Suŭładalnik «Pjanaj višni»: Biełaruś padtrymlivaje Rasiju, tamu my nie chočam vieści tut biznes
Adzin z ułaśnikaŭ ukrainskaj sietki baraŭ «Pjanaja višnia» Andrej Chudo raskazaŭ «NN», čamu jaho biznes admaŭlajecca prychodzić u Biełaruś i što jon dumaje pra adkryćcio ŭ Minsku ŭstanovy z identyčnaj nazvaj i kancepcyjaj.
«U svoj čas my pryniali stratehičnaje rašeńnie nie raźvivać svoj biznes u Biełarusi. Čamu? Niama nijakich harantyjaŭ dla biznesu, jaki prychodzić z Ukrainy. Heta tyčycca nie tolki Biełarusi, ale i Rasii, — kaža Andrej Chudo. — Kaštoŭnaści cyvilizavanaha śvietu adnolkavyja, jak u harantyjach dla biznesu, hetak i ŭ palityčnym kantekście, hetak i ŭ čałaviečym. Mienavita tamu jeŭrapiejskija kaštoŭnaści nam bližejšyja. Na žal, ciapier Biełaruś razvaročvajecca ŭ inšy bok. Toje samaje i Rasija, jaje dziejańni siońnia vychodziać za ramki cyvilizacyjnych kaštoŭnaściaŭ.
Vidavočna, što pazicyja Biełarusi adnosna dziejańniaŭ Rasii, jaje lidaraŭ, była adnym z najvažniejšych arhumientaŭ pry pryniaćci rašeńniaŭ. Test «Čyj Krym?» chutka zdymaje ŭsie pytańni. I Biełaruś tut nie daje pravilnaha adkazu.
My vierym, što naš susiedni narod prymie pravilnaje rašeńnie ŭ vybary svajho cyvilizacyjnaha kursu i atrymaje prava na svabodnuju krainu. Mienavita tady my budziem adnymi ź pieršych, chto pačnie raźvivać sumiesnyja prajekty.
Pravy na intelektualnuju ŭłasnaść — adna z takich cyvilizacyjnych kaštoŭnaściaŭ. Stvareńnie idej, kancepcyj, praduktaŭ, brendynh — heta ciažkaja praca, i jaje vyniki abaronieny va ŭsim cyvilizavanym śviecie. I kali chtości kapijuje heta, heta vidavočny kradziež.
Voś što my chočam danieści da ŭładalnikaŭ bara, jaki źjaŭlajecca kopijaj našaj «Pjanaj višni». Heta kradziež, i vy złodziei. I kraści nie dobra, i pa biełaruskim zakonie taksama amaralna i nieprystojna.
U našaj škole my vučym dziaciej, što śpisvać — heta drenna, i nie tamu, što vy padmanvajecie, a tamu, što kožny maje svaje aŭtarskija pravy, i heta budzie kradziež. Vašym dzieciam heta byŭ by taksama dobry prykład, i my ščyra zyčym hetaha.
Restaranny biznes pabudavany na emocyjach i haścinnaści i nikoli nie moža być skradzieny. Tamu što ludzi heta adčujuć. Jak heta zaŭvažna ŭ Krymie. Usie cyvilizavanyja ludzi viedajuć, što jaho skrali.
Jašče adno karotkaje paviedamleńnie dla ŭładalnikaŭ minskaha bara: stvarycie novyja sensy! Vam nie treba rabić bułački z katletami i nazyvać heta «Makdonalds», vam nie treba kapijavać farmat i nazyvać jaho całkam suhučna lvoŭskaj «Pjanaj višni». Heta nie kreatyŭna… Zrazumiejcie, bolšaść paviedamleńniaŭ my atrymali ad samich biełarusaŭ, bo jany byli ŭ Lvovie i nas viedajuć. Jany viedajuć brend, śviet staŭ bližejšym.
I ź jurydyčnaha punktu hledžańnia ŭ nas jość zapatentavanaja mižnarodnaja handlovaja marka EUIPO (Jeŭrapiejski sajuz intelektualnaj ułasnaści). Usim miru i kanstruktyvu, a nazvu bara ŭ Minsku treba mianiać. Žyvie Biełaruś!» — adkazaŭ Andrej Chudo na pytańni «NN».
***
Bar «Pjanaja višnia» pačaŭ pracavać na vulicy Zybickaj u Minsku na hetym tydni. Adziny punkt mieniu — višniovaja nastojka. Mnohija ŭbačyli ŭ hetym padabienstva ź lvoŭskaj «Pjanaj višniaj». Adzin z zasnavalnikaŭ minskaha bara Siarhiej Klancoŭ śćviardžaje, što nijakaha płahijatu tut niama, a višnioŭka padajecca pa ŭłasnym recepcie. Biełarusy źviartalisia va Ukrainu, kab nabyć franšyzu, ale im u hetym admovili.
Kamientary