Biernd Štanhie raźličvaje na čatyry ački ŭ matčach z Bośnijaj i Hiercahavinaj

Hałoŭny trenier biełaruskaj futbolnaj zbornaj Biernd Štanhie raźličvaje na čatyry ački ŭ adboračnych matčach čempijanatu Jeŭropy-2012 suprać Bośnii i Hiercahaviny (2 vieraśnia doma, 6 vieraśnia ŭ haściach).

«Baśnijcy dakładna skazali, što im patrebnyja čatyry ački ŭ matčach z nami. Naša meta takaja ž. Heta kanflikt intaresaŭ, jaki nam treba vyrašyć», — skazaŭ Štanhie na pres-kanfierencyi ŭ Minsku 29 žniŭnia.

Pavodle jaho słoŭ, sapiernik vielmi mocny indyvidualna, i hetamu treba supraćpastavić zładžanyja kamandnyja dziejańni. «Baśnijcy cudoŭna vykonvajuć standartnyja stanoviščy, mocnyja ŭ atacy i kontratacy, — zajaviŭ trenier. — Ale jość i słabyja miescy, jakija my pastarajemsia vykarystać. Vielmi važna nie parušać praviły. Spadziajemsia na poŭny stadyjon, padtrymku balelščykaŭ i ŭsioj krainy. Naša meta — pieramoha ŭ piatnicu. Mianie nie cikavić, jak zhulajuć Francyja z Rumynijaj — tolki naš matč».

Niamiecki śpiecyjalist adznačyŭ, što

traŭmy hulcoŭ BATE Vitala Radzivonava i Alaksandra Jureviča ŭ niadzielnym matčy suprać minskaha «Dynama» stali dla jaho šokam.

Napadajučy Siarhiej Karnilenka, jaki pierajšoŭ dniami z «Zienita» ŭ «Kryły Savietaŭ», byŭ vyklikany ŭ zbornuju paźniej čym asnoŭnaja hrupa, ale raniej, čym byŭ traŭmavany Radzivonaŭ. «Pahladzicie, kolki chvilin zhulaŭ Karnilenka za apošnija paŭhoda. Toje, što ja rablu, — heta padarunak dla jaho», — zajaviŭ Štanhie, adkazvajučy na pytańnie ab matyvach svaich dziejańniaŭ. Pavodle słoŭ Štanhie, z Karnilenkam jon znachodziŭsia ŭ pastajannym kantakcie ŭvieś apošni tydzień. «Jon pryjedzie i viedaje što rabić», — zajaviŭ trenier.

Na jaho dumku, kožny hulec zbornaj ciapier dumaje, što maje apošni šans zhulać «u vialikim turniry». «My pavinny sumlenna pryznać, što adboračnaja hrupa čempijanatu śvietu-2014 z Francyjaj i Ispanijaj dla nas na pamier bolš, čym treba», — vobrazna vykazaŭsia Štanhie.

Jon taksama paviedamiŭ, što fiederacyja źviarnułasia va UEFA z prośbaj dazvolić kamandzie vyjści na pole 2 vieraśnia z žałobnymi paviazkami z nahody śmierci administratara zbornaj Uładzimira Jeŭsiuka. 27 žniŭnia jon pamior na 38-m hodzie žyćcia ŭ ciahniku «Maskva — Minsk». U rasijskaj stalicy Jaŭsiuk zdavaŭ dakumienty ŭ pasolstva Bośnii i Hiercahaviny.

2 vieraśnia ŭ hrupie D adbuducca taksama matčy Luksiemburh — Rumynija i Ałbanija — Francyja. Stanovišča kamand: Francyja — 13 ačkoŭ (6 hulniaŭ; roźnica miačoŭ 9–2), Biełaruś — 12 (7; 6–2), Bośnija i Hiercahavina — 10 (6; 8–7), Rumynija — 8 (6; 8–6), Ałbanija — 8 (6; 4–6), Luksiemburh — 1 (7; 1–13).

• 0
• 0
• 0
• 0
• 0
• 0
• 0
• 0