Невычэрпная крыніца энергіі? Навукоўцы паўтарылі прарыўны эксперымент па тэрмаядзерным сінтэзе. Магутнасць выйшла яшчэ большая
Гэта была не выпадковасць: даследчыкі з Lawrence Livermore National Laboratory ў Каліфорніі паўтарылі свой прарыўны эксперымент па тэрмаядзерным сінтэзе. Толькі гэтым разам вынікі яшчэ лепшыя.
Урадавыя навукоўцы ЗША другі раз дасягнулі чыстага прыросту энергіі ў рэакцыі тэрмаядзернага сінтэзу, калі 30 ліпеня лазеры зноў сышліся на малюсенькім залатым цыліндры, які змяшчае дэйтэрыева-трытыевую паліўную таблетку з алмазным пакрыццём, паведамляе TechCrunch. Калі 192 прамяні трапляюць унутр цыліндра, іх энергія ператвараецца ў рэнтгенаўскае выпраменьванне. Затым гэтыя рэнтгенаўскія прамяні «бамбардуюць» спецыяльную паліўную таблетку, прымушаючы яе выбухнуць.
У мінулым снежні першая паспяховая рэакцыя ядзернага сінтэзу вызваліла 3,15 мегаджоўля энергіі, што складала прыкладна 150 працэнтаў ад 2,05 МДж у лазерах. Гэтым разам навукоўцы атрымалі больш за 3,5 мегаджоўля, пра што паведамілі два чалавекі, знаёмыя з папярэднімі вынікамі. Гэтай энергіі было б дастаткова для працы бытавога праса на працягу гадзіны.
Лабараторыя пацвердзіла паспяховае паўтарэнне эксперымента, дадаўшы, што аналіз вынікаў працягваецца і лабараторыя мае намер паведаміць падрабязнасці альбо на навуковай канферэнцыі, альбо ў рэцэнзаванай публікацыі.
Нягледзячы на тое, што ўжо другі падобны эксперымент не з’яўляецца такой сенсацыяй у навуковым свеце, якой быў снежаньскі, — ён усё ж не менш важны. Прарыў бессэнсоўны, калі яго нельга паўтарыць. Таму той факт, што навукоўцы двойчы дасягнулі чыстай станоўчай магутнасці тэрмаядзернага сінтэзу, павінен падбадзёрыць інвестараў, якія ўклалі больш за чатыры мільярды даляраў у галіну ў 2021 і 2022 гадах.
FT цытуе міністарку энергетыкі ЗША Джэніфер Грэнхалм, якая ў снежні назвала дасягненне запальвання «адным з самых уражальных навуковых подзвігаў XXI стагоддзя». Дасягненне чыстага прыросту энергіі дзесяцігоддзямі разглядалася як важны крок у доказе магчымасці камерцыйных электрастанцый тэрмаядзернага сінтэзу. Аднак ёсць яшчэ некалькі перашкод, якія трэба пераадолець.
Прырост энергіі ў гэтым кантэксце параўноўвае толькі атрыманую энергію з энергіяй у лазерах, а не з агульнай колькасцю энергіі, якая выцягваецца з сеткі для сілкавання сістэмы, што відавочна значна вышэйшая. Паводле ацэнак навукоўцаў, камерцыйны сінтэз запатрабуе рэакцый, якія генеруюць у 30—100 разоў больш энергіі ў лазерах.
Да таго ж цяперашняя ўстаноўка робіць максімум адзін стрэл у дзень, у той час як працоўная сілавая ўстаноўка, магчыма, павінна будзе зрабіць некалькі стрэлаў за секунду.
Навукоўцы б'юць трывогу — сусліку пагражае поўнае выміранне5
Каментары