Pryznali «ekstremisckim» sajt Grodno.in, jaki raniej zmusiŭ prabačacca Bondaravu
Sud Leninskaha rajona Hrodna ŭdarna papracavaŭ, pryznaŭšy ekstremisckimi papularny ŭ horadzie biznes-partał Grodno.in i ŭsie sacsietki, ź im źviazanyja, a taksama šerah inšych internet-resursaŭ.
Akramia ŭłasna sajta Grodno.in, «ekstremisckimi» pryznali dva źviazanych ź im telehram-kanały, a taksama staronki ŭ tyktoku, instahramie, fejsbuku, X, «Ukantakcie» i «Adnakłaśnikach».
Raniej Grodno.in ustupiŭ u kanflikt ź viadomaj hrodzienskaj danosčycaj Volhaj Bondaravaj, adnosna jakoha jana ŭ svaim telehram-kanale rabiła zakidy, nazyvajučy jaho «ekstremisckim», choć takoha statusa vydańnie tady nie mieła. Žurnalisty padavali na Bondaravu ŭ sud, ale sprava da jaho tady nie dajšła — baki damovilisia praź miedyjatara. Danosčycy pryjšłosia publična abviarhać adzin sa svaich pastoŭ.
Ciapier ža, praz bolš čym paŭhoda paśla taho vypadku, hety status vydańnie «dahnaŭ», i Bondarava z hetaha ŭžo ciešycca, nie chavajučy, što sama prykłała da hetaha ruku.
Aprača taho, «ekstremisckim» pryznali staronki ŭ fejsbuku pravasłaŭnaha śviatara Hieorhija Roja, jaki ciapier prynaležyć da Usialenskaha patryjarchatu dy žyvie i pracuje ŭ Vilni, i ciapierašniaj hałoŭnaj redaktarki telekanała «Biełsat» Aliny Koŭšyk.
Taksama pad zabaronu trapiš akaŭnt u instahramie pad nazvaj autapolk.
A sud Lidskaha rajona tym časam pryznaŭ ekstremisckim tyktok-akaŭnt denroy86 Dzianisa Čaščavika.
Kamientary