Śledčyja miarkujuć, što žychar Kaŭnasa špijoniŭ dla Biełarusi na praciahu piaci hadoŭ.
Valemaras Rupšys i Rajmandas Piatraŭskas raskazali pra zatrymańnie biełaruskaha špijona.
Pradstaŭnik Hienprakuratury Litvy Rajmandas Piatraŭskas paviedamiŭ, što 28-hadovy padazravany A.O. byŭ zatrymany 24 studzienia, piša litoŭski partał delfi.lt.
Jaho padazrajuć u špijanažy na biełaruskuju vajskovuju vyviedku.
A.O. zavierbavali ŭ Biełarusi. Pavodle źviestak śledstva, A.O. nie tolki zajmaŭsia zboram infarmacyi, ale i pryciahvaŭ inšych asob, jakija mahli davać nieabchodnuju Biełarusi infarmacyju.
«Heta jon rabiŭ z karyślivych mierkavańniaŭ», — skazaŭ prakuror, adznačyŭšy, što padazravany atrymlivaŭ za infarmacyju hrošy.
«Jon źbiraŭ usiu dastupnuju jamu infarmacyju», - skazaŭ Piatraŭskas.
Pavodle jahonych słoŭ, padazravany nanios vialikuju škodu. «Heta pastaviła pad pahrozu zdaroŭje i žyćcio niekatorych ludziej», — skazaŭ jon.
Piatraŭskas adznačyŭ, što Biełaruś cikaviłasia vajskovaj technikaj, jakaja jość u Litoŭskim vojsku, uzbrajeńniem, pryznačeńniem budynkaŭ, udziełam u mižnarodnych misijach NATA, płanami standartnych apieracyj, roznymi vajennymi vučeńniami, infarmacyjaj ab kolkaści słužačych u kankretnych adździaleńniach i słužbach, ich imionami, asabistymi charaktarystykami i maralna-psichałahičnymi ŭstanoŭkami, rasparadkam dnia, h.zn. usim, što źviazana z armijaj.
«Jon pieradavaŭ źviestki, jakija zdoleŭ atrymać za čas špijanažu — heta byli źviestki ab našych uzbrojenych siłach, ab słužačych vojska, płanach, budynkach, davoli šmat usiaho», — skazaŭ Piatraŭskas.
«Sumy vypłačvalisia roznyja, u nas tolki jość padazreńni — u kryminalnaj spravie sabranyja tolki źviestki, jany stanuć dokazami ŭ sudzie», — skazaŭ prakuror.
Hrošy jamu płaciŭ čałaviek, jakomu jon pieradavaŭ infarmacyju, dzie jany sustrakalisia — nie paviedamlajecca.
«My možam śćviardžać, što čałaviek, ź jakim jon kantaktavaŭ, byŭ supracoŭnikam biełaruskaj sakretnaj słužby», — skazaŭ Piatraŭskas.
Padčas rasśledavańnia vyśvietliłasia, što ŭ fielčara jość svajaki ŭ Biełarusi.
Na pytańnie, ci pryznaŭ fielčar svaju vinu, Piatraŭskas adkazaŭ: «Jon škaduje». «Pakazańni jon daŭ», — padkreśliŭ prakuror.
Pamočnik kamandarma Litoŭskaj armii pałkoŭnik Valdemaras Rupšys skazaŭ, što padazravany słužyŭ u navučalnym pałku ŭ 2007—2008 jak pryzyŭnik. Połk byŭ dysłakavany ŭ Rukle. Da 2010 hoda byŭ dobraachvotnikam, a da krasavika 2014 hoda, kali syšoŭ u zapas, byŭ kantraktnikam.
Pavodle jahonych słoŭ, jon udzielničaŭ u mižnarodnych misijach.
«U jaho nie było dostupu i mahčymaści vykarystańnia sakretnaj infarmacyi, jon moh padavać infarmacyju padčas vučeńniaŭ, u paŭsiadzionnaj dziejnaści, ab tym, što bačyŭ», - adznačyŭ pałkoŭnik.
28-hadovy zatrymany maje siaredniuju adukacyju, jon niežanaty, nie byŭ sudzimy, słužyŭ fielčaram u miechanizavanym piachotnym bataljonie imia Vialikaha kniazia Alhierda.
Rasśledavańnie było raspačataje na padstavie źviestak doŭhačasovaj vyviedčaj apieracyi, jakaja pravodziłasia Departamientam dziaržbiaśpieki (DDB).
Raniej Hienprakuratura i DDB Litvy 10 listapada paviedamili, što ŭ sud pieradadzienaja sprava abvinavačanaha ŭ špijanažy na karyść Biełarusi hramadzianina Litvy, jaki pracavaŭ na dziaržpradpryjemstvie Oro navigacija (dyśpietčarskaja słužba palotaŭ). Tady paviedamlałasia, što viadziecca rasśledavańnie ŭ dačynieńni da jašče adnaho padazravanaha ŭ špijanažy dla vajskovaj vyviedki Biełarusi.
Braty-bliźniaty pryjšli pracavać u milicyju. Adzin ź ich pierapłyŭ raku i ŭciok ź Biełarusi, kab nie zajmacca palityčnymi spravami. Pahutaryli ź im6
Kamientary