Praŭładny kanał paćvierdziŭ: stralaŭ u «Kaskadzie» sapraŭdy Andrej Paršyn
Adzin z praŭładnych telehram-kanał paćvierdziŭ infarmacyju, što ŭ žyłym kompleksie «Kaskad» u Minsku adbyłasia bojka z udziełam byłoha kiraŭnika HUBAZiK Andreja Paršyna, u vyniku jakoj adzin čałaviek atrymaŭ ahniastrelnaje ranieńnie. Tam ža byli apublikavanyja kadry ź miesca padziej.
Śćviardžajecca, što na Paršyna la padjezda napaŭ małady čałaviek pa imieni Jaŭhien Uładzimiravič D. Padkreślivajecca, što małady čałaviek «vyhladaje mocna zdaraviejšym za svaje hady», to-bok robicca sproba zatušavać toje, što jon niepaŭnaletni. Uzrost chłopca nie nazyvajecca. Na skrynšocie z fota jon vyhladaje sapraŭdy vielmi vysokim, ale heta niepaŭnahadovaści nie admianiaje i nijakim apraŭdańniem nie źjaŭlajecca.
Pa viersii tielehram-kanała, ź Jaŭhienam, jaki nibyta nie žychar hetaha rajona, było piaciora jaho siabroŭ, jakija «biasčynstvavali kala padjezda» i «na zaŭvahi reahavali vielmi ahresiŭna» (standartnaje abvinavačvańnie ź milicejskich pratakołaŭ, jakoje ŭžo dziasiatki hadoŭ prymianiajecca da tysiač ludziej, navat samych miakkich i intelihientnych). U Jaŭhiena pry sabie nibyta byŭ niejki łancuh (što za jon, nie ŭdakładniajecca). Taksama robicca sproba dyskredytavać Jaŭhiena praź jahonaha baćku: maŭlaŭ, toj «čatyry razy sudzimy», a «jabłyčka ad jabłyni…» Paćviardžeńnia hetamu «faktu» nijakaha niama, prapanujecca vieryć na słova.
Praŭładny kanał piša, što Paršyn sapraŭdy streliŭ u maładoha čałavieka z traŭmatyčnaha pistaleta paśla taho, jak toj «pasprabavaŭ zabrać zbroju». Jak śćviardžajecca, jahonamu zdaroŭju ničoha nie pahražaje — streł byŭ u «miakkija tkanki», kulu vyniali pincetam i chłopiec užo amal zdarovy.
Na kadrach, apublikavanych u kanale, jość dva momanty: nibyta momant napadu i sproba zabrać u Paršyna zbroju. Videa niama: vierahodna, tamu, što na im Paršyn vyhladaje daloka nie takim niespraviadliva pakryŭdžanym rycaram, jakim jaho chočuć pradstavić. Ci budzie hramadstvu dadziena jakaja-niebudź dadatkovaja infarmacyja i kamientaryj z sapraŭdy aficyjnych krynic — pabačym.
Čytajcie taksama:
Stała viadoma, z čaho Paršyn moh stralać pa padletku
«Žyvu ŭ svabodnaj krainie»: padletak pasadziŭ na ziamlu eks-kiraŭnika HUBAZiKa. Toj u adkaz pačaŭ stralać PADRABIAZNAŚCI
Stralanina pa padletku ŭ «Kaskadzie»: što viadoma?
«Kali ty nie ŭ hetym śpisie, to budzieš u druhim». Jak u Biełarusi źbirajuć podpisy za Łukašenku13
Kamientary