«Maštab lačeńnia nie adpaviadaje maštabu chvaroby». Płan kompleksnaj padtrymki ekanomiki ad Saŭmina — što ź im nie tak

Što praduhledžvaje płan:

— padtrymku ekspartu i pašyreńnie kredytavańnia eksparcioraŭ niezaležna ad rynku pastavak biełaruskaj pradukcyi;

— źnižeńnie mytnych pošlin dla impartnych tavaraŭ, nieabchodnych dla vytvorčaści na ekspart;

— mahčymaść restrukturyzacyi zapazyčanaści i vypłaty pieniaŭ pa mytnych płaciažach;

— vystrojvańnie novych transpartna-łahistyčnych łancužkoŭ dla pieranakiravańnia ekspartnych patokaŭ;

— praca z rasijskimi kalehami pa pytańniach pavieličeńnia kvot, a ŭ pierśpiektyvie admiena dazvolnaj sistemy pieravozak hruzaŭ i kabatažu dla biełaruskich aŭtapieravozčykaŭ;

— stvareńnie z Rasijskaj Fiederacyjaj sumiesnych impartazamiaščalnych vytvorčaściaŭ;

— dadatkovuju finansavuju padtrymku dla małych i siarednich pradpryjemstvaŭ, jakija buduć vypuskać pradukcyju, jakaja nie vyrablajecca ŭ Biełarusi i Rasii;

— vyzvaleńnie biznesu ad administracyjnaj adkaznaści pa vynikach pravierak za ŭpieršyniu dapuščanyja i nienaŭmysnyja parušeńni;

— pradastaŭleńnie arhanizacyjam prava na atrymańnie subsidyj z FSAN dla dapłat rabotnikam, a taksama dziaržaŭnaj adrasnaj sacyjalnaj dapamohi niekatorym katehoryjam hramadzian u vyhladzie štomiesiačnaj sacyjalnaj dapamohi zychodziačy z dachodaŭ, atrymanych za 3 miesiacy;

— hrašovyja dachody, piensii, dapamohi buduć indeksavacca da ŭzroŭniu inflacyi;

— mahčymaść nadavańnia rezidentam PVT dastupnych ilhot i prefierencyj pa anałohii ź mierami, pryniatymi ŭ Rasii, u tym liku prava na adterminoŭku ad pryzyvu na vajennuju słužbu.

Pavialičyć

Taksama ŭ dakumient uklučany miery łakalnaha charaktaru pa padtrymcy pramysłovaści, budaŭničaj haliny, sielskaj haspadarki, transpartu i turyzmu.

«Ahulnaje ŭražańnie: paškodžańnie šerahu «ŭnutranych orhanaŭ» ekanomiki sprabujuć lačyć, prytulajučy da ich vonkavyja prymočki, dy na ŭsialaki vypadak padmacoŭvajuć taki kurs lačeńnia pavialičanaj dozaj askarbinak dy aśpirynu.

Toje, što prymočak šmat, dazvalaje nazyvać płan kompleksnym. Ale heta nijak nie admianiaje taho, što maštab lačeńnia nie adpaviadaje maštabu chvaroby, — kamientuje ekanamist Beroc Dźmitryj Kruk. —

Što pry takim ahulnym dyjahnazie, tym nie mienš, vartaje ŭvahi. 

Ułady zajaŭlajuć, što chočuć praduchilić spad ekspartu. Asnoŭnym lejtmatyvam tut źjaŭlajecca žadańnie praduchilić adtok ludziej ź IT-siektaru — nie tolki na Zachad, ale i ŭ Rasiju. Dziela hetaha im abiacajuć zachavać isnujučyja lhoty i zabiaśpiečyć režym isnavańnia nie horšy za novy rasiejski (zaćvierdžany na pačatku sakavika).

Pavialičyć

Ale ci jość takija abiacanki istotnym čyńnikam dla ajcišnikaŭ — zusim inšaje pytańnie. Sumniajusia. Jak my možam bačyć pa novaj chvali adtoku śpiecyjalistaŭ, niežadańnie šmatlikich zamoŭcaŭ pracavać ź firmami ź Biełarusi, uvieś kałaryt žyćcia ŭ dyktatarskaj krainie z ekanomikaj, jakaja ŭvachodzić u pikie, čaściakom pieravažvaje.

Błok z hučnym zahałoŭkam «sadziejničańnie raźvićciu transpartna-łahistyčnych kalidoraŭ» pieravažna ni ab čym. Ź jaho možna tolki pačarpnuć, što ŭstanoŭka «pieraaryjentacyi» handlu na Uschod pačynaje daminavać u rytorycy. Ale ŭ praktyčnym płanie tut usio značna ciažej. Tamu asnoŭny mietad płanu ŭ hetaj častcy — pravieści pieramovy.

Pavialičyć

Błok «stymulavańnie impartazamiaščeńnia» — padmacavany šeraham zachadaŭ sihnał ab pierachodzie ŭ režym ekanamičnaj izalacyi i asady. I pry hetym jany, vidać, ličać, što heta dobraja navina.

Błok «stvareńnie pryvabnaha biznes-asiarodku» samy bujny pa kolkaści zachadaŭ. Ale amal usie ź ich vyhladajuć ci askarbinkami, ci ŭ lepšym vypadku aśpirynkami dla biznesu.

Pavialičyć

Šmat zachadaŭ z hetaha śpisu biznes prasiŭ pryniać daŭno. U narmalnych ekanomikach bolšaść ź ich — normy pa zmoŭčańni. Ale ŭ nas zvyčka stryhčy biznes vielmi ŭstojlivaja.

A zaraz, kali značnaja jaho častka zmahajecca za isnavańnie i patrabuje padtrymki, jamu faktyčna kažuć: «Nu ładna, niekatory čas budziem vas stryhčy mienš intensiŭna, i ŭ hetym naša vam padtrymka.»

Błok «sacyjalnaja padtrymka rabotnikaŭ» patencyjna moža stać bolš-mienš źmiastoŭnym. Tam uzhadvajucca niekatoryja istotnyja rečy, naprykład, padtrymka biespracoŭnych, indeksacyja dachodaŭ i inšaje. Ale bolšaść zachadaŭ u płanie farmulujecca tak: budzie pryniaty narmatyŭna-pravavy akt, jaki daść prava asobnym orhanam ciapierašnich uładaŭ pryniać adpaviednyja zachady. A voś ci prymuć jany ich — heta ŭžo asobnaje pytańnie. Pamiatajučy ab tym, što napaŭnieńnie biudžetu paharšajecca, a taksama što ŭłady z pahardaj staviacca da naŭprostavych zachadaŭ pa padtrymcy chatnich haspadarak (što jaskrava prademanstravała pieršaja chvala kavidu ŭ 2020 hodzie), sumniajusia, što ŭ vyniku takoha kštałtu zachady buduć zaćvierdžanyja ŭ jakim-niebudź značnym abjemie. 

U dačynieńni da chatnich haspadarak jašče asobnaj uvahi zasłuhoŭvaje punkt pra toje, kab padvysić dastupnaść tavaraŭ z-za miažy, uklučajučy pakupki ź internet-kramaŭ. Z adnaho boku, heta davoli łahičny krok dla padtrymki ludziej, jakija sutykajucca sa skaračeńniem spažyvieckaha vybaru, a toje, što dastupna, daražeje. I biahučaja situacyja moža być dobraj nahodaj kab, sama mieniej, adaptavać dadzienuju normu chacia b da standartaŭ JEEAS, častkaj jakoha Biełaruś źjaŭlajecca.

Pavialičyć

Z druhoha boku, zastajucca sumnieńni, što ŭłady na heta pojduć. Hetaje pytańnie ŭzdymałasia nieadnarazova raniej, ale zaŭsiedy znachodzilisia niejkija tłumačeńni, čamu nielha. Tamu i zaraz jość zaściarohi, što hetaja norma zastaniecca na papiery ci ŭ dačynieńni da jaje budzie znojdziena niejkaja supraćvaha». 

«Naša Niva» adnaŭlaje zbor danataŭ — padtrymać prosta

Čytajcie taksama:

Biełaruskija transpartniki raźličvajuć uzbahacicca na fonie jeŭrapiejskich sankcyj suprać pieravozčykaŭ, i heta mahčyma. Tłumačym niuansy

«Uvieś biznes prosta stanie». Što aznačajuć novyja sankcyi dla biełaruskich pieravozčykaŭ

• 1
• 0
• 2
• 9
• 1
• 1
• 1
• 0