Psichołahi kažuć, što płač dapamahaje psichicy spraŭlacca z prablemami. Jon dazvalaje ludziam pieradać ciažkija emocyi, moža aktyviravać parasimpatyčnuju niervovuju sistemu, jakaja kantraluje zdolnaść čałavieka rassłablacca, i, što samaje hałoŭnaje, dapamahaje nam znajści padtrymku i zbudavać novyja suviazi.
U ciažkija časy ludzi płačuć čaściej. Kali my znachodzimsia pad upłyvam stałaha stresu, pakutujem ad niedachopu snu, turbujemsia pra budučyniu ci pieražyvajem adzinotu, usio heta moža prymusić ciahnucca pa papiarovuju chustačku, piša Wall Street Journal.
Ale ž nie ŭsiakija ślozy karysnyja. Prafiesar Ed Vinhierchajts z Tyłburhskaha ŭniviersiteta ŭ Niderłandach, jaki vyvučaje płač užo 30 hadoŭ, daśledavaŭ razam z kalehami ludziej ažno z 35 krain, kab sprabavać zrazumieć, kali ślozy prynosiać karyść. Vyśvietliłasia, što ludzi adčuvali siabie lepiej paśla płača, kali niechta reahavaŭ na ich ślozy pa-dobramu i akazvaŭ im padtrymku. Taksama lepšyja vyniki byvajuć, kali płakać praź niešta, što možna kantralavać, naprykład, praz kanflikt z kachanym.
Jašče maje značeńnie toje, jak vy adčuvali siabie da płaču: tyja, chto pakutuje na depresiju, nie tak časta adčuvajuć palohku ad śloz, čym tyja, chto zvyčajna znachodzicca ŭ dobrym nastroi. Heta moža być źviazana z tym, što kali ludzi časta płačuć, inšyja časam pačynajuć ich ihnaravać.
Dyk što varta ŭličvać, kab pravilna płakać? Voś parady ad ekśpiertaŭ.
Znajdzicie biaśpiečnaje miesca
Łoren Biłsma, dacent psichijatryi i psichałohii ź Pitsburhskaha ŭniviersiteta ŭ ZŠA, tłumačyć heta tak: «Kali vy chočacie, kab płač byŭ karysnym, treba płakać u situacyi, kali vy adčuvajecie siabie kamfortna». Pa jaje słovach, bolšaść ludziej płačuć doma, u adzinocie ci ź inšym čałaviekam kala siabie, pamiž 7 i 10 hadzinami viečara. Vierahodna, jany mohuć adčuvać stomlenaść i takim čynam zdymać stres za dzień.
Siabar moža dapamahčy
Daśledavańni pakazvajuć, što płač moža prynosić bolšuju palohku, kali my płačam pierad inšym čałaviekam, jaki zdolny nas padtrymać. Takoj asobaj moža być blizki siabar ci ramantyčny partnior.
Kab atrymać padtrymku, možna prosta skazać inšamu čałavieku: «Mnie nie treba, kab ty vypraŭlaŭ situacyju, mnie prosta treba dobra papłakać». Niekatorym ludziam taksama dapamahajuć abdymańni ci inšy fizičny kantakt. Taki dośvied nie tolki spryjaje tamu, što vy supakoiciesia, ale i moža macniej źviazać vas z čałaviekam, jaki akazvaje padtrymku.
Ale płakać u adzinocie taksama narmalna
Mahčyma, kali vy adzin, vy adčuvajecie siabie bolš kamfortna i možacie sapraŭdy vypłakacca, što palepšyć vaš emacyjny stan. Niekatorym ludziam taksama lahčej pierapracavać svaje emocyi, kali jany znachodziacca ŭ adzinocie.
Nie saromiejciesia
Bo heta źniščyć usiu karyść ad śloz. Skancentrujciesia na tym, što vas chvaluje, a nie na vašaj reakcyi na heta.
Prafiesar Vinhierchajts tłumačyć, što, nasupierak papularnamu mierkavańniu, vašy ščyryja ślozy nie prymusiać inšych ludziej ličyć vas słabym čałaviekam. Naadvarot, na vas buduć hladzieć jak na ščyruju i nadziejnuju asobu, zdolnuju spačuvać. Mužčynam taksama varta pamiatać, što navat vialikija dziejačy nie saromielisia płakać, prykład takoj asoby — prezident ZŠA Duajt Ejzienchaŭer.
Dazvolcie sabie płakać
Razhladajcie svaje ślozy jak kłopat pra siabie. Znajdzicie zručnaje miesca, pakładzicie kala siabie survetki i padumajcie, što vas zasmučaje. Kali vam treba vypłakacca, ale ślozy nie ciakuć, vybierycie film, knihu ci muzyku, što mahli b vas rasčulić.
Dakazana: aptymisty žyvuć daŭžej. Raskazvajem, jak «prakačać» aptymizm
«Tolki dziejańnie ratuje». Spytali ŭ viadomych biełarusaŭ, jak pieražyć hetyja časy
«Tania, my z taboj!» Ułady zapuścili fłešmob u padtrymku žančyny ŭ čyrvona-zialonym VIDEA27
Kamientary