Aryjentavany na Rasiju: piać faktaŭ pra ŭdzielnika Jeŭrabačańnia ad Biełarusi Alaksandra Ivanova (Ivan-a)
Učora stała viadoma, što Biełaruś na piesiennym konkursie «Jeŭrabačańnie-2016» reprezientuje maskoŭski śpiavak ź biełaruskimi karaniami Alaksandr Ivanoŭ. Mnohija bačać u hetym błat, bo Ivanoŭ źjaŭlajecca prateže pradziusara Viktara Drobyša. «NN» sabrała cikavyja fakty ź bijahrafii śpievaka.
Vyjšaŭ z homielskaj rok-tusoŭki
Alaksandr Ivanoŭ (Ivan) naradziŭsia ŭ 1994 hodzie ŭ Homieli. Skončyŭ muzyčnuju škołu pa kłasie kłasičnaj hitary. Jahony baćka i brat taksama muzyki. Razam z bratam Uładzimiram (hitarystam) Alaksandr hraŭ u hurcie Brown Velvet, jaki vykonvaŭ dastatkova ciažkuju muzyku. «Heta absalutna niekamiercyjnaja muzyka», — kazali chłopcy. Pieśni vykonvali vyklučna na anhlijskaj movie. Alaksandr Ivanoŭ kazaŭ, što nikoli nie pisaŭ vieršaŭ ni na ruskaj, ni na biełaruskaj movach. Adnak u novym vobrazie jon usio ž čaściej śpiavaje jakraz na ruskaj.
«Ja b siońnia bolš nie pisaŭ takoj muzyki, mnie heta ŭžo niecikava. Ja chaču novaha, sučasnaha. Kaniečnie, heta budzie rok, adnak vidaźmienieny», — kazaŭ Alaksandr.
Pieramoh u konkursie ŭ akupavanym Krymie
Vidaźmienienaja hrupa robić staŭku na rasijski rynak, a nie na Biełaruś.
15 červienia 2014 Alaksandr Ivanoŭ uziaŭ udzieł va ŭsierasijskim konkursie maładych vykanaŭcaŭ «Piać zorak», jaki prachodziŭ u Jałcie. Prysutničała ŭsio kiraŭnictva Respubliki Krym. U žury muzyčnaha spabornictva ŭvachodzili viadomyja ŭ rasijskim šou-bizie ludzi: Iosif Kabzon (jon abviaščaŭ imia łaŭreata), Viktar Drobyš, Juryj Antonaŭ, Iryna Alehrava. Praź pieramohu ŭ hetym konkursie Ivanoŭ musiŭ pradstaŭlać Rasiju na mižnarodnym konkursie «Interbačańnie», jaki, adnak, byŭ admienieny ŭ apošni momant.
U rasijskich ŚMI hetuju padzieju padali jak toje, što ŭ Jałcie «pieramoh rokier z Sankt-Pieciarburha». U toj čas jon žyŭ mienavita ŭ hetym rasijskim horadzie i ŭdzielničaŭ u hurcie IVANOV.
Žyvie ŭ Maskvie
Druhaja značnaja pieramoha Alaksandra Ivanova źviazanaja z prajektam «Hałoŭnaja scena». Tam jon vykonvaŭ pieśniu viadomaha rasijskaha pop-śpievaka Mikałaja Naskova «A na mieńšieje ja nie sohłasien». Paśla hetaha na Ivanova źviarnuli ŭvahu niekalki značnych u Rasii pradziusaraŭ. Supracu prapanoŭvaŭ Ihar Matvijenka, ale vybar maładoha biełarusa paŭ na Viktara Drobyša.
«Dumaju, što heta samy talenavity čałaviek u sučasnym šou-bizie», — kazaŭ pra jaho Drobyš. Jahonaja pieśnia «Kriest i lubov» vielmi chutka trapiła ŭ chit-parad na «Ruskim radyjo».
Sam Alaksandr sioleta byŭ uhanaravany tym, što 12 červienia 2015 hoda vystupaŭ pad ścienami Kramla na Dzień Rasii. Jon vykanaŭ pieśniu «Vybiraj», dzie jość radki «vajavać ci lubić, ty vybiraj». Publika ŭspryniała na ŭra.
Ciapier Alaksandr Ivanoŭ žyvie ŭ Maskvie. Mienavita ŭ Rasii adbyvajecca absalutnaja bolšaść jaho vystupaŭ.
Paśla taho jak jaho pasłuchaŭ Łukašenka
Prapanova ŭziać udzieł u adbory da Jeŭrabačańnia-2016 pastupiła Alaksandru Ivanovu paśla taho, jak u kastryčniku jon uziaŭ udzieł u tvorčym viečary Viktara Drobyša na «Minsk-Arenie». U toj viečar siarod hledačoŭ prysutničaŭ Alaksandr Łukašenka, jaki ŭručyŭ Drobyšu orden Franciška Skaryny.
Ivanoŭ kaža, što času zastavałasia zusim niamnoha, adnak jany paśpieli napisać pieśniu dla adboru. Užo tady stała jasna, što Alaksandr Ivanoŭ budzie hałoŭnym favarytam hetaha adboru.
Chacia sam Ivanoŭ rašuča adkidvaŭ mierkavańni, što Drobyš moža dabivacca jaho pieramohi niesumlennym šlacham: «Heta nam niepatrebna. Kali za nas prahałasujuć — značyć, prahałasujuć. Kali nie — to nie. Duraściu było b niešta padstrojvać, vyjšaŭ by niejki samaabman».
Ušu i malavańnie
Alaksandr Ivanoŭ nikoli nijak nie vykazvajecca ab palityčnych i hramadskich źjavach. Usie jahonyja intervju vyklučna ab muzycy i krychu pra siabie.
Naprykład, jon raskazvaŭ, što zachaplajecca malavańniem. «Ja časta dumaju ab pryrodzie, kosmasie, dušy, niejkich vyšejšych materyjach. I dla mianie momant malavańnia asacyjujecca z svojeasablivym psichaanalizam, z sychodam u inšy śviet, jaki isnuje, ale my jaho nie bačym».
Jašče ź bijahrafii ŭ bijahrafiju Alaksandra Ivanova pierachodzić, što jon zajmajecca ušu. Adnak sam śpiavak kaža, što ŭziaŭ usiaho paru zaniatkaŭ dla miuzikła «Ramea i Džuljeta».
Kamientary