Siońnia pačynajecca sud nad Andrejem Kuźniečykam. Jamu pahražaje da siami hadoŭ kałonii
Siońnia pačynajecca čarhovy sud nad žurnalistami. U Mahiloŭskim abłasnym sudzie adbudzieca zakryty praces nad fryłansieram Svabody Andrejem Kuźniečykam. Jaho abvinavačvajuć u «stvareńni ekstremisckaha farmavańnia» (art. 361-1 KK), jamu pahražaje da 7 hadoŭ pazbaŭleńnia voli, paviedamlaje Radyjo Svaboda.
Zatrymali Andreja Kuźniečyka 25 listapada 2021 hodu, kali jon vyjšaŭ uviečary z kvatery pakatacca na rovary. Viarnuŭsia dadomu ŭ supravadžeńni čatyroch siłavikoŭ. U kvatery zładzili pieratrus, zabrali arhtechniku, zapatrabavali parol ad telehram-kanału Radyjo Svaboda.
Dzieci Andreja i Alesi — vaśmihadovaja Janina i dvuchhadovy Maćviej — byli śviedkami zatrymańnia taty.
Trojčy Kuźniečyku davali pa 10 sutak. 23 śniežnia 2021 hoda stała viadoma, što na Kuźniečyka zaviali kryminalnuju spravu i pieraviali jaho ŭ SIZA № 1 na Vaładarskaha.
Za niekalki dzion da zatrymańnia Andrej raskazaŭ svajmu siabru, čamu jon zastaŭsia ŭ Biełarusi, niahledziačy na niebiaśpieku. Hetyja 5 tłumačeńniaŭ jon paprasiŭ apublikavać, kali zatrymańnie ŭsio ž adbudziecca.
«Ja z 13 hadoŭ žyvu biełaruščynaj, pastupiŭ na fiłfak dziela jaje, žyŭ i pracavaŭ z aryjentacyjaj na jaje, ciapier mnie za 40, ale sprava nie ŭ tym, što pozna pačynać z nula, sprava ŭ tym, što ja nie chaču zbočvać sa ściežki pracy na karyść biełaruščyny.
U ciapierašnich umovach mnie zdajecca mienšaj pakutaj adbyć u viaźnicy prydumany termin, čym raźvitacca z radzimaj na niapeŭny (až da skonu) čas (choć tut ja mahu fatalna pamylacca ŭ tym, nakolki daloka mohuć zajści represii).
Ja liču, što dzieci, uzhadavaŭšysia ŭ niebiełaruskim asiarodździ, stanuć nośbitami kaštoŭnaściaŭ hetaha asiarodździa, a Biełaruś — adzinaje miesca na Ziamli, dzie hetaje asiarodździe my majem, možam stvarać i raźličvać na jaho.
Ja baču, što susiednija krainy stvarajuć svoj histaryčny mif na padmurku, časam adroznym i navat supiarečnym biełaruskamu.
Ja baču, što pierad susiednimi ź Biełaruśsiu krainami stajać vykliki, jakija mohuć zapatrabavać nie mienšaj achviarnaści, čym ciapierašniaja situacyja patrabuje ad biełarusaŭ siońnia».
Andreju Kuźniečyku 43 hady, rodam jon ź Viciebska, vučyŭsia ŭ Licei BDU, potym skončyŭ fiłalahičny fakultet BDU i aśpiranturu. Pracavaŭ stylredaktaram u «Komsomolskoj pravdie» v Biełarusi», u «Našaj Nivie», fryłansieram na Radyjo Svaboda.
Andrej Kuźniečyk — zaŭziaty ravaryst, amatar-vałancior OpenStreetMap. Z 2007 hodu vioŭ svoj paziytyŭny biełaruskamoŭny błoh, u jakim prapahandavaŭ jazdu na rovary. U im jon publikavaŭ seryju dopisaŭ «Karotki pravadnik pa minskich rovarnych stajankach» i «Karotki pravadnik pa minskich vieładarožkach», davaŭ parady, prapanoŭvaŭ pisać zvaroty miascovym uładam nakont uładkavańnia rovarnaha ruchu. Andrej stvaryŭ padrabiaznuju kartu biezbarjernych rovarnych maršrutaŭ, a taksama sam prakładaŭ maršruty ŭ Google Maps.
Paštoŭka, jakuju Andrej dasłaŭ z-za krataŭ
U turmie Andrej pačaŭ składać dziciačyja vieršy. Žonka Alesia dasyłaje jamu čystyja paštoŭki z zabaŭnymi malunkami, a na ich Andrej u adkaz piša Janinie i Maćvieju pavučalnyja vieršyki.
25 traŭnia 2022 hoda stała viadoma, što Andreja Kuźniečyka abvinavacili ŭ «stvareńni ekstremisckaha farmavańnia» (častka 1 artykuła 361-1 KK). Pra heta paviedamiŭ pravaabarončy centar «Viasna». Jamu pahražaje da 7 hod pazbaŭleńnia voli.
Chto taja žančyna, jakuju Marzaluk u efiry BT abazvaŭ «švallu z Hrodna», i što jana piša ŭ čatach? Raskazvajem pra doktarku Stefanovič10
Kamientary