«Čamu jana biesicca? Mužyka daŭno nie było!» ANT pakazała kamiedyju ŭłasnaj vytvorčaści. Naśmiešyć vas tolki kancoŭka
Telekanał ANT pakazaŭ na Kalady svoj premjerny sieryjał —kamiedyju «AZS №1». Čym admietny hety prajekt?
Pićcio amyvajki i kradziež z chutkaj jak biznes-idei
U vieraśni 2024-ha ažno ŭ 60 biełaruskich kinateatrach prezientavali premjeru — kamiedyju «AZS №1» pra žyćcio adnoj zapraŭki. Dziaržaŭnaja prapahanda vychvalałasia, što stužku rabili vyklučna rukami supracoŭnikaŭ ANT: heta i režysiory, i apieratary z hukavikami, i hrymiory dy kiroŭcy. Kino zdymali na zapraŭcy pad Minskam i jašče na 48 łakacyjach, u tym liku na terytoryi troch muziejaŭ, Mirskaha zamka i Linii Stalina.
Kažuć, adnych prafiesijnych akcioraŭ u stužcy było bolš za 30 čałaviek. Siarod ich, naprykład, była zorka łukašenkaŭskaha Kupałaŭskaha teatra Volha Niafiodava.
Dla ANT i ŭ pryncypie biełaruskaha telebačańnia heta nasamreč vielmi značny prajekt. Zdymać sieryjały na bazie telekanałaŭ — ideja, jakuju ministr infarmacyi (i raniejšy kiraŭnik ANT) Marat Markaŭ prałabiravaŭ pierad Alaksandram Łukašenkam. Łohika ŭ tym, kab nie tracić biudžetnyja hrošy i nie zakuplać prościeńkija sieryjały ŭ Rasii i va Ukrainie. Uzamien možna zdymać ich tanna ŭ siabie, a paśla jašče i pradavać u rasijski efir, akuplajučy vyrab.
Chutčej za ŭsio, ad pośpiechu (ci pravału) «AZS №1» šmat u čym zaležyć dalejšy los idei. Pryčym havorka pieradusim nie pra tvorčy składnik, a pra finansavuju madel. Ci ŭdasca vyhadna pradać sieryjał rasijanam — nastupnaja zadača, jakaja staić pierad televizijonščykami.
Ale što ž atrymałasia ŭ tvorčym płanie? Raskažam vam siužet hetaj historyi da kanca: tut nie varta bajacca, što spojlery sapsujuć vam zadavalnieńnie — vy zrazumiejecie, čamu heta nie maje značeńnia.
U pačatku stužki nas znajomiać z Branisłavam Arkadzievičam Kamaroŭskim, dyrektaram adnoj z zapravak, jakija ŭvachodziać u bujnuju sietku. Branisłaŭ udzielničaje ŭ naradzie kiraŭnikoŭ zapravak, i tam hałoŭny bos usioj sietki abviaščaje pra konkurs: maŭlaŭ, čyja zapraŭka zarobić ciaham miesiaca bolš za kankurentaŭ, toj i stanie jaho namieśnikam.
Kamaroŭski naš akazaŭsia redkasnym karjerystam i kinuŭsia ŭ hetuju spravu z hałavoj. Praŭda, mietady, z dapamohaj jakich jon vyrašyŭ zarablać, u vas vykličuć pytańni.
Naprykład, Branisłaŭ pryjazdžaje na stancyju chutkaj dapamohi i vyvozić adtul niešta, što nahadvaje pa vyhladzie fizrastvor — biasškodnuju vadkaść z dadatkam soli. Ale ž na zapraŭcy hetuju vadkaść dadajuć u harbatu i prapanujuć kiroŭcam jak «kamplimient ad ustanovy». Hety «kamplimient» dziejničaje jak imhniennaje słabilnaje. A kali nie chočaš spraŭlać patrebu ŭ kustach (za što atrymaješ štraf), płaci 10 rubloŭ za tualet.
Tym časam inšaha supracoŭnika zapraŭki sadžajuć u invalidny vazok, jon zhinaje kalena i zakručvaje nahu takim čynam, byccam častka nahi ŭ jaho amputavanaja. Kiroŭca, jaki pryjazdžaje na zapraŭku, daje łže-invalidu lišniuju kapiejku, a apieratary tym časam akcentujuć uvahu na jaho «kalectvie» — iłže-invalid paŭzie la mašyny, kab ustavić u jaje zapravačny šłanh. Vierahodna, televizijonščyki ličać, što heta pavinna vyhladać śmiešna.
Taksama Kamaroŭski pryjazdžaje ŭ dziciačy sadok i pakidaje jaho z bahažnikam, poŭnym miakkich cacak. Hetyja cacki supracoŭnica zapraŭki prapanuje klijentam nabyć za kuślivuju sumu dy jašče ŭ dadatak dazvalaje pahulać na nadzimanym dziciačym atrakcyjonie — redkasnaja prapanova!
I kali z vas užo dastatkova, rasčarujem — heta byli pieršyja 15 chvilin filma. Ahulny ž jaho čas razam z rekłamaj skłaŭ prykładna try z pałovaj hadziny.
Praciahvajem. Na hetuju zapraŭku pryjazdžaje novy supracoŭnik — małady chłopiec, jakoha abaviazkova treba ŭładkavać na pracu. Voś tolki jon jašče i nadta niahiehły, tamu ŭ pieršyja ž chviliny ŭ kadry łamaje na zapraŭcy elektroniku. Ramont kaštuje hrošaj, i heta jašče adna nahoda ich zarabić jak maha chutčej.
Jakoje vyjście? Zładzim na zapraŭcy stryptyz-kłub, vyrašaje Kamaroŭski. Adnak supracoŭnica zapraŭki Elvira vypivaje pierad ułasnym vystupam zanadta šmat ałkaholu i padaje prosta pierad šostam. Tady ŭ jaje paryku vakoł šasta tančyć jaje kaleha. Padman raskryŭsia, i mužyki-naviedniki kłuba nie strymali svaju ahresiju.
Ale Branisłaŭ nie zdajecca. Na jaho zapraŭcy pradajuć jak ałkahol vadkaść-amyvajku, i niaščasnyja spažyvalniki traplajuć u balnicu, a za imi i Kamaroŭski — treba ž adkazvać! Tady na zapraŭcy ładziać kazino, ale z techničnymi pieraściarohami: kab karystalniki nie vyjhrali na hulniavych aŭtamatach mašynu Kamaroŭskaha. Loša — supracoŭnik, jaki złamaŭ elektroniku — hety zaścierahalny miechanizm prybiraje, i Kamaroŭski zastajecca biez mašyny.
Tady chłopca narešcie vyrašajuć zamknuć u impravizavanaj kamiery — jakaja biełaruskaja rečaisnaść biez hetaha? Ale jon akazvajecca na voli, razzłavanyja kalehi honiacca za im i źbivajuć jaho na mašynie. I tut kiraŭnik inšaj zapraŭki tłumačyć Kamaroŭskamu — heta ž syn hienieralnaha!
«Čamu jana biesicca? Mužyka daŭno nie było!»
Branisłaŭ prydumlaje novuju biznes-ideju, i jana na dziva adekvatnaja: jon vyrašaje ładzić kinateatr na terytoryi zapraŭki i pakazvać tam niamoje kino pad žyvuju muzyku. Ale dla hetaha treba prajektar, i Loša kradzie jaho ź sielskaha kłuba susiedniaj vioski, a potym praz heta akazvajecca za kratami. Sadžaje jaho milicyjanierka, jakuju hraje Volha Niafiodava, i jana ŭ hetaj roli vielmi arhaničnaja.
Kalehi sprabujuć padmanam vyzvalić Lošu i abmiarkoŭvajuć, jak heta zrabić. U tym liku i razvažajuć, čamu milicyjant Babajeva «biesicca» — napeŭna, kažuć jany, «mužyka ŭ jaje daŭno nie było». A kali Elvira, ich kaleha, spraviadliva złujecca ŭ adkaz na takuju vysnovu, namiakajuć, što heta datyčyć i Elviry. I vyrašajuć padkłaści adnaho z zapravačnikaŭ pad Babajevu-Niafiodavu, ale taja nie takaja prostaja, i ŭ vyniku ŭ kamiery źbirajecca ŭvieś kalektyŭ AZS №1.
Źjava dla Biełarusi zvyčajnaja, tak što na Babajevu jany nie nadta kryŭdziacca. I prydumlajuć, jak dapamahčy joj atrymać zorački majora — dla hetaha treba, kab jana ich vypuściła, a jany, zapravačniki, tym časam skraduć mašynu, kaštoŭnuju dla kiraŭnika rajonnaj milicyi. Babajeva jaje znojdzie i atrymaje ŭznaharodu. Zamiest mašyny jany pamyłkova kraduć tank pad savieckuju pieśniu pra tankistaŭ, ale nieparazumieńnie vyrašajuć.
Asobna adznačym, što niepryjemna ŭražvaje ruskamoŭnaść filma. Darožnyja znaki, u tym liku z nazvami nasielenych punktaŭ, šyldy na budynkach — usio heta ŭ Biełarusi ad ANT zroblena na ruskaj movie. I tut možna viarnucca da raniejšaha tezisu pra toje, što sieryjał rabiŭsia pieradusim dla rasijskaha rynku.
Što jašče možna zrabić, kab vyjhrać konkurs? Padkłaści dziaŭčynu pad syna hienieralnaha! Kandydatka, plamieńnica Kamaroŭskaha, vyśviatlaje, što Loša — nasamreč machlar, jakoha naniaŭ Kinza (kaleha i supiernik Kamaroŭskaha ŭ spabornictvie za pavyšeńnie), kab toj dakładvaŭ jamu chitryja biznes-idei Kamaroŭskaha. I Branisłaŭ prydumlaje svaju hałoŭnuju chitraść: jon zapraŭlaje biaspłatna klijentaŭ, jakija nabuduć na zapraŭcy choć niešta, a kab nie atrymać pakarańnie za razdaču bienzinu, padstaŭlaje Kinzu — maŭlaŭ, heta jon źlivaje bienzin i heta ŭ jaho na zapraŭcy pustyja schoviščy dla bienzinu.
Kinza atrymlivaje piać hadoŭ za kratami z kanfiskacyjaj, a Kamaroŭski, kaniečnie, robicca namieśnikam hienieralnaha. Na elitnaj žoŭtaj mašynie Branisłaŭ pryjazdžaje na svaju byłuju zapraŭku i zabiraje adtul padapiečnych — maŭlaŭ, pajedziem, budu rabić vas načalnikami zapravak! Ale tut Loša naciskaje na knopku i mašyna padryvajecca, a dalej nam pakazvajuć Kinzu, jaki chitra śmiajecca za kratami.
Zdajecca, dla ŭsich hierojaŭ heta najlepšaje zakančeńnie.
«Naša Niva» — bastyjon biełaruščyny
PADTRYMAĆŠto zapisana aficyjnaj pryčynaj śmierci adzinaha syna Jarmošynaj?8
Kamientary