Praz Rasiju ci Ukrainu? U Indyju? Jakim šlacham pojdzie biełaruski kalij
Paśla spynieńnia tranzitu biełaruskaha kaliju praź Litvu ŭ suśvietnaj presie abmiarkoŭvajecca pytańnie, ci mahčyma arhanizavać alternatyŭny šlach. Na situacyju pakul davoli kvoła adreahavali ŭ Kramli, zatoje Reuters paviedamlaje pra pieramovy ź Indyjaj. Miž tym, biełaruskija ekanamisty Kaciaryna Barnukova i Aleś Alachnovič aceńvajuć pierśpiektyvy dosyć skieptyčna.
Kreml: tranzit praz Rasiju jašče nie pačynaŭsia
Jak zajaviŭ siońnia, 2 lutaha, aficyjny pradstaŭnik Kramla Dźmitryj Piaskoŭ, tranzit biełaruskaha kaliju praz Rasiju jašče nie pačynaŭsia — pytańnie na stadyi abmierkavańnia.
Taksama jon prapanavaŭ žurnalistam źviarnucca ŭ profilnaje ministerstva: «Usio ž taki chutčej treba hetaje pytańnie adrasavać u Minekanamraźvićcia, chacieŭ by vas tudy pieranakiravać.
Hetaje pytańnie na paradku dnia, jano abmiarkoŭvajecca. Kali ja nie pamylajusia, pakul hetyja patoki jašče nie pačalisia, ale jano na paradku dnia. Pa detalach usio-taki — lepš u Minekanamraźvićcia».
Reuters: Indyja moža zakupić adzin miljon ton uhnajeńniaŭ
Pa infarmacyi ahienctva, Biełaruś i Indyja ciapier sprabujuć damovicca ab pastaŭkach adnaho miljona ton kaliju. Ab hetym paviedamili dva indyjskija čynoŭniki, jakija udzielničali ŭ pierahavorach. Abodva zajavili, što ździełka moža być zaklučanaja ŭ lutym.
Indyja prapanavała Biełaruskaj kalijnaj kampanii adkryć rachunak u rupijach u dziaržaŭnym indyjskim banku, pakolki sankcyi, uviedzienyja ZŠA i Jeŭrasajuzam, adrezali Minsk ad handlu dalarami i jeŭra, piša ahienctva.
Reuters nahadvaje, što Indyja amal uvieś kalij impartuje, prykładna piataja častka (ad 4 da 5 miljonaŭ ton) pastupaje ź Biełarusi.
Biełaruś z usich sił sprabuje pradavać kalij, u toj čas jak Indyja z usich sił sprabuje strymać rost koštaŭ paśla taho, jak ceny na jaho padskočyli da samaha vysokaha ŭzroŭniu bolš čym za dziesiacihodździe, paviedamiŭ pradstaŭnik kampanii z Mumbai, vystupajučy na ŭmovach ananimnaści.
U dziaržaŭnych ŚMI Biełarusi ab pieramovach nie zhadvajuć, adnak ahienctva BiełTA paviedamlaje, što adbyłasia sustreča kiraŭnika Savieta Respubliki Natalli Kačanavaj i ambasadara Indyi ŭ RB Ałoka Randžana Dža.
«Biełaruś — samy bujny pastaŭščyk kalijnych uhnajeńniaŭ, a Indyja — ich samy vialiki spažyviec», — adznačyŭ dypłamat.
Ekanamisty: raniej kalij pastaŭlali praz Ukrainu, ale z ulikam ciapierašniaha hieapalityčnaha stanovišča kazać ab hetym ciažka
Biełaruskija ekanamisty Kaciaryna Barnukova i Aleś Alachnovič vykazvajucca nakont alternatyŭnych šlachoŭ pastaŭki kaliju davoli skieptyčna.
«Jak tolki pytańnie sankcyj pačało raspracoŭvacca, premjer-ministr Biełarusi Raman Hałoŭčanka kazaŭ, što raspracoŭvajucca šlachi tranzitu praz rasijskija party.
Ale paŭhoda prajšło, nijakich padpisanych damoŭlenaściaŭ my nie bačym. Sapraŭdy, nieviadoma, jak Biełaruś budzie pastaŭlać kalij za miažu. Yara admoviłasia pastaŭlać z-za taho, što nie bačyła mahčymaściaŭ, jak dastaŭlać uhnajeńni ŭ Narviehiju», — nahadaŭ Aleś Alachnovič.
Pa jaho słovach, situacyi za pastaŭkami nafty (u pryvatnaści, u Novapołack) i kalijem adroźnivajucca.
«U Rasii jość «Urałkalij» i «Jeŭrachim», jakija vałodajuć terminałami i mahli b pieravalvać biełaruski kalij, ale jany nie harać žadańniem dapamahać adnamu sa svaich kankurentaŭ», — dadała Kaciaryna Barnukova.
Dyrektarka centra BEROC źviarnuła ŭvahu na toje, što zajavy z boku Maskvy dosyć niaŭpeŭnienyja, bo jość unutranyja kanflikty.
«Mnohija ekśpierty pa łahistycy ŭspomnili, što častka kaliju ekspartavałasia praz Ukrainu. U pryvatnaści, pa čyhuncy i praz port Adeskaj vobłaści. Miascovy terminał moža pieravalvać da 20% biełaruskaha ekspartu. Ale, uličvajučy siońniašniuju situacyju z hieapalityčnaj napružanaściu vakoł Ukrainy, havaryć pra heta składana», — ličyć Kaciaryna Barnukova.
Kamientary