Uładny bunkier. Jak Zialenski kiruje krainaj padčas vajny i chto ź im pobač
Majučy pierad vačyma bieź pierabolšańnia apakaliptyčnyja źviestki zachodnich śpiecsłužbaŭ, Zialenski vyrašyŭ davierycca raźlikam ułasnych śpiecyjalistaŭ i armii, jakija kazali, što Rasija nie moža ŭziać stalicu. Jon zastaŭsia ŭ Kijevie i stvaryŭ svaju staŭku ŭ sakretnym bunkiery. «Ukrainskaja praŭda» raspaviadaje pra arhanizacyju pracy Zialenskaha i jaho kamandy padčas vajny.
![](http://d3kcf2pe5t7rrb.cloudfront.net/img/w840d4webp1/photos/z_2022_04/-7pcvz.jpg.webp)
Hety sakretny abjekt zastaŭsia va Ukrainie z savieckich časoŭ i pryznačany dla vyžyvańnia ŭ jadziernaj vajnie. Ludzi, jakija tam byvali, zvyčajna nie havorać pra takija miescy. Ale jość cytata Mikałaja Azarava.
«Kali my havorym pra bunkier na terytoryi administracyi prezidenta, to jon całkam abaronieny, padrychtavany ŭ savieckija časy dla vyšejšaha palityčnaha i vajennaha kiraŭnictva dziaržavy pry jadziernaj atacy. Pramoje ŭździejańnie jadziernych bojeprypasaŭ nie pryniasie škody ludziam u bunkiery», — skazaŭ Azaraŭ rasijskim prapahandystam paśla pačatku vajny.
Taki vybar miesca pracy prezidenta bolš čym łahičny. Mienavita dla takich časoŭ dziaržava hadami padtrymlivała ŭsiu hetuju infrastrukturu. A tym, chto choča krytykavać Zialenskaha za toje, što jon nie siadzić u svaim kabiniecie, varta pahladzieć na ciapierašni stan kabinieta, skažam, mikałajeŭskaha kiraŭnika abłasnoj vajennaj administracyi Vitala Kima abo na ruiny Charkaŭskaj abłdziaržadministracyi.
![](http://d3kcf2pe5t7rrb.cloudfront.net/img/w732d4webp1/photos/z_2022_04/-owrlb.jpg.webp)
Zialenski i jaho kamanda vykarystoŭvajuć pamiaškańni Ofisa dla sustreč, intervju, bryfinhaŭ. Adnak, pavodle infarmacyi «UP», asnoŭnaja praca prachodzić u pamiaškańniach bunkiera.
Kamanda dla vajny
Z prezidentam pracuje nievialiki pastajanny puł, jaki źjaŭlajecca asnovaj jaho kamandy.
«Pobač ź Zialenskim u asnoŭnym tyja, chto byŭ ź im u Bučy paśla jaje vyzvaleńnia. Heta Jarmak, Kirył Cimašenka, Kubrakoŭ. A niedzie pobač — «błohiery», jak ich nazyvajuć, naprykład, Arastovič i Leščanka, jaki ŭ kamunikacyi z Padalakom», — kaža adzin z upłyvovych udzielnikaŭ kamandy Zialenskaha.
U cełym Zialenski aryjentavany na vyrašeńnie prablem u dźviuch asnoŭnych śfierach: mižnarodnaj i abaronnaj.
Jak pryznajucca ŭ atačeńni Zialenskaha, na ŭsio astatniaje prosta nie chapaje času. Akramia, badaj, ekanomiki.
Tamu niadziŭna, što vakoł Zialenskaha ciapier kruciacca try hrupy čynoŭnikaŭ: dypłamaty, vajskoŭcy i ekanamisty.
Dypłamatyčny napramak zakryvajuć Andrej Jarmak, jaki kamunikuje ź Biełym domam, ministr zamiežnych spraŭ Dźmitryj Kuleba, jakomu vypała rola vieści pieramovy sa śvietam, i namieśnik kiraŭnika APU Andrej Sibiha, asnoŭnyja funkcyi jakoha — padrychtoŭka dla prezidenta i jaho śpičrajtaraŭ tak zvanych «dypłamatyčnych ramak» pierad važnymi pieramovami.
![](http://d3kcf2pe5t7rrb.cloudfront.net/img/w732d4webp1/photos/z_2022_04/-hohae.jpg.webp)
Jak adzin z klučavych pieramoŭnikaŭ z Rasijaj u bunkiery časta byvaje David Arachamija, lidar frakcyi «Słuha naroda».
Chacia najbolšuju dypłamatyčnuju pracu pravodzić sam Zialenski. Jak paviedamiŭ Jarmak u intervju, u prezidenta za dzień prachodzić dziesiać raŭndaŭ pieramoŭ na vyšejšym uzroŭni. A jašče — štodzionnyja vystupy pierad parłamientami śvietu, NATA, ES ci ŭvohule na Hremi.
Vajenny błok pradstaŭlajuć ministr abarony Alaksiej Reźnikaŭ, sakratar Rady nacyjanalnaj biaśpieki i abarony Alaksiej Daniłaŭ, hałoŭnakamandujučy Uzbrojenymi siłami Ukrainy Valeryj Załužny i inšyja vajskovyja kamandziry, čyje imiony viedamstva nie afišuje sa zrazumiełych pryčynaŭ.
U ekanamičnaje kryło kamandy prezidenta ŭvachodzić premjer-ministr Dzianis Šmyhal, jaki adkazvaje za kaardynacyju i stabilizacyju ekanomiki.
Hienieracyjaj novych ekanamičnych idej u pieršuju čarhu zajmajecca hrupa ministra ekanomiki Julii Śvirydzienki i profilnaha namieśnika staršyni OPU Raścisłava Šurmy.
Akramia ich, važnuju ekanamičnuju i humanitarnuju pracu robiać Cimašenka i Kubrakoŭ. Na ich zaviazana tak šmat pracesaŭ, što ich žartam nazyvajuć «cieniavym premjeram». U pieršyja dni vajny Cimašenki nie było ŭ Kijevie, ale paźniej jon viarnuŭsia i pastupova nabraŭ abaroty, u tym liku i ŭ ŚMI.
«Na im zastałasia rehijanałka. Navat zdoleŭ pamiryć meraŭ i kiraŭnikoŭ abłdziaržadministracyj. Naprykład, mer Čarnihava ledź nie pasyłaŭ nas u žyvym efiry, a Cimašenka braŭ słuchaŭku i ŭsio roŭna praciahvaŭ ź im razmaŭlać, šukajučy niejkija rašeńni. Plus jon uvieś čas sočyć, dzie jakoha lidara hramady skrali, jak kaho abmianiać, vyrašaje pytańnie, jak niekudy tajemna pryvieźci leki i hetak dalej», — patłumačyli «UP» u atačeńni prezidenta.
Kubrakoŭ adkazvaje za łahistyku dastaŭki dapamohi i apieratyŭnaje adnaŭleńnie infrastruktury tam, dzie jana vielmi patrebnaja.
Čas ad času na Bankavuju prychodzić śpikier Rady Rusłan Stefančuk, kab udakładnić paradak dnia ź Zialenskim i Ofisam: vysłuchać patreby APU i pakazać, nad čym Rada budzie pracavać. Heta nieabchodna, kab potym Zialenski nie nakłaŭ vieta na parłamienckija inicyjatyvy.
Ułada na dystancyjnym kiravańni
I premjer-ministr Šmyhal, i śpikier Stefančuk, mahčyma, upieršyniu ŭ svajoj pracy adpuščanyja ŭ volnaje płavańnie. Bo z-za dypłamatyčnaj i vajennaj pracy ŭ prezidenta i jaho viedamstva nie chapaje sił i času, kab kantralavać inšyja haliny ŭłady.
U pieršyja dni vajny dvojčy na dzień prezident praź śpiecsłužby pravodziŭ vialikija sielektarnyja narady. U ich brali ŭdzieł: hałoŭnakamandujučy Uzbrojejnymi siłami Ukrainy Valeryj Załužny, staršynia OPU Jarmak, jaho namieśniki Cimašenka i Šurma, premjer-ministr Šmyhal, pieršy vice-premjer Śvirydzienka, ministr abarony Reźnikaŭ, ministr infrastruktury Kubrakoŭ, ministr raźvićcia Alaksiej Čarnyšoŭ, ministr ličbavaha raźvićcia Michaił Fiodaraŭ, ministr unutranych spraŭ Dzianis Manastyrski, ministr zamiežnych spraŭ Kuleba i sakratar Rady nacyjanalnaj biaśpieki i abarony Alaksiej Daniłaŭ.
Bolšaść ludziej padklučałasia da hetych sustreč z roznych miescaŭ i haradoŭ.
Pa-pieršaje, u pieršyja dni vajny z Kijeva byli evakujavanyja niekatoryja ministry, namieśniki kiraŭnika APU i inšyja vysokapastaŭlenyja asoby.
Pa-druhoje, jak patłumačyŭ Daniłaŭ, pavodle pratakołaŭ biaśpieki, padčas vajny ŭsim kiraŭnikam dziaržavy zabaroniena źbiracca ŭ adnym miescy. Kali vorah naniasie dakładny ŭdar, kraina ryzykuje zastacca biez palityčnaha kiraŭnictva.
![](http://d3kcf2pe5t7rrb.cloudfront.net/img/w732d4webp1/photos/z_2022_04/-krg0c.jpg.webp)
Tamu vajskovyja narady Zialenskaha — nie ŭsie afłajnavyja. A takich, jak kažuć na Bankavaj, «situatyvak» šmat — Zialenski trymaje ruku na pulsie padziej na frantach.
«Jon kantaktuje z Hienštabam, z Załužnym, z Reźnikavym — heta asobnyja razmovy i «situacyi». Ale vajnu nielha zapłanavać — usio pry nieabchodnaści i ŭ režymie realnaha času», — skazaŭ adzin z surazmoŭcaŭ «UP».
Paśla pieramohi Ukrainy ŭ bitvie za Kijeŭ členam urada i inšym kiraŭnikam było zahadana viarnucca ŭ stalicu.
Tamu apošnija dni ŭ Kabiniecie ministraŭ pravodzili pasiadžeńni ŭ afłajnavym režymie.
«Ščyra kažučy, u pieršyja dni pracy Kabmina byŭ chaos, ministry byli raskidanyja pa krainie, i niejak nie vielmi sistemna heta pracavała. Ale Šmyhal sabraŭsia i navioŭ paradak, naładziŭ pracu — ciapier usio absalutna narmalna pracuje», — raspaviadaje krynica na Bankavaj.
U Viarchoŭnaj radzie inšaja prablema. Ciažka sabrać bolš za 400 deputataŭ u adnym miescy padčas vajny. Asabliva ŭ Kijevie.
Kiraŭnictva Rady ciapier skancentravanaje jak na mižnarodnych adnosinach pa parłamienckaj linii, tak i na zachavańni ŭnutranaha adzinstva, kab mieć mahčymaść chutka prymać zakony.
Jak daviedałasia «UP», pierad pasiadžeńniami Rady adbyvajecca padrychtoŭka pa videasuviazi. Kožnaja frakcyja pradastaŭlaje na hetyja sustrečy svajho pradstaŭnika, tam adbyvajucca kansultacyi, svarki, ŭzhadnieńni i inšaja parłamienckaja rucina. Usiaho adno pasiadžeńnie rychtujecca 15-20 hadzin pa videasuviazi.
Na razhlad Rady vynosiacca zakony, zahadzia całkam uzhodnienyja z usimi frakcyjami.
Sustrečy, darečy, prachodziać tajemna, biez rekłamy. I pakul deputaty nie vyjduć z pamiaškańnia Rady, ich prosiać nie havaryć pra pryniatyja zakony i h.d. u internecie — kab u rasijan nie było spakusy bić rakietaj u poŭnuju deputataŭ zału.
Pa infarmacyi «UP», Rada užo niekalki dzion abmiarkoŭvaje mahčymaść viartańnia da bolš zvykłaha pracoŭnaha pracesu ŭ najbližejšyja tydni. U pryvatnaści, členam frakcyi «Słuha naroda» 7 krasavika pavinny paviedamić pra nieabchodnaść viarnucca ŭ stalicu.
«Prezident tut uvieś čas, viarnuŭsia amal uvieś Kabmin, tamu treba viarnuć deputataŭ na pastajannuju pracu ŭ Kijeŭ. Rada vierniecca da bolš zvykłaj formy pracy», — raskazaŭ upłyvovy člen kamandy prezidenta.
Kamientary