Paśla mierapryjemstva ŭ Breście nie tolki vysłali konsuła, ale i raspačali spravu pa fakcie hieraizacyi vajennych złačyncaŭ
Prakuror Bresta raspačaŭ kryminalnuju spravu pa fakcie «hieraizacyi vajennych złačyncaŭ». U chodzie daśledčaj pravierki ŭstanoŭlena, što 28 lutaha 2021 hoda ŭ pamiaškańni, arandavanym «Bresckim forumam polskich łakalnych inicyjatyŭ» i TAA «Polskaja škoła», z udziełam niepaŭnaletnich i moładzi praviedziena «niezakonnaje masavaje mierapryjemstva», paviedamlaje słužba infarmacyi prakuratury Bresckaj vobłaści.
«Adzietyja ŭ nacyjanalnuju formu polskaj skaŭckaj arhanizacyi maładyja ludzi vykonvali pieśni, čytali vieršy ŭ słavu vajennych złačyncaŭ, u tym liku Ramualda Rajsa, viadomaha pa mianušcy Bury», — śćviardžajecca ŭ paviedamleńni viedamstva.
Nahadajem, 9 sakavika ŭ MZS Biełarusi byŭ vyklikany Časovy Pavierany ŭ spravach Polščy ŭ Biełarusi Marcin Vajciachoŭski. Padčas sustrečy polskamu dypłamatu byŭ zajaŭleny rašučy pratest u suviazi z udziełam konsuła Hienieralnaha konsulstva Respubliki Polšča ŭ Breście Ježy Cimafiejuka ŭ nieaficyjnym mierapryjemstvie, pryśviečanym «dniu praklatych žaŭnieraŭ», jaki prajšoŭ 28 lutaha 2021 hoda ŭ Breście z udziełam pradstaŭnikoŭ źviazanych z Polščaj niaŭradavych i moładzievych arhanizacyj.
Na dumku biełaruskaha boku, udziełam va ŭkazanym mierapryjemstvie polski pradstaŭnik «hruba parušyŭ normy mižnarodnaha prava, u pryvatnaści — Vienskuju kanviencyju ab konsulskich znosinach».
Konsułu Hienieralnaha konsulstva Respubliki Polšča ŭ Breście Ježy Cimafiejuku prapanavana pakinuć terytoryju Respubliki Biełaruś.
Nacyjanalny Dzień pamiaci «praklatych žaŭnieraŭ» adznačajecca ŭ Polščy 1 sakavika z 2011 hoda. Havorka idzie pra ŭdzielnikaŭ antysavieckaha padpolla, jakija zmahalisia za niezaležnaść krainy. Siarod ich byli i sałdaty atrada Buraha, jakija spalili piać viosak na terytoryi ź biełaruskim pravasłaŭnym nasielnictvam.
Kamientary