Магутнасць выбуху на станцыі Азярышча даволі высокая, але асаблівых пашкоджанняў няма — Супольнасць чыгуначнікаў
«Супольнасць чыгуначнікаў Беларусі» паведаміла, што падаваная раней інфармацыя адносна здарэння на станцыі Азярышча пад Мінскам знаходзіць сваё пацвярджэнне з розных крыніц.
Паводле ўдакладненай інфармацыі стала вядома, што выбух на станцыі Азярышча адбыўся паміж 4 і 6 каляінамі (бліжэй да высокіх грузавых платформаў). Магутнасць выбуху ацэньваецца як даволі высокая.
Тым не менш, адзначаецца, што
асабліва сур'ёзных пашкоджанняў інфраструктуры (пуцей і іншых збудаванняў ды прылад) не адбылося. Наступствы выбуху не пацягнулі за сабой затрымак цягнікоў і перапынкаў у руху, паколькі 1 і 2 галоўныя каляіны не былі пашкоджаныя. Неабходнасць у аднаўленчых і значных рамонтных працах адсутнічае.
На працягу ўсяго дня прадстаўнікі сілавых ведамстваў пастаянна знаходзіліся ў будынку ўпраўлення БЧ і Цэнтра кіравання перавозкамі (ЦКП). Праводзіліся апытанні работнікаў службы перавозак, дыспетчарскага персаналу і іншых работнікаў звязаных з рухам цягнікоў.
Цяпер рэалізуюцца меры, накіраваныя на ўзмацненне аховы чыгуначнай інфраструктуры. Колькі такое становішча працягнецца — невядома.
Каментары