Mikałaja Aŭtuchoviča buduć sudzić pa dziesiaci artykułach Kryminalnaha kodeksa
Učora stała viadoma, što sud na Mikałajem Aŭtuchovičam pryznačany na 16 maja. Praces projdzie ŭ Hrodzienskim abłasnym sudzie. Spravu budzie razhladać sudździa Maksim Fiłataŭ, paviedamlaje «Viasna».
Usiaho pa «Spravie Aŭtuchoviča» prachodziać 12 čałaviek. Adzin ź ich — Uładzimir Hundar, jaki maje invalidnaść, 20 maja 2021 hoda asudžany pa art. 366 Kryminalnaha kodeksa (hvałt albo pahroza ŭ dačynieńni da słužbovaj asoby, jakaja vykonvaje słužbovyja abaviazki,) da troch hadoŭ pazbaŭleńnia voli ŭ kałonii ahulnaha režymu.
Pakul nie viadoma dakładna, u jakim farmacie projdzie sudovy praces — adkrytym ci zakrytym. Taksama pakul niezrazumieła, ci buduć sudzić «hrupu Aŭtuchoviča» razam.
Pa viersii śledstva, Mikałaj Aŭtuchovič i siabry arhanizavanaj hrupy ŭ noč z 1 na 2 kastryčnika 2020 hoda padrychtavali zapalnuju sumieś na asnovie aŭtamabilnaha bienzinu i inšych haručych rečyvaŭ. Paśla čaho ablili hetaj sumieśsiu i padpalili aŭtamabil Audi 80 i adnapaviarchovy žyły dom u Vaŭkavysku, jakija naležali supracoŭniku milicyi. U listapadzie 2020 hoda Mikałaj Aŭtuchovič i «inšyja ŭdzielniki złačynnaj arhanizacyi» na terytoryi Hrodzienskaha rajona vyrabili samarobnaje vybuchovaje prystasavańnie na asnovie traciłavaj šaški i nieŭstanoŭlenaha detanatara, paśla čaho na vuł. Vialikaja Alšanka ŭ Hrodnie ŭzarvali aŭtamabil Skoda Octavia, jaki naležaŭ supracoŭniku milicyi. Kryminalnaja sprava ŭ dačynieńni da inšych členaŭ «złačynnaj supołki» vydzielenaja ŭ asobnuju vytvorčaść.
Jakija artykuły śledstva inkryminuje Mikałaju Aŭtuchoviču:
č. 3 art. 285 Kryminalnaha kodeksa Respubliki Biełaruś — stvareńnie złačynnaj arhanizacyi i ŭdzieł u joj;
č. 2 art. 357 — zamach na zachop dziaržaŭnaj ułady niekanstytucyjnym šlacham;
č. 1 art. 356 — zdrada dziaržavie;
č. 3 art.130 — raspalvańnie inšaj sacyjalnaj varožaści;
č. 3 art. 361 — zakliki da mier abmiežavalnaha charaktaru (sankcyj), inšych dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś;
č. 1 art. 290-2 — zamach na ŭciahvańnie ŭ terarystyčnuju dziejnaść;
č. 3 art. 289 — akt teraryzmu i padrychtoŭka da jaho;
č. 4 art. 295 — niezakonnyja dziejańni ŭ dačynieńni da ahniastrelnaj zbroi, bojeprypasaŭ, vybuchovych rečyvaŭ i vybuchovych pryład, u tym liku padrychtoŭka da takich dziejańniaŭ;
č. 3 art. 333-1 — niezakonnaje pieramiaščeńnie praz mytnuju miažu JEAES i dziaržaŭnuju miažu Respubliki Biełaruś ahniastrelnaj zbroi, kamplektaŭ bojeprypasaŭ da jaho, vybuchovych rečyvaŭ, vybuchovych pryład;
č. 1 art. 295-3 — niezakonnyja dziejańni ŭ dačynieńni da pradmietaŭ, dziejańnie jakich zasnavanaje na vykarystańni haručych rečyvaŭ.
U roznych fihurantaŭ «spravy Aŭtuchoviča» majucca taksama i inšyja abvinavačvańni: arhanizacyja i padrychtoŭka dziejańniaŭ, jakija hruba parušajuć hramadski paradak (č. 1 art. 342) i ŭkryvalnictva ciažkaha złačynstva (č. 1 art. 405 Kryminalnaha kodeksa).
U sud pieradadzienyja spravy inšych «udzielnikaŭ terarystyčnaj hrupiroŭki»: Volhi Majoravaj, Haliny Dzierbyš, Viktara Śniehura, Paŭła Savy i siamji Razanovičaŭ (Dźmitryja, Siarhieja, Paŭła i Lubovi).
Kamientary