Vyzvaleny z Vaładarki raskazaŭ, jak u źniavoleńni pavodzić siabie Maksim Znak
«Mnie stała zrazumieła, čamu ŭ jaho takaja surjoznaja padtrymka ŭ advakackich kołach, a jašče čamu ŭ svoj čas jaho studenty nadzialili statusam «Najlepšaha vykładčyka», — piša Aleh Korban.
«Było heta padčas majho znachodžańnia ŭ adnoj z najhoršych kamier Vaładarki — №62, jakaja znachodzicca ŭ kancy hłuchoha padvała (hetuju častku korpusa za jaho vyhlad i pieranasielenaść nazyvajuć «šanchajem»). Mury hetaj maleniečkaj 8-miascovaj ciamnicy pakrytyja hrybkom i ćvillu. Praz tydzień znachodžańnia tamaka pačynajecca kašal, čyrvanieje i chrypić horła, — napisaŭ u siabie ŭ fejsbuku Aleh Korban, palitviazień, jaki na zakrytym sudzie niečakana atrymaŭ abmiežavańnie voli, a nie termin u kałonii. — Vilhać adolvaje knihi i sšytki, pastupova psujucca mnohija rečy.
Pastajannyja nasielniki kamiery — sprytnyja myšy i pacuki, tam jany biehajuć navat dniom, a ŭnačy šarachciać u torbach ź ježaj, hryzuć makarony i kašy, čajnaje liście. U adnu noč z dapamohaj pastak, vyprašanych u režymnikaŭ, sukamierniki złavili 7 myšej, ale ad hetaha ich mienš nie stała.
Što da prachodu pamiž narami, to jon katastrafična vuzki — usiaho 75 sm, miescaŭ dla chadžeńnia i tym bolš dla fizičnych praktykavańniaŭ niama. Uvohule, umovy tam nie samyja kamfortnyja…
Dziŭna, ale navat va ŭmovach takoj dzikaści ŭ adnym źniavolenym hramadzianinie prajaviłasia vielmi znajomaja asablivaść charaktaru, ułaścivaja niekatorym žycharam našaj dziaržavy. Hetaja rysa nahadvaje kłasičnaje rabalepstva, tuju samuju «pamiarkoŭnaść», «maju chatu z kraju». Chłopca zvać Saša, jamu 34 hady, fihurant kryminałki pa 328 artykule KK (niezakonnaje abaračeńnie narkatyčnych srodkaŭ). Na ŭsie prapanovy z našaha boku pisać skarhi i ŭnosić na abychodzie vusnyja prośby pa rašeńni antysanitarnaha stanu «chaty», spynieńnia zatrymak i błakady listoŭ z svabody, jon reahavaŭ admoŭna. Takija idei kamientavaŭ mierkavańniami typu «lepš ničoha nie pisać, a to stanie horš», «a raptam pieraviaduć u inšyja «chaty», dzie prablem budzie jašče bolš?». Ale kudy jašče horš? Zdajecca, u hetaj turmie horšych umoŭ prosta nie znajści.
Na ščaście, naša hramadstva bahata ludźmi zusim inšaha žyćciovaha ŭkładu. Takim u 62-j kamiery byŭ adzin viadomy juryst. Jak vyjaviłasia, jon užo nie raz pisaŭ zvaroty i prośby ab palapšeńni ŭmoŭ utrymańnia, trymaŭ haładoŭku, źmiaščaŭsia na čaćviora sutak u turmu turmy — chałodny i zmročny karcar. Ale heta nie złamała jahonaha duchu, jon nie staŭ čakać, kali administracyja SIZA narešcie prajavić kłopat i čałaviečnaść, jon pisaŭ novyja i novyja zvaroty. I voś niečakana dla ŭsich prablema stała vyrašacca! Śpiarša prynieśli novy šuflik dla prybirańnia. A praz paru dzion usich nas niečakana pierasialili ŭ inšuju kamieru «šanchaja» — prastarniejšuju, dzie niadaŭna rabili ramont, dzie vysokija stoli i trochuzroŭnievyja nary.
Tut nie było takoha patoku myšej (z hetaha boku turmy žyvuć i niasuć słužbu katy), z žyŭnaści tolki prusaki. I jašče ŭ novaj «chacie» nie było hnili.
Adbyłosia heta pry kancy śniežnia, i tamu novy 2021 hod my sustrakali ŭžo ŭ bolš kamfortnych umovach. Cikava: naš pierajezd — heta vypadkovaść? Ci ŭsio ž vada kamień točyć?!
P.S. Imia hetaha samaha jurysta — Maksim Znak. Asabista dla mianie stała zrazumieła, čamu ŭ jaho takaja surjoznaja padtrymka ŭ advakackich kołach, a jašče — čamu ŭ svoj čas jaho studenty nadzialili statusam «Najlepšaha vykładčyka». Jon i tut dapamahaŭ šmatlikim źniavolenym u napisańni roznych chadajnictvaŭ pa ich spravach, tłumačyŭ važnyja pravavyja niuansy i h. d. I nikoli nie hublaŭ dobraha nastroju — navat u dzień vyniasieńnia jamu absurdnych abvinavačvańniaŭ pa dadatkovych kryminalnych spravach. Tady Maksim viarnuŭsia ŭ kamieru ŭ badziorym nastroi, z usio toj ža niepachisnaj vieraj u pieramohu praŭdy i spraviadlivaści!» — raspaviadaje Aleh Korban.
Kamientary