Kandydaty nie drukujuć ulotki, kab nie viartać hrošy dziaržavie?

Nie brać ni kapiejki ŭ CVK na ahitacyju bajkotu vybaraŭ jašče da pačatku vybarčaj kampanii vyrašyła Abjadnanaja hramadzianskaja partyja. Kab nie stvarać finansavych prablem svaim «śpikieram», tłumačyć lidar AHP Anatol Labiedźka. I prosiać hrošaj na ŭlotki z zaklikam nie chadzić na vybary… u samich vybarščykaŭ.

Anatol Labiedźka: «Ulotku nadrukavali z takim pasłańniem: u vas jość vybar — vy možacie pieraličyć hrošy na niekalki rachunkaŭ albo samastojna nadrukavać nakładam 10, 100 ci 1000 hetuju ŭlotku i raspaŭsiudzić».

Drukavanaj pradukcyi z zaklikam bajkatavać vybary ŭ AHP praktyčna niama. Ci nie dziŭna heta?

«Zrabili ŭsio pravilna, — upeŭnieny Anatol Labiedźka. — Na nas pracujuć sacyjalnyja sietki, na nas pracuje internet, zaraz my ŭzmocnim pracu ź niezaležnaj presaj, z drukavanymi vydańniami».

Palitołah Jaŭhien Prejhierman nie bačyć vialikaj straty ad taho, što ŭlotak niama, bo heta ŭčorašni dzień.

Jaŭhien Prejhierman: «Cikavaja mahčymaść debataŭ. Kali my aryjentujemsia na aŭdytoryju, jakaja nie asabliva palityzavanaja, nie karystajecca internetam, ludzi za 55 — 60 hadoŭ, to

telebačańnie — bolš cikavy srodak danieści svoj punkt hledžańnia».

Praŭda, z tele- i radyjoefira źniali 31 vystup kandydataŭ ad AHP. Było 11 vystupaŭ na TB i 4 na radyjo. Prejhierman ličyć, što ŭ našych umovach i heta niamała.

Nie brać hrošy na ahitacyju zaklikała svaich kandydataŭ i Partyja BNF. Jany siońnia taksama praktyčna biez ulotak. Da bajkotu «beneefaŭcy» nie zaklikajuć, a «zajmajucca prapahandaj kaštoŭnaściaŭ Partyi BNF, jaje płatformy». Lidar partyi Alaksiej Janukievič pryznaje, što biez ulotak ahitacyja, biezumoŭna, zhubiła.

Alaksiej Janukievič: «Kali b brali, to było b bolš ahitacyjnych materyjałaŭ. Heta fakt, heta ja pryznaju, ale takoje było naša śviadomaje rašeńnie».

Rašeńnie było pryniataje, kab kandydaty… nie pieradumali zdymacca z vybaraŭ! Bo 5 miljonaŭ rubloŭ daviadziecca viartać sa svajoj kišeni.

Staršynia BSDP (Hramada) Iryna Vieštard na pytańnie, jak kandydaty biez hrošaj ahitujuć za siabie, adkazvaje: «Jak mohuć».

Usie 11 kandydataŭ, jakich padtrymlivaje kampanija «Havary praŭdu!», hrošy ŭ CVK uziali. I amal usie skarystali. Namieśnik lidara kampanii Andrej Dźmitryjeŭ nie vyklučaje, što napiaredadni dnia hałasavańnia budzie pryniata rašeńnie ab źniaćci «niaklajeŭcaŭ». Viartać hrošy dziaržavie hatovyja.

Z ulotkami ci bieź ich, ale stratehiju «ŭdziełu sa źniaćciem» Jaŭhien Prejhierman ad pačatku nazyvaje nieefiektyŭnaj. Bo nie viadzie da pieramohi. Ale daje mahčymaść kamunikavać z vybarščykami i dazvalaje vykazać svaju maralnuju pazicyju. Što dla bolšaści — hałoŭnaje na hetych vybarach. A dziaržavie heta pazicyja dazvalaje viarnuć u kaznu jak minimum 335 miljonaŭ rubloŭ: pa 5 nieskarystanych miljonaŭ 36 kandydataŭ ad AHP i 31 ad PBNF. A jość jašče 22 kandydaty ad «Havary praŭdu!» i BSDP (Hramada), pytańnie źniaćcia jakich pakul nie vyrašana.

• 0
• 0
• 0
• 0
• 0
• 0
• 0
• 0