Adkryłasia virtualnaja vystava mastackich tvoraŭ, źniatych z ekspazicyi «Art-Minska»
Pracy siamnaccaci biełaruskich mastakoŭ ekspanujucca na vystavie «Stop! Źniata!», zroblenaj u padtrymku aŭtaraŭ, čyja tvorčaść była nazvanaja niepažadanaj na fiestyvali mastactva «Art-Minsk», paviedamlaje reform.by.
Inicyjataram idei virtualnaj ekspazicyi vystupiła art-mieniedžarka Ksienija Tyrsikava, uzrušanaja tym, što dziasiatki mastakoŭ stračvajuć placoŭku dla pakazu svaich pracaŭ.
Jašče 15 maja Ksienija, jakaja maje dośvied stvareńnia vystavaŭ u virtualnaj prastory, prapanavała aŭtaram, čyje tvory byli źniatyja z festyvala «Art-Minsk», dasyłać joj na skryniu ich vyjavy i apisańni. Praz try dni virtualnaja ekspazicyja «Stop! Źniata!» źjaviłasia na platformie spatial.io.
Na vystavie možna pahladzieć pracy Alaksandra Bielskaha, Maryny Baciukovaj, Volhi Kotavaj, Kiryła Chłopava, Nastaśsi Tkačovaj, Darji Lizunkovaj, Nadziei Buki, Volhi Prankievič i inšych aŭtaraŭ.
Tyrsikava adznačaje, što ŭ sacsietkach išła havorka pra značna bolšuju kolkaść imionaŭ (ad 30 da 44 mastakoŭ), čyje tvory byli zabaronienyja dla demanstracyi, i zaprašaje inšych mastakoŭ, jakim admovili ŭ placoŭcy, dałučacca da jaje prajekta.
Nahadajem, što napiaredadni adkryćcia Piataha fiestyvalu mastactva «Art-Minsk», jakoje adbyłosia 12 maja, značnuju kolkaść adabranych mastackim žury prac źniali z ekspazicyi. Pryčyna — «čornyja śpisy» tvorcaŭ: tvorčaść peŭnych «niadobranadziejnych» aŭtaraŭ nie pavinna być pradstaŭlenaja na dziaržaŭnych placoŭkach.
Kamientary