Były ŭkrainiec, jaki moža stać čempijonam śvietu za Rasiju — piać faktaŭ pra šachmatysta Siarhieja Karakina
Amatary šachmat sočać za padziejami ŭ Ńju-Jorku, dzie prachodzić matč za zvańnie čempijona śvietu. U finale hulajuć dziejny čempijon narviežac Mahnus Karłsien i hramadzianin Rasii ŭkrainskaha pachodžańnia Siarhiej Karakin.
Pakul što prajšło šeść partyj, i ŭsie jany skančvalisia ničyjoj.
Chto taki Siarhiej Karakin, jaki sprabuje kinuć vyklik najlepšamu šachmatystu sučasnaści Mahnusu Karłsienu? «Naša Niva» sabrała piać faktaŭ pra jaho.
Naradziŭsia ŭ Krymie
Karakin naradziŭsia ŭ 1990 hodzie ŭ Simfieropali. Adkul jaho karani, z Ukrainy ci Rasii?
Pa matčynaj linii dziadula byŭ ź Fieadosii, a babula — z Zaparožža.
A voś z boku baćki rod išoŭ z Tamboŭskaj i Biełharadskaj vobłaści Rasii.
Pavodle siamiejnaj lehiendy, u 1995 hodzie Siarhiej pabačyŭ pa televizary rolik, u jakim prahučała fraza pra «kožnuju piešku, jakaja moža stać fierziem». Jaho zacikaviła historyja pieraŭtvareńnia, i tady baćki navučyli syna šachmatam.
Baćki Karakina ź ciaham času raźvialisia. Tata zajmajecca fiermierstvam, a maci pakinuła pracu vykładčyka infarmatyki, kab dapamahać synu.
Samy małady hrajsmajstar u śviecie
Siarhiej Karakin zaniesieny ŭ Knihu rekordaŭ Hinesa jak samy małady hrajsmajstar. Hetaha šachmatnaha statusa vunderkind dabiŭsia ŭ 12 hadoŭ 211 dzion.
Praŭda, historyja atrymałasia skandalnaj.
«U adnym z turniraŭ, dzie pavinien byŭ vykanać normu hrosmajstra Siarhiej Karakin, u apošnim tury jon hulaŭ ź dziaŭčynkaj, jakaja mieła ŭsiaho paŭbały (adna ničyja i ŭsie astatnija parazy — NN»). Jamu patrebna była pieramoha, ale jon adyhraŭ ź joj uničyju. Jaho baćka i trenier terminova šukajuć kaho-niebudź, u kaho možna było b kupić paŭbały. Nichto nie zhadžajecca ni za jakija hrošy (heta da pytańnia ab mahčymaści kupić bały). Tady jany źviartajucca da mianie. Ja da apošniaha turu pieravykanaŭ normu hrosmajstra, dyk zhadžajusia addać hetyja paŭbały (zusim nie za hrošy) dla taho, kab Karakin staŭ samym maładym hrosmajstram. I pakul było zakryćcio turniru, my zhulali druhuju partyju (pieršaja skončyłasia ŭničyju) praktyčna ŭ blic», — raskazvaŭ rasijski šachmatyst Vasil Malinin. Ci praŭda heta, nieviadoma.
Pieramožca šachmatnaj Alimpijady za Ukrainu
Šachmatnaja Alimpijada — kamandnaje spabornictva siarod zbornych, jakoje pravodzicca kožnyja dva hady. Ad pačatku 1980-ych bolš za dvaccać hadoŭ zapar Alimpijadu vyjhravała zbornaja SSSR, a paśla Rasija.
Pakul u 2004 nie hrymnuła siensacyja — pieramoha Ukrainy. Małady Karakin taksama byŭ u składzie kamandy, choć, zrazumieła, i na pieršych rolach. Adnak pieramoha była tolki imidžavaj, finansavaha prybytku šachmatyst amal nie atrymaŭ.
«Ja nie moh znajści treniera. Nie mieŭ nijakaj padtrymki. Za pieramohu na šachmatnaj Alimpijadzie-2004 ŭkrainskaja fiederacyja zapłaciła mnie dźvie tysiačy dołaraŭ, ź jakich jašče adniali padatki. Pra što tut havaryć?» — aburaŭsia jon.
Praź niekalki hadoŭ Karakin źmianiŭ hramadzianstva na rasijskaje.
«Ja zaŭsiody ličyŭ siabie ruskim čałaviekam, navat kali pražyvaŭ u Krymie. Usie maje siabry havorać pa-rusku, i bolšaść krymčan taksama havorać na hetaj movie. Bolš za toje, vystupajučy za zbornuju Ukrainy, ja z usimi chłopcami mieŭ znosiny vyklučna pa-rusku. I takich, jak ja, u Krymie bolšaść. Usie biez vyklučeńnia siabry, z kim ja padtrymlivaju zaraz suviaź, taksama imknucca apynucca ŭ składzie Rasii. U nas adzin mientalitet, adna mova, adna relihija, dyk čamu nie stać adzinym cełym? Ja vielmi rady, što, u adroźnieńnie ad taho biezzakońnia, jaki byŭ na majdanie, u krymčan budzie mahčymaść mirnaha vybaru. Pa vynikach hałasavańnia, amal upeŭnieny, tych, chto choča dałučeńnia da Rasii, budzie bolšaść», — vykazvaŭ jon svaje pohlady padčas aneksii Kryma.
U druhim šlubie
Pieršaj žonkaj Karakina stała ŭkrainskaja šachmatystka Kaciaryna Dołžykava.
«My byli znajomyja dosyć daŭno, bo abodva z Ukrainy. Paznajomilisia bližej mienavita ŭ Drezdenie na śviatočnaj dyskatecy, — uzhadvaŭ Siarhiej. — Ja zaprasiŭ Kaciu na taniec, a na nastupny dzień my razam pajšli ŭ Drezdenskuju halereju, pahladzieli na Sikścinskuju Madonu. Paśla hetaha pačali sustrakacca».
Šlub byŭ dziŭnym. Para pabrałasia 24 lipienia 2009 hoda, a litaralna na nastupny dzień Karakin staŭ hramadzianinam Rasii. Padrabiaznaści razvodu šachmatyst u presie nie ahučvaŭ.
«Nie syšlisia charaktarami. My absalutna roznyja. Ja bolš spakojny. Jana ŭzryŭnaja. I ŭvohule — inšaja», — padsumavaŭ jon.
Cikava, što budučaja druhaja žonka, Halija Kamałava, jakraz zajmałasia afarmleńniem dakumientaŭ dla atrymańnia Karakinym hramadzianstva Rasii. Jana była pamočnicaj rektara Rasijskaha dziaržaŭnaha sacyjalnaha ŭniviersiteta.
«Praź niekalki dzion jon patelefanavaŭ mnie i prapanavaŭ razam paviačerać, — uzhadvaje Halija. — Adkazała, što pracuju dapazna i nijak nie mahu sustrecca. Skazała i praciahnuła pracavać, a jon usio adno pryjechaŭ i čakaje. Telefanuje z mašyny i nastojvaje: davaj chutčej, pakul nas nichto nie ŭbačyŭ. Pryjšłosia zhadžacca — paviačerali ŭ restarančyku na Starym Arbacie, potym stali sustrakacca».
U siamji hadujecca mały syn Alaksiej.
Žyvuć Karakiny ŭ Padmaskoŭi. «Adnoj z umoŭ pierajezdu ŭ Maskvu było toje, što Rasijskaja šachmatnaja fiederacyja zabiaśpiečyć mianie kvateraj. Ja abmianiaŭ jaje na nievialiki zaharadny dom. Śviežaje pavietra, cišynia, spakoj — lepš miesca dla šachmatysta nie prydumać», — raskazvaŭ hrosmajstar.
U rejtynhu pakul dziaviaty
U rejtynhu šachmatystaŭ Siarhiej Karakin pakul što zajmaje 9-je miesca. Ale heta nie pieraškodziła jamu pieramahčy ŭ sioletnim turniry pretendentaŭ, jaki prachodziŭ u Rasii.
U trojku pryzioraŭ uvajšli były čempijon śvietu ź Indyi, 46-hadovy Višy Anand, a taksama Fabijana Karuana — amierykaniec italjanskaha pachodžańnia.
Tendencyja sučasnych šachmat u tym, što čempijony ŭsio maładziejuć. Karuana zaraz 24 hady, Karłsienu — 25 hadoŭ, Karakinu — 26 hadoŭ.
Sioletni finał budzie składacca minimum z 12 partyj. Kali jon skončycca ŭničyju, čempijon budzie vyznačany ŭ dadatkovych matčach z abmiežavańniem času.
Dvajniki viadomych biełarusaŭ. I nie kažycie, što nie zadumvalisia pra ich padabienstva12
Dvajniki viadomych biełarusaŭ. I nie kažycie, što nie zadumvalisia pra ich padabienstva
«Lilit, vy śviatło jaho žyćcia». Ranicaj 1 studzienia minčuk zrabiŭ prapanovu svajoj dziaŭčynie ŭ samalocie «Biełavija» na vyšyni 10 tysiač mietraŭ3030
Kamientary