Папулярны польскі трэвэл-блогер расказаў пра сваю паездку ў Беларусь і даў парады
«Калі бачылі вайскоўцаў ці міліцыю, мы адразу хавалі свае камеры. Адразу. Людзі пытаюцца, чаму мы не знялі прыгожы чыгуначны вакзал у Мінску. Там усюды стаялі міліцэйскія патрулі».
Папулярны польскі трэвел-блогер Пётр Паёнк (Piotr Pająk) пабываў у больш чым 120 краінах свету. Сярод іх такія небяспечныя, як Самалі, Сірыя, Афганістан.
Яго канал у ютубе мае больш за 500 тысяч падпісчыкаў. У пачатку ліпеня мужчына разам са сваёй дзяўчынай прыехаў у Беларусь. Пара наведала Брэст і Мінск. Сваімі ўражаннямі падарожнікі падзяліліся ў чатырох відэа, адно з якіх цалкам прысвяцілі адказам на пытанні. Пераказваем самае цікавае адтуль.
Як праходзілі мяжу
Маладыя людзі адзначаюць, што іх папярэджвалі аб небяспецы. Аднак у паездцы яны не адчувалі ніякага дыскамфорту.
«Тое, як сітуацыю прадстаўляюць у СМІ, заўсёды вельмі істотна адрозніваецца ад рэчаіснасці. І шмат у якіх краінах я ў гэтым упэўніваўся», — сцвярджае Паёнк.
Для таго, каб скараціць час, пара даехала на машыне да мяжы, а там падсела ў адзін з аўтобусаў, што былі наперадзе чаргі. За гэта яны заплацілі столькі ж, колькі б каштаваў білет з Тарэспаля да Брэста. Пры гэтым, як адзначае блогер, яны ашчадзілі 10 гадзін часу.
Падарожнікі папярэджваюць, што кожнага паляка, які першы раз едзе ў Беларусь, на беларускім баку запрашаюць на размову. Так атрымалася і з імі. Пры гэтым маладыя людзі не лічаць такую з'яву праблемай.
Як расказвае Пётр, у іх праверылі тэлефоны, сацыяльныя сеткі, кантакты, галерэю.
«Гэта нармальна. Упэўнены, што гэта на 100% будзе з кожным, хто першы раз едзе, пакуль не зменяцца часы. Але мы ведалі, што гэта будзе і былі падрыхтаваныя. Нам пра гэта адразу сказаў кіроўца. (…) І гэта не была такая размова, калі над вамі стаяць і крычаць. З намі нармальна размаўлялі. Падымаецеся. Пішаце код [тэлефона]. Ён яго праглядае», — дзеліцца ўражаннямі блогер.
Дзяўчына дадала, што яе тэлефон не быў падключаны да інтэрнэту, але супрацоўнік падключыў да сваёй сеткі і праверыў. Падчас размовы ў іх пыталі, ці былі яны ва Украіне. А ў канцы зрабілі здымак IMEI тэлефонаў.
«Не ведаю, ці зрабілі яны з гэтым нешта, ці сачылі за намі пазней. Не маю паняцця, але яны гэта зрабілі. Таму да гэтага (праверкі. — НН) трэба падрыхтавацца», — раіць Паёнк.
Як паводзілі сябе ў краіне
Падарожнікі адзначаюць, што ўвесь час памяталі аб тым, каб не зрабіць нечага, што можа стварыць ім праблемы.
«Мы ішлі па горадзе, і я ўбачыў прыгожы будынак з вялікімі слупамі на ўваходзе. Я яго сфатаграфаваў. А пасля аказалася, што гэта сядзіба КДБ. Шчасце, што я пра гэта даведаўся з нейкага блогу і прыбраў з тэлефона. Бо з гэтым можна было мець праблемы.
Калі бачылі вайскоўцаў ці міліцыю, мы адразу хавалі свае камеры. Адразу. Людзі пытаюцца, чаму мы не знялі прыгожы чыгуначны вакзал у Мінску. Там усюды стаялі міліцэйскія патрулі. Як толькі мы іх бачылі, то паварочвалі галовы ў іншы бок, а камеры апускалі. Нічога не здымалі. Стараліся не мець дадатковых клопатаў, каб усё была бяспечна і добра», — згадваюць падарожнікі.
Што выклікала захапленне
Падарожнікі падзяліліся сваім захапленнем ад дранікаў.
«Яны былі настолькі смачныя. Яны цалкам адрозніваюцца ад тых, што мы каштавалі ў Польшчы. (…) Бульба — гэта народная гародніна ў Беларусі, яны здольныя з яе прыгатаваць вельмі шмат страваў. Што б вы там ні замовілі, калі гэта будзе з бульбай, то павінна быць добра!» — адзначае блогер.
Акрамя гэтага, падарожнікі былі здзіўлены чысцінёй гарадоў.
«Станоўчае ўражанне на мяне зрабіла тое, што было вельмі чыста. Абсалютна не было ніякіх п'яніц, бамжоў. І гэта мяне вельмі здзівіла. Як я сабе ўяўляла Беларусь, так яна і выглядала, толькі яшчэ чысцейшая. (…) Мне падаецца, што Беларусь увогуле з'яўляецца вельмі чыстай», —
адзначае дзяўчына і заўважае: «Але для мяне асабіста гэта не тое месца, куды я буду вяртацца».
Падарожнікі зайшлі таксама ў Mac.by і былі вельмі здзіўлены тым, што ежа там нічым не адрозніваецца ад традыцыйных страваў у Макдональдсе. «Гэта падман. Навошта гаварыць пра нейкія санкцыі, калі змяняюць толькі назвы?» — абурылася жанчына.
Як камунікавалі
Маладыя людзі адзначаюць, што мелі праблемы з камунікацыяй пад час свайго падарожжа па Беларусі.
«Я ўвогуле расчараваная. Бо паходжу з Падляшша. Мае дзед і бабка размаўлялі на падляскай гаворцы, і я была ўпэўнена, што з гэтай прычыны буду лепш разумець людзей, якія маюць трохі падобную мову. Думала, што гэта будзе лёгка. Абсалютна не было лёгка з імі паразумецца. Даводзілася часта пытацца, ці размаўляе хто на англійскай мове», — дзеліцца сваім расчараваннем дзяўчына.
Пётр дадае: «На англійскай у нейкіх рэстаранах дзяўчына ці хлопец нешта здолелі патлумачыць, але нельга сказаць, што гэта было беспраблемна. Часам мы выкарыстоўвалі перакладчык на тэлефоне. З камунікацыяй дакладна не было лёгка».
Чаму паехалі ў Беларусь
Пётр адзначае: «Ведаю, што шмат людзей дрэнна ставяцца да Беларусі з-за таго, што там адбываецца. Але памятайце — не мяшайце палітыку і нармальных людзей. Не кожны з іх вінаваты ў тым, што ў гэтай краіне адбываецца».
Блогер згадаў, што нядаўна атрымаў паведамленне «Як можаце ехаць у Беларусь? Так вы падтрымліваеце рэжым Лукашэнкі».
«Едучы туды, мы рэзервуем гатэль у нармальных людзей. Ідзём у рэстаран з нармальнымі людзьмі. Так мы дапамагаем нармальным людзям жыць. Мы не аддаем грошай яму (Лукашэнку. — НН)», — тлумачыць сваю пазіцыю Паёнк.
Блогер дадае, што матывам для наведання Беларусі было тое, што да гэтай паездкі ён не быў толькі ў чатырох краінах Еўропы. Цяпер іх засталося тры — Расія, Малдова і Ісландыя.
Як склаўся лёс хлопца з вядомага жыццесцвярджальнага фота студэнцкага маршу-2020?4
Каментары