U jeŭrapiejskich krainach pačynajuć vykarystoŭvać ciahniki na vadarodzie
Dla mnohich halin pramysłovaści «zialony» vadarod, jaki vyrablajecca z vykarystańniem adnaŭlalnych krynic enierhii, źjaŭlajecca ekanamična niavyhadnym. Masavy pierachod da vadarodnaha ekałahičnaha paliva niemahčymy, pakul nie vyrastuć ceny na tradycyjnaje paliva. Adnak dla čyhunačnaha transpartu heta technałohija aktyŭna raźvivajecca.
Mnohija ekśpierty nazyvajuć vadarod palivam budučyni, bo hety haz najbolš pryvabny z punktu hledžańnia ekałohii. Spalvańnie vadarodu ŭ ruchavikach supravadžajecca vykidami vadzianoj pary, a nie vuhlakisłaha hazu, jaki źjaŭlajecca hałoŭnaj pryčynaj klimatyčnaha kryzisu. Adnak pakul vadarod nie staŭ daminujučaj krynicaj enierhii, bo, kab atrymać hety haz, treba rasščapić vadu na kisłarod i vadarod, na što patrabujecca šmat enierhii. A kab paliva było pa-sapraŭdnamu ekałahičnym, to enierhija dla elektrolizu vadarodu pavinna być z adnaŭlalnych krynic, što pakul ekanamična niavyhadna.
Tym nie mienš, vadarodnaje paliva znachodzić usio bolš šyrokaje prymianieńnie ŭ čyhunačnym transparcie. U 2018 hodzie ŭ Hiermanii ŭpieršyniu zapuścili ciahnik na vadarodzie Coradia iLint, jaki raspracavała francuzskaja kampanija Alstom, piša Deutsche Welle.
Źniešnie taki ciahnik ničym nie adroźnivajecca ad dyzielnaha, ale z techničnaha punktu hledžańnia Coradia iLint — heta praryŭ, jaki moža pryvieści da revalucyi ŭ transparcie.
Ciahniki na vadarodzie majuć dva elektramatory, elektryčnaść dla jakich pastupaje z krynicy enierhii, jakaja znachodzicca niepasredna ŭ ciahniku. Na dachu Coradia iLint ustalavanaja cysterna z vadarodam i paliŭny elemient. U im vadarod złučajecca z kisłarodam, u vyniku čaho atrymlivajecca elektryčny tok, a ŭ navakolnaje asiarodździe vyłučajecca tolki vada.
Maksimalnaja chutkaść Coradia iLint — 140 km za hadzinu. Na adnoj zapraŭcy ciahnik moža prajechać ad 800 da 1000 kiłamietraŭ, a sama zapraŭka zajmaje 15 chvilin. Jašče adna ź pieravah takoha ciahnika — adsutnaść šumu.
Ciapier kampanija Alstom aktyŭna raźvivaje infrastrukturu dla ciahnikoŭ na vadarodzie. Pabudavać vadarodnyja zapravačnyja stancyi dla čyhunačnaha transpartu praściej, čym dla inšych transpartnych srodkaŭ, bo zaŭsiody viadoma, u jakich kropkach ciahnik spyniajecca, jak časta i a jakoj hadzinie, piša The Wall Street Journal.
Ciahniki na vadarodzie ŭžo majuć rehularnyja maršruty ŭ Hiermanii i Francyi, i ŭsio bolš jeŭrapiejskich krain zadumvajucca nad zakupkaj Coradia iLint.
Kampanija Alstom stała navataram u vytvorčaści ciahnikoŭ na vadarodzie, adnak ciapier takich kampanij stała bolš. Svaje madeli dla Jeŭropy raspracoŭvajuć ispanskaja CAF, niamieckaja Siemens i šviejcarskaja Stadler.
Jak paśla kanca śvietu. Ahrasiadzibu ŭ Salihorskim rajonie zaniesła ziamloj3
Kamientary