Čarha na 80 čałaviek — kab addać dziaciej u biełaruskamoŭnuju himnaziju, baćki načavali pad dźviaryma
Ź piatnicy, 12 červienia, pačaŭsia pryjom dakumientaŭ u škoły. Kab addać dzicia ŭ biełaruskamoŭnuju 4-ju himnaziju Minska, baćki zajmali čarhu za dzień i načavali pad dźviaryma.
«U pazaminułym hodzie było svabodna ź miescami, a letaś nie ŭsie achvotnyja patrapili. Nu i baćki pierastrachavalisia, vyrašyli pryjści raniej», — raskazvaje adzin z tych baćkoŭ Alaksandr Ačaretni.
Alaksandr pryjšoŭ da himnazii ŭ 10 ranicy ŭ čaćvier i byŭ 32-m u čarzie. U vyniku sabrałosia 80 baćkoŭ.
«Himnazii, kaniečnie, dziakuj. Kali tam ubačyli natoŭp, vynieśli łaŭki, dva kulery z kubačkami — učora ž śpiakota była. Ja zdahadaŭsia ŭziać z saboj kresła i spalnik, ale ŭ niekatorych ničoha z saboj nie było», — dzielicca baćka.
Kab nie načavać usim pad dźviaryma, ludzi raźbilisia na piaciorki i z kožnaj zastałasia pa čałavieku.
Alaksandr addaje ŭ pieršy kłas dačku. Sam jon z Rasii, siamja ruskamoŭnaja, ale choča, kab dačka viedała biełaruskuju movu, bo žyvie ŭ hetaj krainie.
«Plus u himnazii dobraja linhvapadrychtoŭka. U nas rajon nie vielmi dobry, i iści ŭ zvyčajnuju škołu nie chaciełasia. Dziela dziciaci adzin raz možna pastajać», — uśmichajecca mužčyna.
Rankam ŭ piatnicu baćkam u čarzie vypisali tałončyki, dzie paznačana, u jaki čas da jakoha kabinieta padyści.
Pryjom dakumientaŭ u himnaziju, jak i va ŭsie škoły, praciahniecca da 15 žniŭnia. Dyrektar Andrej Hocman paviedamiŭ, što dla pieršakłaśnikaŭ sioleta 96 miescaŭ — čatyry kłasy pa 24 čałavieki.
«U nas dastatkova vysokija pakazčyki. Pracuje muzyčnaja škoła, jość centr zamiežnych moŭ — možna vučyć polskuju, niamieckuju dadatkova. I, napeŭna, hałoŭnaje — my śviatkujem u himnazii našy tradycyjnyja śviaty», — tłumačyć dyrektar takuju ŭvahu da ŭstanovy.
Kali achvotnych budzie bolš, čym zapłanavanych miescaŭ, razhledziać mahčymaść danaboru.
«U hetym vypadku stvarajecca kamisija, razhladaje zvaroty, i my prosim zasnavalnika pavialičyć ličbu na peŭnuju kolkaść. Ale kłasy nie humovyja, jość sanitarna-epidemičnyja patrabavańni, jakich my pavinny prytrymlivacca», — kaža Andrej Hocman.
Vialikaja hutarka z Alinaj Koŭšyk — pra intervju z Padsasonnym, skandał z Kulejem i reformy na «Biełsacie»1
Kamientary