Šče ne vmerła

Try dni va Ŭkrainie išła vajna nervaŭ. Ułady nia majuć srodkaŭ, kab zadušyć narodnaje paŭstańnie. Demanstranty nia majuć dosyć siły, kab uziać pad kantrol Administracyju prezydenta, CVK i telebačańnie. Kučma spadziajecca, što revalucyja vydychniecca. Juščanka čakaŭ, što ŭłady nia vytrymajuć cisku i pašyraŭ «vyzvalenuju zonu» ŭ centry stalicy. Uviečary ŭ sieradu Centravybarkam abvieściŭ Viktara Janukoviča prezydentam. Za časoŭ Kraŭčuka-Kučmy ŭładnyja kłany skałacili bahaćci, jakija aceńvajucca ŭ 40 młrd dalaraŭ. Jany nia mohuć dapuścić takoj ryzyki dla svaich kapitałaŭ, jak zaniaćcie pasady prezydenta niekantralavanym Viktaram Juščankam. Ukraina — na miažy revalucyi abo dyktatury.

Vyjduć, nia vyjduć?

Ekzyt-poł daŭ Juščanku 11-pracentny adryŭ ad V.Janukoviča. Ab 11-j hadzinie ranicy źjavilisia aficyjnyja źviestki CVK Ukrainy, dyjametralna supraćlehłyja: pavodle ich za Janukoviča addali svaje hałasy 49,57% ukraincaŭ, za Juščanku — 46,57%.

Ad 9-j ranku ludzi pačali źbiracca na Majdanie Niezaležnaści. Pierad imi vystupiŭ Viktar Juščanka i paviedamiŭ, što zapatrabavaŭ sklikać niečarhovaje pasiadžeńnie Viarchoŭnaj Rady, kab na im deputaty abjavili niedavier CVK.

Harsaviet Lvova pieršym pryniaŭ rašeńnie pryznać Juščanku zakonnym prezydentam i vykonvać jaho nakazy. Harsaviet Kijeva pastanaviŭ zabiaśpiečyć adpaviednyja ŭmovy dla praviadzieńnia masavych akcyj pratestu. Rašeńnie padtrymali 75 deputataŭ, dva ŭstrymalisia.

Uviečary ŭ paniadziełak na mitynh u centry Kijeva sabralisia ŭžo sotni tysiač čałaviek. Ułada hetaha jaŭna nie čakała. Nie čakała i Maskva, Uładzimier Pucin pieršy pavinšavaŭ Viktara Janukoviča ź pieramohaj na vybarach.

Na 14.00 aŭtorka pryznačana niečarhovaje pasiadžeńnie Viarchoŭnaj Rady. Stała jasna, što apazycyi ŭdałosia paźbiehnuć siłavoha vyrašeńnia kanfliktu da padjezdu ŭ Kijeŭ aktyvistaŭ «Siły narodu» z rehijonaŭ.

Biesterminovy strajk

U noč z paniadziełka na aŭtorak praciahvała pavialičvacca kolkaść namiotaŭ na Chraščaciku. U Kijeŭ praz kardony milicyi i metaličnyja šypy na darohach prabivajucca pieršyja kalony juščankaŭcaŭ z addalenych rehijonaŭ Ukrainy.

Na ranišni mitynh na Majdanie Niezaležnaści ŭ Kijevie sabrałasia ŭžo kala 150 tys. čałaviek. Deputat Mikoła Tamienka, davieranaja asoba Juščanki, zaklikaŭ ludziej iści da parlamentu.

Aproč Kijeva, adbyvajucca mitynhi ŭ padtrymku Juščanki ŭ inšych haradach Ukrainy: Charkavie (50 tys. udzielnikaŭ), Žytomiry, Vińnicy (30 tys. udzielnikaŭ), Adesie, Zaparožžy, Kamiancy-Padolskim, Pałtavie, Sumach (40 tys. udzielnikaŭ), Čarkasach, Łucku, Čarnaŭcach (30 tys. udzielnikaŭ), Kiravahradzie, Dnieprapiatroŭsku dy Lvovie (100 tys. udzielnikaŭ). U Čarnaŭcach ludzi patrabujuć ad miascovaj rady deputataŭ padtrymać rašeńni Lvova, Kijeva, Ivana-Frankoŭsku, Vińnicy i Ciarnopalu.

Biesterminovy strajk abviaścili studenty j prafesura Kijeva-Mahilanskaj akademii. Rektar Nacyjanalnaha techničnaha ŭniversytetu začytaŭ studentam rašeńnie ab strajku. Rektar Kijeŭskaha dziaržuniversytetu dazvoliŭ studentam prapuskać zaniatki, i 5-tysiačnaja kalona na čale z aktyvistami «Pary», ukrainskaha «Zubra», vypraviłasia na Majdan Niezaležnaści.

Dyrekcyja aeraportu «Baryspal» vydzieliła dva aŭtobusy, kab achvotnyja rabotniki mahli pajechać u Kijeŭ na mitynh. Dyrektara aeraportu źniali jašče pierad pieršym turam za niežadańnie finansavać kampaniju Janukoviča.

Spakojny jak udaŭ

Udzień Viktaru Janukoviču pazvaniŭ Alaksandar Łukašenka i pavinšavaŭ jaho ź pieramohaj.

«Pucin apynuŭsia ŭ kiepskaj kampanii. Aproč jaho, Janukoviča pavinšavaŭ ź pieramohaj tolki Łukašenka», — adznačyła gazeta.ru.

Analityki doŭhija miesiacy nie mahli ŭrazumieć. Čamu z tuzinu pretendentaŭ Kučma vybraŭ Viktara Janukoviča — adnaho z najmienš prymalnych, dvojčy sudzimaha recydyvista. Padziei paniadziełka—sierady dali adkaz. Kučmisty pradbačyli radykalizacyju padziej i vybrali kandydata, jaki nia maje tarmazoŭ. Luby inšy paddaŭsia b naporu paŭmiljonnych demanstracyj.

Dla zaćviardžeńnia dzionnaha paradku ŭ VR patrebna prysutnaść 226 deputataŭ. Juščanka zaklikaŭ ludziej pryjści da VR, kab zmusić deputataŭ padtrymać razhlad pytańnia ab vybarach.

8 viadučych Televizijnaj słužby navin na kanale «1+1» admovilisia čytać chłuśniu ŭ etery. Da ich dałučylisia taksama niekatoryja žurnalisty inšych telekanałaŭ.

Moładzievaja hramadzkaja arhanizacyja «Pora» pryznačyła na sieradu, 24 listapada, biesterminovy ahulnanacyjanalny studencki strajk.

Labiedźka biare słova

Na mitynhu ŭ padtrymku Juščanki ad imia demakratyčnych siłaŭ Biełarusi, što «try dni tamu stvaryli adzinuju kaalicyju», vystupaje lider AHP Anatol Labiedźka. Nad Majdanam — dziasiatki bieł-čyrvona-biełych ściahoŭ. Pra svaju padtrymku taksama zajaviŭ polski deputat u Eŭraparlamencie eks-premjer Ježy Buzak. Płošča vitaje jaho avacyjami.

Ukrainskaja apazycyja prymaje zvarot da parlamentaŭ i narodaŭ śvietu, u jakim zaklikaje padtrymać Juščanku jak prezydenta Ŭkrainy.

Haradzkija rady pa ŭsioj Ukrainie praciahvali pryznavać Juščanku prezydentam. U aŭtorak heta zrabili deputaty Chmialnickaha, Sambaru (Lvoŭskaja vobł.), Łucku, Truskaŭcu i Drahobyču (Lvoŭskaja vobł.), Vyšharadu (Kijeŭskaja vobł.), Roŭna.

Adbyłosia pasiadžeńnie Viarchoŭnaj Rady, na jakim, adnak, prysutničaŭ tolki 191 deputat. Kamunisty, ad jakich zaležała najaŭnaść kvorumu, admovilisia brać udzieł u realizacyi scenaru, «vypisanaha zaakijanskimi palittechnolahami».

Pry-sia-haj!

Na pasiadžeńni Viarchoŭnaj Rady Juščanka paviedamiŭ ułasnyja vyniki vybaraŭ. Štab Juščanki zafiksavaŭ 11 110 parušeńniaŭ zakonu padčas druhoha turu. U druhim tury ŭ Danieckaj vobłaści kolkaść vybarcaŭ pavialičyłasia na 500 tys. «Dzie jany paradžalisia za try tydni?» — rytaryčna pytajecca Juščanka. Tym nia mienš, pavodle padlikaŭ štabu Juščanki, navat z ulikam hetych falsyfikacyj kandydat ad apazycyi pieramahaje ź pieravahaj u 1%, u adpaviednaści z kopijami pratakołaŭ «z mokraju piačatkaju».

Chod pasiadžeńnia byŭ pierarvany veteranam ukrainskaje palityki, byłym dysydentam Iharam Juchnoŭskim, jaki vyjšaŭ na trybunu z ukrainskaj relikvijaj — asobnikam Astroskaje Biblii — i prapanavaŭ Viktaru Juščanku prynieści prezydenckuju prysiahu. «Pry-sia-haj! Pry-sia-haj!» — skandujuć dziasiatki tysiač demanstrantaŭ pad ścienami Rady i ŭ Maryinskim parku. Śpikier Uładzimier Litvin vyhukvaje «Nie pieratvarajcie ŭsio ŭ kamedyju!» i abviaščaje pasiadžeńnie zakrytym, teletranślacyja pierapyniajecca. Viktar Juščanka kładzie ruku na Bibliju, prysiahaje «na viernaść ukrainskamu narodu», całuje knihu. Jamu dorać bukiet aranžavych kvietak, prysutnyja deputaty śpiavajuć nacyjanalny himn. 200 tysiač jahonych prychilnikaŭ tryjumfujuć, źminajuć šerahi specnazaŭcaŭ i sprabujuć vybić bramu Rady. Z akon ich vitajuć paplečniki Juščanki i žurnalisty z aranžavymi ściahami. Paplečniki sami razhublenyja — jany nie čakali takoha pavarotu padziejaŭ.

Juščanka i jahonaje najbližejšaje koła — Julija Cimašenka i vice-śpikier Alaksandar Zinčanka — biaruć inicyjatyvu ŭ svaje ruki i pryśpiešvajuć padziei. Kučmisty razhublenyja. Jany chacieli b zaciažki času, pieramovaŭ. Ci padzie Administracyja prezydenta Ŭkrainy na Bankovaj?

Boršč z čystych ruk

Žychary Kijeva prynosiać udzielnikam mitynhu ježu i ciopłuju vopratku. Asabliva kranajuć babulki, što prynosiać kastruli z barščom. Sacyjalist Jury Łucenka, kamendant namiotavaha stanu, rasparadžajecca: u metach praduchileńnia incydentaŭ brać ježu tolki z ruk vyznačanych ludziej, jakija pierad razdačaj abaviazanyja prachodzić dezynfekcyju.

ZŠA nie pryznajuć ukrainskich vybaraŭ. Michaił Saakašvili źviartajecca pa-ŭkrainsku z słovami padtrymki da ŭkrainskaha narodu.

Pres-sakratar MZS Markijan Łubkiŭski zajaviŭ pra «poŭnuju i biezahavoračnuju padtrymku» Viktara Juščanki i ahučvaje adpaviednuju zajavu, padpisanuju 150 dyplamatami zamiežnapalityčnaha viedamstva.

Kiraŭniki ŭsich chryścijanskich cerkvaŭ Ukrainy, akramia pravasłaŭnych Maskoŭskaha patryjarchatu, vykazali zaniepakojenaść z nahody masavych falsyfikacyj padčas vybaraŭ i zaklikali viernikaŭ baranić spraviadlivyja vyniki hałasavańnia. Zvarot da narodu Ŭkrainy padpisali patryjarch Fiłaret, kardynał hreka-katalikoŭ Lubamir Huzar, biskup Carkvy chryścijan viery evanhielskaj Michaił Panočka, namieśnik staršyni Kanferencyi ryma-katalickich biskupaŭ Markijan Trafimjak, biskup Chryścijanskaj evanhielskaj carkvy Leanid Padun.

Tymčasam na stadyjonie «Dynama» adbyvajecca futbolny matč «Dynama»—«Roma». Hledačy, u jakich na ŭvachodzie skanfiskavali ŭsiu aranžavuju symboliku, vopleskami sustrakajuć zamienu čorna-biełaha miača na aranžavy — čorna-biełaha było nie vidać na śniezie. Kijeŭskaja kamanda amal adrazu paśla zamieny razmočvaje bramu haściej i pieramahaje ź likam 2:0.

Demanstranty vypraŭlajucca da Administracyi prezydenta, atačyŭšy jaje z troch bakoŭ. Tam ich čakajuć piatnaccacišarahavyja kardony danieckich i krymskich «barsaŭcaŭ». Va ŭnutranym dvary dziažurać spechrupy ŭ maskach z aŭtamatami.

Julija Cimašenka załazić na hruzavik ź piaskom, što blakuje darohu, i ŭhavorvaje amonaŭcaŭ rasstupicca. Jaje prapuskajuć u budynak Administracyi. Pravioŭšy tamaka peŭny čas, jana vychodzić i abviaščaje, što Kučma hatovy vieści pieramovu ab pieradačy ŭłady. Jana kaža taksama, što ŭ pałacy znachodziacca ŭzbrojenyja asoby, u tym liku rasiejcy, jakija hatovy stralać u ludziej. «Jon padmanie! Sioń-nia!» — skanduje vulica Instytuckaja.

Kala 22.00 dachodziać viestki pra nadzvyčajnaje pasiadžeńnie ŭradu. Usie čakajuć abviaščeńnia nadzvyčajnaha stanovišča. Zamiest hetaha dzień skančajecca začytvańniem na UT-1 zajavy Kučmy pra toje, što siła suprać mirnych demanstrantaŭ nia budzie ŭžytaja, i zaklikaje Juščanku j Janukoviča sieści za stoł pieramovaŭ.

Košt arendy kvateraŭ na sutki ŭ Kijevie vyras u try razy ŭ paraŭnańni ź pieradrevalucyjnym peryjadam.

Usiu noč na Majdanie Niezaležnaści zastavalisia ludzi. Kolkaść namiotaŭ vyrasła da 1 600. Taksama ŭsiu noč praciahvałasia abłoha budynku Administrycyi prezydenta. Uładam udajecca paśpiachova blakavać bolšaść aŭtadaroh. Adnak u Kijeŭ praciahvajuć pratočvacca ludzi z pravincyi. Na darozie z Vałyni da Kijeva staić kalona z 70 mašyn, daroha ź Lvova na Kijeŭ zablakavanaja.

Pačynajecca z tualetu

Mer Kijeva daručyŭ hałoŭnamu kiraŭnictvu žyllova-kamunalnaj haspadarki haradministracyi zabiaśpiečyć ustanoŭku dadatkovych śmietnic i kruhłasutačny vyvaz śmiećcia, a taksama ŭstanavić nieabchodnuju kolkaść prybiralniaŭ.

A 10-j ranicy adnaviŭsia mitynh u Kijevie, spačatku z udziełam usiaho 50 tys. čałaviek. Z Majdanu kamendant namiotavaha haradku vypraŭlaje hrupy demanstrantaŭ, jakija majuć zablakavać važnyja abjekty ŭ horadzie. Pieršaja hrupa blakuje Ŭkrainski Dom, štab-kvateru Rasiejskaha klubu — arhanizacyi, stvoranaj pasłom Rasiei V.Čarnamyrdzinym dla padtrymki V.Janukoviča. Ludzi z Vałynskaj i Dnieprapiatroŭskaj abłaściej adpraŭlenyja blakavać Centrabank Ukrainy, a z Kijeŭskaj zamianili tych, jakija ŭsiu noč blakavali prezydencki pałac.

Kijeŭski metrapaliten pačaŭ prapuskać ludziej biez žetonaŭ. Ludzi apuskajuć hrošy prosta ŭ vialikija metaličnyja skrynki na ŭvachodzie.

A 16-j pačaŭsia čarhovy mitynh. Juščanka začytvaje zajavu M.Harbačova: «Toje, što adbyvajecca va Ŭkrainie, — heta śviedčańnie taho, što ŭpała druhaja ściana». Śpiavačka Rusłana abviaščaje haładoŭku pratestu.

Usie čakajuć abiacanaha rašeńnia Centravybarkamu. A 18.37 staršynia Centravybarkamu adesit Kivałaŭ abviaščaje Viktara Janukoviča abranym prezydentam Ukrainy. Čatyry členy CVK z 15 admaŭlajucca padpisvać pratakoł. Niekatoryja žurnalistki ŭ CVK płačuć.

Štab Viktara Juščanki zajaviŭ, što ŭsie pravavyja metady dziejańnia vyčarpanyja, abvieściŭ pra stvareńnie Kamitetu nacyjanalnaha paratunku i zaklikaŭ da ahulnanacyjanalnaha palityčnaha strajku.

ZŠA zajavili, što nie pryznajuć vynikaŭ vybaraŭ, abvieščanych Centravybarkamam. U svaju čarhu, prezydent Kučma źvinaviciŭ apazycyju ŭ ažyćciaŭleńni dziaržaŭnaha pieravarotu.

Nichto nie biarecca pradkazać, čym skončycca supraćstajańnie ŭ Kijevie.

Arciom Lava, Aleś Trafimienka.

Kijeŭ—Miensk

• 0
• 0
• 0
• 0
• 0
• 0
• 0
• 0