Piać faktaŭ pra Andreja Kabiakova

1. Naradziŭsia ŭ Maskvie

Da hetaha z kiraŭnikoŭ Administracyi prezidenta tolki Urał Łatypaŭ (2001–2004) nie byŭ uradžencam Biełarusi. Zrešty, Kabiakoŭ žyvie na terytoryi Biełarusi z trochhadovaha ŭzrostu. Niamała kryvi jon papiŭ rasijskamu boku na pieramovach ab enierhanośbitach, što tradycyjna adbyvalisia pad Novy hod u Kramli. «A što mnie rabić u Maskvie? Tak, ja tam naradziŭsia, ale z 1963 hoda žyvu tut. Nikudy źjazdžać z našaj krainy ja nie źbirajusia», — skazaŭ niejak Andrej Kabiakoŭ. Usio ž na histaryčnuju radzimu vypravicca jamu daviałosia — u jakaści pasła. Praŭda, prabyŭ jon na hetaj pasadzie mienš za hod (ad listapada 2011).

Alaksandr Łukašenka časta pryznačaje na važnyja pasady nieŭradžencaŭ Biełarusi. Takija ludzi apryjory nie mohuć vyraści ŭ kankurentaŭ jamu. Na siońnia, ministry abarony, unutranych spravaŭ, pa nadzvyčajnych situacyjach i kiraŭnik KDB — usie rodam nie ź Biełarusi.

2. Skončyŭ Avijacyjny instytut

Kabiakoŭ atrymaŭ dobruju adukacyju. U 1983 hodzie jon skončyŭ Maskoŭski avijacyjny instytut. Pastupić tudy ŭ 1970-yja było nialohkaj spravaj. Praŭda, u lotčyki chłopiec nie pajšoŭ. U hod abviaščeńnia niezaležnaści Kabiakoŭ jašče skončyŭ narhas i Instytut palitałohii i sacyjalnaha ŭpraŭleńnia KPB.

3. Prateže Daŭhalova

Jon viarnuŭsia ŭ Biełaruś, dzie spačatku papracavaŭ na zavodzie imia Vaviłava ŭ Minsku, a potym pierajšoŭ na rahačoŭski zavod «Dyjaprajektar». Tam Kabiakoŭ prajšoŭ praz roznyja pasady: staršy majstar, namieśnik načalnika cecha, namieśnik načalnika zboračnaj vytvorčaści. Charektarna, što ŭ hety čas na zavodzie pracavaŭ Vasil Daŭhaloŭ, jašče adna vidnaja asoba biełaruskaj palityki. U 1990 Daŭhaloŭ trapiŭ u Viarchoŭny Saviet. U 1994 jon stanie namieśnikam kiraŭnika Administracyi prezidenta. Mienavita Daŭhaloŭ pieraciahnuŭ Kabiakova za saboj u Minsk. 35-hadovy namieśnik dyrektara «Dyjaprajektara» staŭ namieśnikam načalnika Słužby kantrolu, anałaha siońniašniaha KDK. Urešcie Kabiakoŭ tak i nie vypadaŭ z uładnaj abojmy. U jaho byli pasady staršyni Kamiteta dziaržkantrolu, ministra ekanomiki, vice-premjera.

4. Pracuje z 8:00 da 21:00 i na vychadnych

Niekali Kabiakoŭ padzialiŭsia z žurnalistami svaim pracoŭnym hrafikam. «Ja pracuju zvyčajna ad 8:00 da 21:00. Chiba što ŭ vychadnyja bolš pracavać staŭ». Tady Kabiakoŭ byŭ jašče vice-premjeram. «Hadzińnik u mianie nie „Łuč“, abutak nie pamiataju, a voś praktyčna ŭsio astatniaje — ajčynnaje», — zaznačyŭ jon.

5. Łukašenka chryściŭ syna Kabiakova?

Jość takaja bajka, što adnojčy Andrej Kabiakoŭ paprasiŭ Alaksandra Łukašenku stać chrosnym baćkam syna vice-premjera. I Łukašenka, jak nie dziŭna, zhadziŭsia. Paśla hetaha kiraŭnik dziaržavy zaŭsiody mieŭ peŭny pijetet da Kabiakova.

Ci nie ŭpieršyniu, kali nie ličyć Miaśnikoviča, kiraŭnikom Administracyi prezidenta pryznačany «haspadarnik». Da strukturu ŭznačalvali budaŭnik Sinicyn, siłaviki Łatypaŭ, Šejman i Niavyhłas, dypłamat Makiej. Vyhladaje, što ekanomika vychodzić na pieršy płan pierad palitykaj.

Kali ministr zamiežnych spravaŭ u biełaruskich umovach adkazny tolki za adnosiny z Zachadam i tudy pryznačyli Uładzimira Makieja, jaki maje prazachodniuju reputacyju, to Administracyju prezidenta addali čałavieku, jaki najlepš viedaje ŭvachody i vychady Maskvy.

• 0
• 0
• 0
• 0
• 0
• 0
• 0
• 0