У 2015 годзе прагназуецца нулявы прырост золатавалютных рэзерваў Беларусі. Адпаведны прагноз замацаваны ў праекце Асноўных кірункаў грашова-крэдытнай палітыкі на наступны год, які падрыхтаваў Нацыянальны банк.
У наступным годзе, як лічыць рэгулятар, важнай задачай будзе з'яўляцца падтрыманне рэзерваў на тым узроўні, які склаўся да пачатку 2015 года.
«Важнай агульнадзяржаўнай задачай у 2015 годзе застанецца падтрыманне ўзроўню золатавалютных рэзерваў ва ўмовах значных знешніх і ўнутраных выплат», — гаворыцца ў праекце Асноўных кірункаў, з тэкстам якога азнаёміўся БелаПАН.
Пры гэтым у Нацбанку ўдакладняюць, што ўзровень рэзерваў будзе вызначацца «пераважна станам знешняга гандлю, аб'ёмамі прыцягнення прамых замежных інвестыцый і рэфінансавання дзяржавай абавязацельстваў у замежнай валюце».
На 2014 год Нацыянальны банк у Асноўных кірунках грашова-крэдытнай палітыкі закладваў павелічэнне рэзерваў на 200—500 млн. долараў. Па стане на 1 кастрычніка золатавалютныя рэзервы Беларусі складалі 6 млрд. 4,6 млн. долараў і знізіліся з пачатку года на 646,3 млн. долараў.
Разам з тым падтрыманню ўзроўню золатавалютных рэзерваў Беларусі садзейнічалі ў 2014 годзе знешнія і ўнутраныя пазычанні. Паводле звестак Міністэрства фінансаў, за студзень—жнівень Беларусь прыцягнула знешнія дзяржаўныя пазыкі на суму 3 млрд. 50,2 млн. долараў, унутраны дзярждоўг павялічыўся за першыя восем месяцаў гэтага года на 5,1 трлн. рублёў.
Ва Украіне загінула 24-гадовая беларуская добраахвотніца Марыя Зайцава31
Каментары