«Mejnstrym ajciški ŭžo źjechaŭ». Viadomy vienčurny inviestar — pra toje, što čakaje biełaruski IT-siektar

Cytujem dyjałoh na hetuju temu z intervju inviestara jutub-kanału «Žyćcio-malina».

Pavialičyć

— Prakapienia. Što pra jaho dumaješ?

— Što ja pamiataju pra jaho: što jon achviaravaŭ sto tysiač dalaraŭ na fond dapamohi paciarpiełym ad hvałtu ŭ Biełarusi. I vielmi pavažaju hety ŭčynak.

— Dobkin. Što za čałaviek? Jość razumieńnie?

— My pierasiakalisia, ja liču, što Dobkin — jak prykład dla ŭsich, pieršy ŭ Biełarusi junikorn (kampanija, jakaja atrymała rynkavuju acenku ŭ pamiery zvyš 1 młrd dalaraŭ. — «NN»). Heta vielmi kruta, što jość ludzi, jakija damahlisia našmat bolšaha, čym ja, i pakazali, što heta mahčyma (prynamsi, było mahčyma) — stvaryć publičnuju kampaniju ź vielmi vialikaj prysutnaściu ŭ Biełarusi.

— Patłumač biez emocyj, što ciapier adbyvajecca z EPAM? Dla ludziej, jakija nie razumiejuć.

— Ja nie ŭpeŭnieny, što ja ŭsio razumieju. U EPAM try samyja vialikija krainy, dzie ciapier znachodziacca ludzi, — heta Rasija, Ukraina i Biełaruś. Ukraina ciapier prosta ŭ stanie humanitarnaj katastrofy, u stanie vajny. Biznesova, pa-čałaviečy, Biełaruś i Rasija taksama ŭ stanie katastrofy. Ludzi biahuć i ź Biełarusi, i z Rasii, nie tolki z Ukrainy. Heta vielmi mocna padryvaje biznes, tamu što asnoŭnyja miescy, dzie ludzi bazavalisia, apynulisia ŭ takim krajnie hniatlivym stanoviščy. U vajnie, u masavym vyjeździe ludziej, u masavym niežadańni žyć tut.

Aproč taho ŭ ich ža jość istotnyja klijenty, jak minimum u Rasii i Ukrainie, i heta taksama vielmi mocna ŭpłyvaje na biznes. Atrymlivajecca, što dla dziasiatkaŭ tysiač ludziej treba dumać, jak im dapamahčy pierajechać kudyści, jak zrabić tak, kab ludzi roznych nacyjanalnaściaŭ pracavali nad ahulnymi prajektami. Heta ŭsio vialikija vykliki, jakija EPAM treba vyrašać.

— Na kolki dzion u Biełarusi zastałosia ajciški?

— Nu, ja b skazaŭ što… Viedaješ, kali novyja pradukty raspaŭsiudžvajucca, jość inavatary, jość tyja, chto lubić sprabavać novaje, ale nie samy top inavataraŭ, jość mejnstrym, i za mejnstrymam jość dahaniajučyja.

Mnie zdajecca, što ŭ Biełarusi mejnstrym ajciški ŭžo źjechaŭ. U toj halinie, dzie ja pracuju, dzie pradukt stvorany łakalna, a vykarystoŭvajecca hłabalna, — jany amal usie źjechali, ja dumaju, bolej za 95%.

Ale jość ža ajciška, jakaja na ŭnutrany rynak, jość ajciška, jakaja na rasijski rynak. Rasijski rynak ściskajecca, skurčvajecca, ale jon pa-raniejšamu adnosna vialiki. I ajciška, jakaja pracuje na rasijski rynak, nu kudy jana pajedzie? U Rasiju, napeŭna. I hetaja ajciška, usia jana zastaniecca.

— Tvaje słovy supiertravajadnaha pieryjadu, zdajecca, 2015 hod: «U Biełarusi kali ty małady razumny čałaviek, ty chočaš zastacca ŭ krainie i žyć hodnym žyćciom, iści ŭ IT — adzinaje, što ty možaš zrabić». Heta ŭžo nie tak?

— Heta ŭsio jašče lepšaje, što ty možaš zrabić, ale ciapier da hetaha dadałosia, što pažadana jašče z krainy źjechać.

— Biełaruskich kampanij buduć curacca partniory?

— Biełaruskich kampanij curajucca partniory.

— Nakolki heta vialikaja prablema?

— Nu, ciapier heta prablema, jakaja robić niemahčymym dla mižnarodnych kampanij bazavańnie ŭ Biełarusi. Hetaja prablema robić absalutna niemahčymym budavać kampanii ŭ Biełarusi, jakija pracujuć na ŭvieś śviet.

— My bolš nie IT-dziaržava?

— Sustrečnaje pytańnie: my jašče dziaržava? Praviadziom adcinak, dzie na adnym kancy Biełaruś, całkam niezaležnaja dziaržava, a na druhim Biełaruś — heta kraj Rasii. Vidavočna, što Biełaruś źmiaściłasia [u bok Rasii]. Ja ŭpeŭnieny, što biełaruski narod u pieravažnaj bolšaści nie padtrymlivaje toje, što napad na Ukrainu robicca ŭ tym liku ź Biełarusi. Ja dumaju, mahu pamylacca, i ŭ kołach ułady heta nie padtrymlivajecca, ja dumaju, što heta tam usprymajecca jak vymušanaja miera. Jaŭna ž heta častkovaja strata niezaležnaści. I Biełaruś jaŭna ruchajecca ŭ bok Rasii.

Tamu sapraŭdy važnaje pytańnie nie «Ci ŭsio jašče Biełaruś IT-dziaržava?», a «Ci ŭsio jašče Biełaruś dziaržava?».

• 3
• 1
• 0
• 1
• 0
• 0