Ukrainski bok zajaŭlaje, što mieła miesca vajennaje złačynstva: abstreł ci padryŭ byŭ ažyćcioŭleny rasijskimi vojskami, ale zajaŭlena, što ŭdar nanieśli ŭkrainskija vojski.
Naziralniki źviartajuć uvahu, što ŭ Alenaŭcy pałonnych niby naŭmysna trymali ŭsiaho za 10 km ad linii frontu, tady jak zvyčajna ich vyvoziać uhłyb zaniataj terytoryi.
Rasijski bok nastojvaje na tym, što ŭdar pa Alenaŭcy, dzie ŭtrymlivalisia taksama bajcy «Azova», uziatyja ŭ pałon u Maryupali, naniesła ŭkrainskaja armija z RSZA HIMARS.
Rasija zajaŭlaje, što ŭdar byŭ naniesieny pa «SIZA ŭ Alenaŭcy», ale na fota i videa — pamiaškańnie, jakoje nie vyhladaje jak SIZA, padzieleny na asobnyja kamiery. Havorka pra niejki vialiki anhar ci barak ź vialikimi voknami.
Rasijskija ŚMI, jakija zvyčajna abo zusim nie paviedamlajuć pra ŭdary ŭkrainskaj artyleryi, abo dajuć skupuju infarmacyju, siońnia poŭnyja repartažaŭ z Alenaŭki.
Pa ich słovach, USU «prycelna bili pa barakach, dzie ŭtrymlivajucca pałonnyja ŭkrainskija vajskoŭcy». Maŭlaŭ, USU ŭdaryli pa kałonii, kab zabić pałonnych, jakija «pačali davać pakazańni».
«Ukrainskaja praŭda» sa spasyłkaj na krynicy ŭ Hałoŭnym upraŭleńni raźviedki Minabarony Ukrainy zaznačaje, što byli zafiksavanyja ŭdary rasijan u bok Alenaŭki, a pałonnych azoŭcaŭ pieraviali ŭ hety budynak za niekalki dzion da abstrełu. «Heta byŭ barak, u jakim byli bajcy «Azova», ich pieraviali ŭ jaho za niekalki dzion da abstrełu, my jašče nie mahli zrazumieć, čamu», — skazali krynicy va ŭkrainskaj raźviedcy.
Daradca Ofisa prezidenta Ukrainy Michaił Padalak nazvaŭ abstreł turmy ŭ Alenaŭcy samaj cyničnaj pravakacyjaj rasijan.
Voś što jon skazaŭ:
«Biezumoŭna, maje miesca staranna spłanavany ŭdar pa kałonii, naniesieny rasijskimi vojskami. U Alenaŭcy niama apieratyŭnych vajennych celaŭ dla ŭkrainskaj armii. Bolš za toje, našy ŭzbrojenyja siły majuć usie instrumienty dla dakładnaj identyfikacyi abjektaŭ, jakija pavinny być źniščanyja: składoŭ snaradaŭ, apieratyŭna-taktyčnych štaboŭ, paliŭnych baz.
Maštab i chutkaść infarmacyjnaj kampanii z boku rasijskich prapahandystaŭ pakazvajuć na toje, što heta była jak raz spłanavanaja i arhanizavanaja akcyja. My viedajem, što častku pałonnych abaroncaŭ pieraviali ŭ barak, u jaki adbyłosia papadańnie, za niekalki dzion da złačynstva. Kłasičnaja, cyničnaja i vielmi pradumanaja false flag operation.
Meta «alenaŭskaha złačynstva» — schavać usio bolšuju kolkaść śviedčańniaŭ ab maštabach rasijskich vajennych złačynstvaŭ i katavańniaŭ, sarvać damoŭlenaści pa abmienach, dyskredytavać USU i (u hetym vypadku) kankretnyja madeli zamiežnaj reaktyŭnaj zbroi, jakaja navodzić žach na rasijskich akupantaŭ.
Dakładnaść USU dakazanaja šmatlikimi padpalenymi rasijskimi składami, łahistyčnymi punktami, kamandnymi centrami i mastami ŭ Chiersonie. Usio, što źniščaje Ukraina, aŭtamatyčna paćviardžajecca roznymi fiksujučymi instrumientami.
Rasijskija isteryčnyja zajavy na apiaredžańnie, što ŭdar byŭ naniesieny pa pałonnych ukrainskich abaroncach, patrebnyja dla taho, kab stvaryć rezanans va Ukrainie i nastroić nasielnictva roznych krain suprać našych Uzbrojenych sił. Matyŭ zrazumieły. Asoby zahinułych budzie vyznačać ukrainskaja raźviedka i śpiecsłužby.
U lubym vypadku, maje miesca naŭmysnaje, cyničnaje, pradumanaje masavaje zabojstva rasijanami ŭkrainskich pałonnych hramadzian, jakoje budzie rasśledavacca ofisam Hienieralnaha prakurora i mižnarodnymi śledčymi hrupami. Vidavočna, što pa miery taktyčnych paražeńniaŭ Rasija budzie źviartacca da novych ludažerskich pravakacyj, kab pramatavać ich na hłabalnyja rynki. Patrabujem nieadkładnaj i žorstkaj reakcyi AAN i inšych mižnarodnych arhanizacyj — Rasiju varta vyklučyć ź lubych mižnarodnych instytutaŭ», — zajaviŭ Michaił Padalak.
Rasijskaja prapahanda nadavała šmat uvahi bajcam «Azova», malavała ich złačyncami.
U Biełaruskaj pravasłaŭnaj carkvie abnavili ceńnik? Voś jakija buduć rekamiendavanyja taryfy1
Kamientary