Były supracoŭnik zabaronienaha telehram-kanała vyjšaŭ z komy ŭ Panamie i raskazaŭ, jak heta — chvareć na žoŭtuju lichamanku
Kryścijan Šynkievič kala miesiaca tamu syšoŭ z kamandy Ściapana Puciły. Jon pracavaŭ u prajekcie, jaki biełaruskija ŭłady ličać ekstremisckim.
Raźvitańnie było niečakanaje i skandalnaje — Šynkievič pisaŭ u sacyjalnych sietkach pra toje, što jaho nibyta abvinavacili ŭ kradziažy na sumu kala $15 tysiač. Jon bajaŭsia, što jaho zatrymajuć na terytoryi Jeŭrasajuza i departujuć u Biełaruś. Tamu palacieŭ u Łacinskuju Amieryku.
Tam jon padchapiŭ trapičnuju chvarobu — žoŭtuju lichamanku. U vyniku jaho ŭviali ŭ komu.
Pa vychadzie ź jaje Šynkievič raskazaŭ, jak heta — tak chvareć.
«Niejki kamar u lesie ŭkusiŭ, chvaroba tolki tak i pieradajecca. Dzie mienavita, składana skazać. Ja byŭ u roznych trapičnych lasach, imavierna, u Ekvadory.
Raptoŭna padniałasia tempieratura, bol pa ŭsim ciele, vanitavała.
Ja pateliŭ spačatku ŭ strachavuju. Jany skazali, što ja sam mahu jechać u najbližejšy miedycynski centr abo jany mohuć padkazać, jakaja balnica moža być lepšaj. Ci navat mahu vyklikać 911, kali vielmi kiepska stanie. I ja prosta hlanuŭ mapu i pajechaŭ u najbližejšy špital, i tam jany pryniali mianie adrazu.
Miedyki nie vielmi byli ździŭlenyja chvarobie — jana zvykłaja dla ich miescaŭ, ale miascovyja zvyčajna majuć pryščepki.
Da mianie jak biełarusa stavilisia narmalna, ale bolšaść nie viedaje, što heta za kraina i dzie jana. A tyja, chto niešta čytaŭ i čuŭ, adrazu pierapytvajuć, ci praŭda, što Biełaruś — jeŭrapiejskaja Vieniesueła. Vieniesuelcam, darečy, taksama zabaronieny vyjezd za miažu, ź ichniaj halečy śmiajecca ŭsia Łacinskaja Amieryka.
Razmaŭlaju ja tut pa-anhlijsku, u Panamie ź inhlišam lepš, čym u inšych łacinskich krainach. Ale i trochu vyvučyŭ ispanskuju, bo ŭ balnicy tolki 10% piersanału moža patłumačycca pa-anhlijsku. Tut, darečy, tolki asoba z panamskim hramadzianstvam maje prava na pracu ŭ miedycynie.
Nu a što tyčycca chvaroby, to ad jaje lekaŭ niama, tolki terapija dla padtrymki arhanizma, pakul jon sprabuje vyratavać nyrki i piačonku. Ja pačaŭ žaŭcieć, ledź moh chadzić, usio baleła, i ciapier usio cieła ŭ siniakach i hiematomach — prablemy sa zhusańniem kryvi.
Mnie dali adrazu kropielnicy z hlukozaj i elektralitami, paracetamoł ad bolu i niejkija inšyja leki.
Ale nie vielmi dapamahło. U mianie pačałasia taksičnaja faza chvaroby, pry jakoj śmiarotnaść — amal 50%, ale mnie pašancavała, što chutka pačali terapiju.
Tady i vyrašyli adpravić mianie na niekalki dziasiatkaŭ hadzin «spać», kab lahčej było pieranieści infiekcyju i kab arhanizm nie traciŭ siły na aktyŭnaść. Što i dapamahło.
Jak mianie ŭvodzili ŭ komu, pamiataju słaba, bo adčuvaŭ siabie ŭžo i tak u paŭśnie. A potym prosta pračnuŭsia. Ale jak paśla harełki, hałavu kružyła niekalki hadzin potym. Zaraz usio značna lepš.
Chutka vypiska ŭžo, da kanca tydnia. Na pieršyja paŭhoda dyjeta biez tłustaha i vostraha».
Čytajcie taksama. Eks-udzielnik kamandy Ściapana Puciły: Mianie ŭvodziać u komu — žoŭtaja lichamanka
«Jeździli-jeździli, a potym ich nie vypuścili». Biełarusy sutykajucca ź jašče adnym vidam represijaŭ3
Kamientary